ନୂଆଦିଲ୍ଲୀ: ସୟଦ ମୁସ୍ତାକ ଅଲ୍ଲୀ ଟ୍ରଫିରେ ବିଦର୍ଭ ବଡ ବିଜୟ ସହ ସେମିଫାଇନାଲ ଟିକେଟ ହାତେଇଛି । ଆଉ ଏହି ମ୍ୟାଚ୍ ପଛର ହିରୋ ସାଜିଛନ୍ତି ଅକ୍ଷୟ କର୍ଣ୍ଣେୱାର, ଯିଏ ନିଜର କଞ୍ଜୁସି ବୋଲିଂ ବଳରେ ରାଜସ୍ଥାନକୁ ହଟହଟା କରିଥିଲେ । କାରଣ ଅକ୍ଷୟ ମାତ୍ର ୪ ଓଭର ବୋଲିଂ କରି ୭ ରନ ଦେବା ସହ ଗୋଟିଏ ୱିକେଟ ହାସଲ କରିଥିଲେ । ଏହି କଞ୍ଜୁସି ବୋଲିଂ ବଳରେ ରାଜସ୍ଥାନ ବଡ ସ୍କୋର କରିବାରେ ବିଫଳ ହୋଇଥିଲା । ଖାସକରି ଅକ୍ଷୟଙ୍କୁ ନେଇ ଖେଳିବା ରାଜସ୍ଥାନ ଖେଳାଳିଙ୍କ ପାଇଁ ଏତେଟା ସହଜ ନଥିଲା । କାରଣ ଅକ୍ଷୟ ଉଭୟ ହାତରେ ବୋଲିଂ କରି ରାଜସ୍ଥାନ ଖେଳାଳୀଙ୍କୁ ଅଡୁଆରେ ପକାଇଥିଲେ ।
Sambad is now on WhatsApp
Join and get latest news updates delivered to you via WhatsApp
୨୯ ବର୍ଷୀୟ ଅକ୍ଷୟ କର୍ଣ୍ଣେୱାର ଏବେ ବିଦର୍ଭ ପକ୍ଷରୁ କ୍ରିକେଟ ଖେଳୁଛନ୍ତି । କିନ୍ତୁ ଅକ୍ଷୟଙ୍କୁ ନେଇ ଏବେ ଭାରତୀୟ କ୍ରିକେଟରେ ଜୋରଦାର ଚର୍ଚ୍ଚା ହେଉଛି । କାରଣ ଏହି ଅକ୍ଷୟ ଉଭୟ ହାତରେ ବୋଲିଂ କରିବାରେ ଦକ୍ଷତା ହାସଲ କରିଛନ୍ତି । ଆଉ ଉଭୟ ହାତରେ ବୋଲିଂ କରି ପ୍ରତିପକ୍ଷ ଖେଳାଳିଙ୍କୁ ବାନ୍ଧି ରଖିବାରେ ପାରଙ୍ଗମ ଅକ୍ଷୟ । ଗତ କିଛି ବର୍ଷ ହେବ ଅକ୍ଷୟଙ୍କୁ ଏହି ଭୂମିକାରେ ଦେଖିବାକୁ ମିଳୁଛି । କିନ୍ତୁ ଚଳିତ ଥର ସେ ଚର୍ଚ୍ଚାକୁ ଆସିବା ପଛର ସବୁଠୁ ବଡ କାରଣ ସାଜିଛି ଅକ୍ଷୟଙ୍କ କଞ୍ଜୁସି ବୋଲିଂ । ଚଳିତ ସୟଦ ମୁସ୍ତାକ ଅଲ୍ଲୀ ଟ୍ରଫିରେ ଅକ୍ଷୟ ୭ଟି ମ୍ୟାଚରେ ୨୮ ଓଭର ବୋଲିଂ କରିଛନ୍ତି । ଅର୍ଥାତ ପ୍ରତି ମ୍ୟାଚରେ ୪ ଓଭର ଲେଖାଏଁ ବୋଲିଂ କରି ନିଜର କୋଟା ପୂରଣ କରିଛନ୍ତି ଅକ୍ଷୟ । ୨୮ ଓଭର ବୋଲିଂ କରିଥିଲେ ମଧ୍ୟ ମାତ୍ର ୧୦୦ ରନ୍ ବ୍ୟୟ କରିଛନ୍ତି ଅକ୍ଷୟ । ଟି-୨୦ ଫର୍ମାଟରେ ଏଭଳି କଞ୍ଜୁସି ବୋଲିଂ ଖୁବ କ୍ୱଚିତ ଦେଖିବାକୁ ମିଳେ ।