ନୂଆଦିଲ୍ଲୀ: ଅଫେରା ହ୍ରଦ । ଏଠାକୁ ଯିଏ ଥରେ ଆସିଛି ଆଉ ଜୀବନ ଧରି ଫେରିନି । କ’ଣ ରହିଛି ଏହି ହ୍ରଦରେ ତାହା କେହି ଜାଣିନାହାନ୍ତି । ଯଦି କିଏ ବି ଭୁଲରେ ଏଠାକୁ ଚାଲି ଆସିଛି, ଆଉ ଫେରିବା ତା ପାଇଁ ସମ୍ଭବ ହୋଇନି । କେଉଁଠି ରହିଛି ଏହି ରହସ୍ୟମୟ ହ୍ରଦ, କ’ଣ ରହିଛି ଏହି ଲୋମହର୍ଷଣକାରୀ ହ୍ରଦକୁ ନେଇ ଲୋକକଥା ଆସନ୍ତୁ ଜାଣିବା ।
Sambad is now on WhatsApp
Join and get latest news updates delivered to you via WhatsApp
ଇଏ ଏପରି ଏକ ରହସ୍ୟମୟ ହ୍ରଦ, ଏଥିରେ ଯିଏ ପାଦ ଦିଏ ତାକୁ ପାଣି କେଉଁ ଆଡେ ଟାଣିନିଏ ତାହା କେହି ଜାଣିପାରନ୍ତି ନାହିଁ । ଜୀବଜନ୍ତୁଙ୍କ ଜୀବନ ନେଉଥିବା ଏହି ହ୍ରଦ ରହିଛି ମିଆଁମାର-ଭାରତ ସୀମା ନିକଟବର୍ତୀ ପାଙ୍ଗସୁରେ । ଏହାର ଲମ୍ବା ୧ କିଲୋମିଟର ୪୦୦ ମିଟର ରହିଥିବା ବେଳେ ସର୍ବାଧିକ ଓସାର ରହିଛି ୮୦୦ ମିଟର । ଏହି ହ୍ରଦ ନିକଟରେ ରହିଛନ୍ତି ଆଦୀମ ଅଧିବାସୀ । ଏହାର ଆଖପାଖରେ ଜନବସତି ରହିଥିଲେ ମଧ୍ୟ କେହି ବି ଏହା ନିକଟକୁ ଯାଆନ୍ତି ନାହିଁ । କୁହାଯାଉଛି କି ଦ୍ୱିତୀୟ ବିଶ୍ୱଯୁଦ୍ଧ ସମୟରେ ଏଠାରେ ଅନେକ ରହସ୍ୟମୟ ଘଟଣା ଦେଖିବାକୁ ମିଳିଥିଲା । ଏହାକୁ ଏକ ସମତଳ ସ୍ଥାନ ମନେ କରି ଏଠାରେ ଏମର୍ଜେନ୍ସି ଲ୍ୟାଣ୍ଡିଂ କରିଥିଲା ଏକ ଆମେରିକୀୟ ବିମାନ । ବିମାନ ତ ଅବତରଣ କଲା ହେଲେ ଏଥିରେ ଥିବା ପାଇଲଟ, କର୍ମଚାରୀ ଓ ଯାତ୍ରୀମାନଙ୍କ ସମ୍ପର୍କରେ କୌଣସି ପତ୍ତା ମିଳିଲା ନାହିଁ । ବିମାନରେ ଥିବା ସମସ୍ତ ଲୋକ କୁଆଡେ ହଜିଗଲେ, ତାହା କେହି ଜାଣିପାରିଲେ ନାହିଁ।
ସେହି ଦ୍ୱିତୀୟ ବିଶ୍ୱଯୁଦ୍ଧ ସମୟର ଆଉ ଏକ କାହାଣୀ ରହିଛି । ସେହି ସମୟରେ ଇଂରେଜ ଏବଂ ଜାପାନ ମଧ୍ୟରେ ଭୟଙ୍କର ସଂଗ୍ରାମ ହୋଇଥିଲା । ଆସାମକୁ କବଜା କରିବା ଲକ୍ଷ୍ୟରେ ମାଡି ଆସିଥିଲା ଜାପାନ । ତେବେ ଜାପାନୀ ସୈନିକମାନେ ଯେତେବେଳେ ଏହି ହ୍ରଦ ନିକଟବର୍ତ୍ତୀ ହୋଇଥିଲେ ଜଣେ ଜଣେ କରି ସବୁ ସୈନିକ କୁଆଡେ ହଜି ଯାଇଥିଲେ, ତାହା ଜଣାପଡ଼ିନଥିଲା।
୧୯୪୨ ମସିହାରେ ବ୍ରିଟିସ୍ ସେନାର ଏକ ଦଳ ଏଠାକୁ ଆସିଥିଲା । ଏଠାରେ ପହଞ୍ଚିବା ପରେ ସେମାନଙ୍କର ଗାଡି ବାଲି ଭିତରେ ପୋତି ହୋଇଯାଇଥିଲା । ଜଣେ ବି ସୈନିକ ଏଠାରୁ ଜୀବନ୍ତ ଫେରିନଥିଲେ । ଏହି ହ୍ରଦକୁ ନେଇ ଏକ ଲୋକକଥା ରହିଛି । ଥରେ ଗାଁର କିଛି ଲୋକ ଏହି ହ୍ରଦ ନିକଟକୁ ଆସିଥିଲେ । ଏଠାରେ ସେମାନେ ଏକ ବିଶାଳକାୟ ମାଛ ଦେଖିଥିଲେ । ଏତେ ବଡ ମାଛ ଗାଁ ଲୋକେ କେବେ କେଉଁଠି ଦେଖିନଥିଲେ । ଗାଁ ଲୋକେ ମେଳ ହୋଇ ସେଇ ମାଛକୁ ଧରିଥିଲେ । ରାତିରେ ଗାଁ ସାରା ଲୋକ ଭୋଜି କରି ଉତ୍ସବ ପାଳନ କରିଥିଲେ । ତେବେ ଗାଁର ଜଣେ ମାତ୍ର ବୁଢୀ କୌଣସି କାରଣରୁ ଅନ୍ୟ ଏକ ଗାଁକୁ ଚାଲିଯାଇଥିଲେ । ସେହି ରାତିରେ ଗାଁ ଭିତରକୁ ମାଡି ଆସିଥିଲା ଏହି ହ୍ରଦର ପାଣି । ପୂରା ଗାଁ ପାଣିଭିତରେ ବୁଡିଯାଇଥିଲା । ରାତି ପାହିବା ବେଳକୁ ପୂରା ଗାଁ ଜନଶୂନ୍ୟ ହୋଇଯାଇଥିଲା । ଅନ୍ୟ ଗାଁକୁ ଚାଲିଯାଇଥିବାରୁ କେବଳ ସେହି ବୁଢୀ ଲୋକଟି ହିଁ ବଞ୍ଚିଯାଇଥିଲେ ।
ସ୍ଥାନୀୟ ଲୋକଙ୍କ କହିବା କଥା ରାତି ହେବାମାତ୍ରେ ଏହି ହ୍ରଦ ନିକଟରୁ ବିକଟାଳ ଶବ୍ଦ ଶୁଭିଥାଏ । କେହିକେହି କହନ୍ତି ଯେ ଏଠାରେ କୁଆଡେ ଅଶରୀରୀମାନେ ରହନ୍ତି । ଏଠାରେ ଯିଏ ପାଦ ଦିଅନ୍ତି, ସେମାନଙ୍କୁ ଏହି ଅଶରୀରୀମାନେ ଜୀଅନ୍ତା ଖାଇଯାଆନ୍ତି । ଆଉ କେହିକେହି ବିଶ୍ୱାସ କରନ୍ତି ଯେ, ଏଠାରେ ଏଲିଅନମାନଙ୍କର ବେସ୍ ରହିଛି । ଆହୁରି ମଧ୍ୟ କୁହାଯାଉଛି କି ଏହି ହ୍ରଦରେ ଇଲେକ୍ଟ୍ରୋମ୍ୟାଗ୍ନେଟିକ୍ ୱେଭ ରହିଛି, ଯାହା ଫଳରେ କି ଏହାର ଫଟୋ ଉଠାଇବା ଅସମ୍ଭବ । ଆଜି ମଧ୍ୟ ଏହି ହ୍ରଦର ରହସ୍ୟ ଭେଦ କରିବାରେ କେହି ବି ସଫଳ ହୋଇପାରିନାହାନ୍ତି ।