ନୂଆଦିଲ୍ଲୀ: ଶେଷ ହୋଇଛି ଲୋକସଭା ନିର୍ବାଚନ। ଦେଶ ନିଜ ନିର୍ବାଚିତ ପ୍ରତିନିଧିଙ୍କୁ ସଂସଦକୁ ପଠାଇଛି। ନୂଆ କରି ସଂସଦକୁ ନିର୍ବାଚିତ ହୋଇ ଆସିଥିବା ସାଂସଦମାନଙ୍କୁ ନେଇ ଏଥର ପ୍ରଚ୍ଛଦ ପ୍ରସଙ୍ଗ ପ୍ରସ୍ତୁତ କରିଛି ଜାତୀୟ ପତ୍ରିକା ‘ଇଣ୍ଡିଆ ଟୁଡେ’ । ଏହି ପ୍ରଚ୍ଛଦ ପ୍ରସଙ୍ଗର ଶୀର୍ଷକ ରଖାଯାଇଛି ‘ଦି ନ୍ୟୁ ବ୍ରିଗେଡ୍’ । ଆଉ ଏହି ତାଲିକାରେ ସ୍ଥାନ ପାଇଛନ୍ତି ଓଡ଼ିଆ ଝିଅ ଚନ୍ଦ୍ରାଣୀ ମୁର୍ମୁ। ଦେଶର ସବୁଠାରୁ କମ୍ ବୟସ୍କ ସାଂସଦ ଭାବେ ‘ଇଣ୍ଡିଆ ଟୁଡେ’ ଚନ୍ଦ୍ରାଣୀଙ୍କୁ ଉପସ୍ଥାପିତ କରିଛି।
Sambad is now on WhatsApp
Join and get latest news updates delivered to you via WhatsApp
ଚନ୍ଦ୍ରାଣୀ ମୁର୍ମୁ- ପାର୍ଲାମେଣ୍ଟ ଇତିହାସରେ ସବୁଠାରୁ କନିଷ୍ଠ ସାଂସଦର ମାନ୍ୟତା ପାଇଛନ୍ତି ଓଡ଼ିଶାର ଚନ୍ଦ୍ରାଣୀ ମୁର୍ମୁ । ୨୫ ବର୍ଷୀୟ ବି-ଟେକ୍ ଛାତ୍ରୀ ଚନ୍ଦ୍ରାଣୀ ବିଜେଡି ଟିକେଟରେ କେନ୍ଦୁଝରରୁ ଜିତି ଯାଇଛନ୍ତି ସଂସଦ ।
ତେଜସ୍ୱୀ ସୂର୍ଯ୍ୟା- ୨୮ ବର୍ଷୀୟ ତେଜସ୍ୱୀ ସୂର୍ଯ୍ୟା ଦକ୍ଷିଣ ବେଙ୍ଗାଲୁରୁର ବିଜେପି ସାଂସଦ । ବିଜେପି ସୋସିଆଲ ମିଡିଆ ସେଲରେ ଗୁରୁତ୍ୱପୂର୍ଣ୍ଣ ଦାୟିତ୍ୱ ତୁଲାଇ ଥିବା ତେଜସ୍ୱୀ କଂଗ୍ରେସ ହେଭିୱେଟ୍ ବି କେ ହରିପ୍ରସାଦଙ୍କୁ ହରାଇଛନ୍ତି । ଜଣେ ଆଇନଜୀବୀ ଭାବେ ଅନେକ ଗୁରୁତ୍ୱପୂର୍ଣ୍ଣ ମାମଲା ଲଢିବାର ଅନୁଭୂତି ବି ରହିଛି ।
ଗୌତମ ଗମ୍ଭୀର- କ୍ରିକେଟ ପଡିଆରୁ ସଂସଦ ଭବନ । ପୂର୍ବ ଦିଲ୍ଲୀରୁ ପ୍ରାୟ ୩ ଲକ୍ଷ ଭୋଟରେ ଜିତି ସଂସଦକୁ ଆସିଛନ୍ତି ଏହି ପୂର୍ବତନ ଟିମ୍ ଇଣ୍ଡିଆ ଓପନର ଗୌତମ ଗମ୍ଭୀର।
ରବି କିଷନ- ଭୋଜପୁରୀ ଷ୍ଟାର ରବି କିଷନ ୨୦୧୪ରେ କଂଗ୍ରେସ ଟିକେଟରେ ଲଢି ଜୋନପୁରରୁ ହାରିଥିଲେ । ହେଲେ ବିଜେପି ଟିକେଟରେ ଗୋରଖପୁରରୁ ଲଢି ସଂସଦରେ ପ୍ରବେଶ କରିଛନ୍ତି । ୟୁପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ଲୋକସଭା ଆସନ ଗୋରଖପୁରକୁ ପୁଣି ବିଜେପି ଖାତାକୁ ଫେରାଇ ଆଣିଛନ୍ତି ।
ମିମି ଚକ୍ରବର୍ତ୍ତୀ- ପ୍ରଥମଥର ସଂସଦକୁ ନିର୍ବାଚିତ ହୋଇଛନ୍ତି ବେଙ୍ଗଲି ସୁପରଷ୍ଟାର ମିମି ଚକ୍ରବର୍ତ୍ତୀ । ପଶ୍ଚିମବଙ୍ଗ ଯାଦବପୁର ଲୋକସଭା ଆସନରୁ ଟିଏମସି ଟିକେଟରେ ଲଢ଼ି ସଂସଦକୁ ଯାଇଛନ୍ତି ମିମି । ସଂସଦ ଭବନ ସାମ୍ନାରେ ତାଙ୍କର ଜିନ୍ସଫିନ୍ଧା ଫଟୋକୁ ସୋସିଆଲ ମିଡିଆରେ ମଧ୍ୟ ଟ୍ରୋଲ କରାଯାଇଥିଲା।
ପଲ୍ଲଭ ଲୋଚନ ଦାସ- ତେଜପୁର ଆସନରୁ କଂଗ୍ରେସ ହେଭିୱେଟ୍ ଏମଜିଭିକେ ଭାନୁଙ୍କୁ ୨ ଲକ୍ଷ ଭୋଟରେ ହରାଇ ସଂସଦରେ ପ୍ରଥମ ଥର ଲାଗି ସଦସ୍ୟ ବନିଛନ୍ତି ବିଜେପି ସାଂସଦ ପଲ୍ଲଭ ଲୋଚନ ଦାସ ।
ଅମୋଲ କୋହଲି- ମହାରାଷ୍ଟ୍ର ଶିହରୁର ଆସନରୁ ଏନସିପି ଟିକେଟରେ ନିର୍ବାଚନ ଜିତି ସଂସଦକୁ ଯାଇଛନ୍ତି ଅମୋଲ କୋହଲି । ମରାଠୀ ଟିଭି ସିରିଏଲରେ ଛତ୍ରପତି ସମ୍ଭାଜୀ ଭୂମିକାରେ ନଜର ଆସି ବେଶ ଲୋକପ୍ରିୟ ହୋଇପାରିଥିଲେ କୋହଲି ।