୧୦ମ ପରୀକ୍ଷାରେ ୯୭ ପ୍ରତିଶତ ନମ୍ବର ରଖି ଉତ୍ତୀର୍ଣ୍ଣ ହୋଇଥିବା ଛାତ୍ର ଘରଘର ବୁଲି କରୁଥିଲେ ଟ୍ୟୁସନ

ନୂଆଦିଲ୍ଲୀ: ବିହାର ବୋର୍ଡ ପରୀକ୍ଷାରେ ସଫଳତା ହାସଲ କରିବା ପ‌ରେ ଛାତ୍ରଛାତ୍ରୀମାନେ କିଏ କେମିତି ପାଠପଢ଼ା ପାଇଁ ପ୍ରସ୍ତୁତ ହୋଇଥିଲେ ସେ ବିଷୟରେ ଆଲୋଚନା କରୁଛନ୍ତି। ଏହି କ୍ରମରେ ବିହାର ରାଜ୍ୟରେ ୫୦୦ରୁ ୪୮୮ ଆର୍ଥାତ ୯୭ ପ୍ରତିଶତ ନମ୍ବର ରଖି ଦ୍ବିତୀୟ ସ୍ଥାନ ଅଧିକାର କରିଥିବା ସଚିନ କୁମାରଙ୍କ ସଂଘର୍ଷ ଓ ସଫଳତା କାହାଣୀ ଚର୍ଚ୍ଚାର ପରିସରକୁ ଆସିଛି।

ସଚିନଙ୍କ ମା’ ଗୁଡ଼ିଆ ଦେବୀ ବିଡ଼ି ତିଆରି କାମ କରୁଥିବା ବେଳେ ବାପା ଭୁଦେବ ରାମ ଝାଡ଼ଖଣ୍ଡର ରାଞ୍ଚିଜିଲ୍ଲା ସ୍ଥିତ ଏକ ରେସ୍ତୋରାଁରେ ୱେଟର ଭାବେ କାମ କରନ୍ତି। ପରିବାର ଆର୍ଥିକ ସଙ୍କଟ ପାଇଁ ସଚିନ ଯାହାପାଠପଢ଼ନ୍ତି ତାହାକୁ ସେ ନିଜ ବୟସର ପିଲାଙ୍କୁ ପଢ଼ାଇ ଥାଆନ୍ତି। ପାଠପଢ଼ାରେ ଯଦି କୌଣସି ପିଲାଙ୍କ କିଛି ସମସ୍ୟା ଥାଏ ତେବେ ସେ ଏହାକୁ ଖୁବ ସହଜରେ ସମାଧାନ କରାଇ ବୁଝାଇ ଦେଇଥାଆନ୍ତି। ପାଠପଢ଼ା ଶୈଳୀ ଦେଖି ଧୀରେଧୀରେ ସଚିନଙ୍କ ପାଖକୁ ଅନେକ ପିଲା ପାଠପଢ଼ିବାକୁ ଆସିଥିଲେ। ସଚିନ ଏହାପରେ ଟ୍ୟୁସନ କରିବା ଆରମ୍ଭ କଲେ।

ସଚିନ ସକାଳ ୩ଟାରୁ ଉଠି ୪ଟାରୁ ୭ଟା ପର୍ଯ୍ୟନ୍ତ ୮ମ ଓ ୧୦ମ ଶ୍ରେଣୀ ପିଲାଙ୍କୁ ପାଠପଢ଼ାଇବା ପାଇଁ ଘରୁ ବାହାରି ଯାଇଥାଆନ୍ତି। ପାଠପଢ଼ାଇ ଘରକୁ ଆସିବା ପରେ ନିଜର କାମ ସାରି ସ୍କୁଲ ଚାଲି ଯାଇଥାଆନ୍ତି। ସ୍କୁଲରୁ ଆସି ପୁଣି ଟ୍ୟୁସନ ପଢ଼ାଇ ଥାଆନ୍ତି। ତା’ପରେ ନିଜେ ପରୀକ୍ଷା ପାଇଁ ପ୍ରସ୍ତୁତି କରିଥାଆନ୍ତି।

ନିଜର ସଫଳତାକୁ ନେଇ ସଚିନ କହିଛନ୍ତି, ‘ ସମସ୍ତ ସଫଳତାର ଶ୍ରେୟ ମୁଁ ‌‌ମୋର ଗୁରୁଜନମାନଙ୍କୁ ‌ଦେବି। ଏହି ସଫଳତା ପାଇଁ ମୋତେ ଅନେକ କଷ୍ଟ କରିବାକୁ ପଡ଼ିଛି। କିନ୍ତୁ ସବୁ କଷ୍ଟକୁ ମୁଁ ମୋର ବାପା, ମା’ ଓ ଭଉଣୀଙ୍କ ମୁହଁକୁ ଚାହିଁ ଭୁଲି ଯାଇଛି। ମୋର ଆଶା ଆଗକୁ ଯାଇ ଜଣେ ଭଲ ଡାକ୍ତର ହେବି। ଆଉ ମୋର ପରିବାରର ଆର୍ଥିକ ଅବସ୍ଥା ସୁଧାରିବି। ବାପା, ମା’ ଓ ଭଉଣୀଙ୍କୁ ଖୁସିରେ ରଖିବି।