ରାଫେଲ ସହିତ ଭାରତକୁ ଆସିଛି ଏସବୁ ମାରାତ୍ମକ ମିସାଇଲ
ଭାରତୀୟ ବାୟୁସେନାର ନୂଆ ଶକ୍ତି ରୂପେ ଉଭା ହୋଇଛି ଶକ୍ତିଶାଳୀ ରାଫେଲ ବିମାନ । ସାମରିକ ବିଶେଷଜ୍ଞ କହନ୍ତି, ଭାରତୀୟ ଉପମହାଦେଶରେ ଏହି ଅତ୍ୟାଧୁନିକ ବିମାନ ଶକ୍ତି ସନ୍ତୁଳନକୁ ଅନେକ ମାତ୍ରାରେ ବଦଳାଇ ରଖିଦେବ। ପାକିସ୍ତାନ ପାଖରେ ଆମେରିକାର ଅତ୍ୟାଧୁନିକ ଏଫ-୧୬ ଲଢୁଆ ବିମାନଥିବା ବେଳେ ଶକ୍ତି ଓ ଦକ୍ଷତାରେ ତାହା ରାଫେଲ ସହିତ ତୁଳନୀୟ । କିନ୍ତୁ କାହିଁକି ରାଫେଲକୁ ଏତେ ଗୁରୁତ୍ୱ ଦିଆଯାଉଛି ? ପ୍ରକୃତ କଥା ହେଉଛି ରାଫେଲ ସହିତ ଯେଉଁ ଓ୍ଡିପନ୍ ସିଷ୍ଟମ୍ ବା ଅସ୍ତ୍ରଶସ୍ତ୍ର ବ୍ୟବସ୍ଥା ଖଞ୍ଜାଯାଇଛି ତାହା ହିଁ ଚୀନ, ପାକିସ୍ତାନ ପାଇଁ ଚିନ୍ତାର ବିଷୟ ହେବ । ରାଫେଲ ସହିତ ତିନୋଟି ମୁଖ୍ୟ ମିସାଇଲ ସିଷ୍ଟମ ଫ୍ରାନ୍ସ ଭାରତକୁ ଦେବାକୁ ଚୁକ୍ତି ହୋଇଛି । ତାହା ହେଉଛି ଷ୍ଟର୍ମ ସାଡୋ କ୍ରୁଇଜ ମିସାଇଲ ବା ସ୍କାଲପ, ମେଟେର ମିସାଇଲ ଓ ହାମର ମିସାଇଲ ।
Sambad is now on WhatsApp
Join and get latest news updates delivered to you via WhatsApp
ସ୍କାଲପ ମିସାଇଲ
ଶତ୍ରୁପକ୍ଷ ଭିତରେ ପଶି ଗୁରୁତ୍ୱପୂର୍ଣ୍ଣ ଟାର୍ଗେଟକୁ ଅତ୍ୟନ୍ତ ନିର୍ଭୁଲଭାବେ ଲକ୍ଷ୍ୟଭେଦ କରି ଧ୍ବଂସ କରିବାରେ ସ୍କାଲପର ଦକ୍ଷତା ଅତୁଳନୀୟ । ପ୍ରାୟ ୩୦୦ କିମି ଦୂରତ୍ୱ ପର୍ଯ୍ୟନ୍ତ ଲକ୍ଷ୍ୟଭେଦ କରିପାରୁଥିବା ସ୍କାଲପ ମିସାଇଲ ଶତ୍ରୁପକ୍ଷର ଏୟାର ଡିଫେନ୍ସ ସିଷ୍ଟମକୁ ଚକମା ଦେଇପାରିବ । ଅନ୍ୟପକ୍ଷରେ ମେଟେର ମିସାଇଲର ମାରକ କ୍ଷମତା ୧୫୦ କିଲୋମିଟର । ଏହାର କ୍ଷମତା ଆମେରିକାର ଆମରାମ କ୍ଷେପଣାସ୍ତ୍ରଠାରୁ ଅଧିକ ବୋଲି କୁହାଯାଉଛି ।
ମେଟେର ମିସାଇଲ
ଏହି ଆକାଶରୁ ଆକାଶକୁ ନିକ୍ଷେପ କରାଯାଉଥିବା କ୍ଷେପଣାସ୍ତ୍ରର ମାରକ ରେଞ୍ଜ୍ ୧୨୦ରୁ ୧୫୦ କିଲୋମିଟର । ଆକାଶ ମାର୍ଗରେ ଏହି ମିସାଇଲର ଜବାବ ଉଭୟ ପାକିସ୍ତାନ ଓ ଚୀନ ପାଖରେ ନାହିଁ । ପାକିସ୍ତାନ ବ୍ୟବହାର କରୁଥିବା ଏଫ-୧୬ ବିମାନରେ ଆମେରିକା ନିର୍ମିତ ଆମରାମ ମିସାଇଲ ଲାଗିଛି, ଏହାର ରେଞ୍ଜ ମାତ୍ର ୧୦୦ କିଲୋମିଟର । ଭାରତରେ ପହଞ୍ଚିଥିବା ୫ଟି ରାଫେଲ ବିମାନ ସହ ୮-୧୦ଟି ମେଟେର ମିସାଇଲ ଆସିଥିବା କୁହାଯାଉଛି ।
ହାମର ମିସାଇଲ
ରାଫେଲରେ ଖଞ୍ଜା ଯାଉଥିବା ଆଉ ଏକ ସ୍ୱତନ୍ତ୍ର ଅସ୍ତ୍ର ହେଉଛି ହାମର ମିସାଇଲ । ଏହାର ବିଶେଷତ୍ୱ ହେଉଛି ଶତ୍ରୁପକ୍ଷର ଯେକୌଣସି ପ୍ରକାରର ବଙ୍କରକୁ ଫଟାଇବାରେ ଏହି ମିସାଇଲ ସକ୍ଷମ । ଏପରିକି ହିମାଳୟ ପାର୍ବତ୍ୟାଞ୍ଚଳରେ ଥିବା ଶତ୍ରୁପକ୍ଷର ସୁରକ୍ଷିତ ବଙ୍କରକୁ ଏହା ଧ୍ୱଂସ କରିଦେବ । ଏହାର ଆଉ ଏକ ବିଶେଷତ୍ୱ ହେଉଛି ଏହାକୁ ଉଭୟ ଗ୍ଲାଇଡର ବୋମା ଓ ମିସାଇଲ ଭାବେ ବ୍ୟବହାର କରିହେବ । ଏହାକୁ ଫ୍ରାନ୍ସର ସାଫ୍ରାନ କମ୍ପାନି ନିର୍ମାଣ କରିଥାଏ ।