କୋଟିପତି ସିଙ୍ଗଡ଼ା ବିକାଳି, ଛାପା ମାରିବା ପରେ ଉଡ଼ିଲା ଆୟକର ବିଭାଗର ଅଧିକାରୀଙ୍କ ହୋସ
ଅଲିଗଡ଼ : ଉତ୍ତରପ୍ରଦେଶର ଅଲିଗଡ଼ରେ ଜଣେ ସିଙ୍ଗଡ଼ା ବିକାଳି କୋଟିପତି ବୋଲି ଜାଣି ଲୋକଙ୍କ ହୋସ ଉଡ଼ି ଯାଇଛି । ସନ୍ଦେହରେ ରାଜ୍ୟ ଗୁଇନ୍ଦା ବିଭାଗ ଏବଂ ଆୟକର ବିଭାଗର ଅଧିକାରୀ ବିକାଳି ମୁକେଶଙ୍କ ଘରେ ଛାପା ମାରିବା ପରେ ସବୁ ସତ ସାମ୍ନାକୁ ଆସିଥିଲା । ବର୍ଷକୁ ୪୦ଲକ୍ଷ ଆୟ କରୁଥିଲେ ଜିଏସ୍ଟିରେ ରେଜିଷ୍ଟ୍ରେସନ କରିବାକୁ ପଡ଼େ । କିନ୍ତୁ ୬୦ଲକ୍ଷରୁ ଅଧିକ ଟଙ୍କା ଆୟ କରି ମଧ୍ୟ ଜିଏସ୍ଟିରେ ରେଜିଷ୍ଟ୍ରେସନ କରି ନଥିବାରୁ ମୁକେଶଙ୍କୁ ରାଜ୍ୟ ଗୁଇନ୍ଦା ବିଭାଗ ଏବେ ଏ ନେଇ ନୋଟିସ ପଠାଇଥିବା ଜଣା ପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଅଲିଗଡ଼ରେ ଥିବା ସୀମା ଟକିଜରେ ଗତ ୧୦ବର୍ଷ ହେଲାଣି ସିଙ୍ଗଡ଼ା ଏବଂ କଚୌଡି ଦୋକାନ ଚଳାଇ ଆସୁଛନ୍ତି ମୁକେଶ । କିଛି ଦିନ ତଳେ ତାଙ୍କ ଆୟକୁ ନେଇ ରାଜ୍ୟ ଗୁଇନ୍ଦା ବିଭାଗକୁ ସୂଚନା ମିଳିବା ପରେ ଆୟକର ବିଭାଗର ଅଧିକାରୀଙ୍କୁ ସୂଚନା ଦିଆ ଯାଇଥିଲା । ଯାହା ପରେ ଜୁନ୍ ୨୧ରେ ମୁକେଶଙ୍କ ଘରେ ଛାପା ମରା ଯାଇଥିଲା । ତଦନ୍ତ ଚାଲୁଥିବା ବେଳେ ମୁକେଶ ପ୍ରତି ମାସରେ ଲକ୍ଷରୁ ଅଧିକ ଟଙ୍କା ଆୟ କରୁଥିବା କଥା କହିଥିଲେ । ଏହା ସହ ବର୍ଷକୁ ୬୦ଲକ୍ଷରୁ ଅଧିକ ଆୟ କରୁଥିବା କଥା ସ୍ୱୀକାର କରିଥିଲେ । ତେବେ ମୁକେଶଙ୍କ ବୟାନ ପରେ ମଧ୍ୟ ମୁକେଶଙ୍କ ଆୟ ଏକ କୋଟିରୁ ଅଧିକ ହୋଇଥାଇ ପାରେ ବୋଲି ସନ୍ଦେହ କରି ରାଜ୍ୟ ଗୁଇନ୍ଦା ବିଭାଗ ଏବଂ ଆୟକର ବିଭାଗର ଅଧିକାରୀ ଅଧିକ ତଦନ୍ତ ଜାରି ରଖିଛନ୍ତି । ଏହା ସହ ୬୦ଲକ୍ଷ ଆୟ କରି ଜିଏସ୍ଟିରେ ରେଜିଷ୍ଟ୍ରେସନ କରି ନଥିବାରୁ ମୁକେଶଙ୍କୁ ରାଜ୍ୟ ଗୁଇନ୍ଦା ବିଭାଗ ଏ ନେଇ ନୋଟିସ ପଠାଇଛନ୍ତି ।