ନୂଆଦିଲ୍ଲୀ: ଆପଣମାନଙ୍କ ମଧ୍ୟରୁ ଅଧିକାଂଶ ଶୀର୍ଷକ ପଢ଼ିବା ପରେ ଭାବୁଥିବେ, ଏହା କିପରି ସମ୍ଭବ ? ଏକଥା ବି ଭାବୁଥିବେ କି ଯିଏ ୩୦ ବର୍ଷ ପୂର୍ବେ ମୃତ୍ୟୁବରଣ କରିଥିଲେ, ସେମାନେ କିପରି ମୃତ୍ୟୁ ପରେ ବିବାହ କଲେ? ଏହା କୌଣସି ପ୍ରକାରର ପରିହାସ ନୁହେଁ, ଏହା ଦକ୍ଷିଣ କାନ୍ନଡା ପରମ୍ପରାର ଏକ ଅଂଶ ।
Sambad is now on WhatsApp
Join and get latest news updates delivered to you via WhatsApp
ଆନି ଅରୁଣ ନାମକ ବ୍ୟକ୍ତି ନିଜ ଟ୍ୱିଟରରେ ଏହି କାହାଣୀ ସେୟାର କରିଛନ୍ତି, ଯାହା ସୋସିଆଲ ମିଡିଆରେ ବେଶ ଭାଇରାଲ ହୋଇଛି । ଯେଉଁମାନେ ଦକ୍ଷିଣ କାନ୍ନଡାର ପରମ୍ପରା ବିଷୟରେ ଜାଣି ନଥିବେ ସେମାନଙ୍କ ପାଇଁ ଏହା ମଜାଳିଆ ହୋଇପାରେ । ଅରୁଣ କହିଛନ୍ତି ଯେ, ସେ ଜୁଲାଇ ୨୮ରେ ଏକ ବିବାହ ଉତ୍ସବରେ ଯୋଗ ଦେଇଥିଲେ । ଯେଉଁଠାରେ ଉଭୟ ବର ଓ କନ୍ୟାଙ୍କର ପ୍ରାୟ ୩୦ ବର୍ଷ ପୂର୍ବେ ଦେହାନ୍ତ ହୋଇଥିଲା ତଥାପି ସେମାନଙ୍କ ପରିବାର ଉଭୟଙ୍କର ବିବାହ କରିବାକୁ ନିଷ୍ପତ୍ତି ନେଇଥିଲେ ।
ସେ ଆହୁରି ମଧ୍ୟ କହିଛନ୍ତି ଯେ, ଏହା ଏକ “ବିଶେଷ ପରମ୍ପରା”, ଯେଉଁଠାରେ ମୃତ ବର ଏବଂ କନ୍ୟାର ପରିବାର ଅଂଶଗ୍ରହଣ କରିଥାନ୍ତି। ଏହି ବିବାହରେ ଶିଶୁମାନଙ୍କୁ ସାମିଲ୍ ହେବା ଅନୁମତି ଦିଆଯାଇ ନଥାଏ । ସମସ୍ତ ରୀତିନୀତି ଦ୍ୱାରା ବିବାହ ସଂପନ୍ନ ହୋଇଥାଏ । ପରେ ଦୁଇ ପରିବାର ପରସ୍ପରର ଘରକୁ ଯାଇଥାନ୍ତି ।
“ଏହା ଏକ ଉତ୍ସବରୁ କମ୍ ନୁହେଁ ଏବଂ ଏହା ଏକ ଅଶୁଭ ବ୍ୟାପାର ମଧ୍ୟ ନୁହେଁ। ପୁଣି ବିବାହ ଶୋଭାଯାତ୍ରା ବି ହୋଇଥାଏ ଏବଂ ଶେଷରେ ବିବାହ ସଂପନ୍ନ ମଧ୍ୟ ହୋଇଥାଏ। ” ଅରୁଣ ବିବାହର ଅନେକ ଭିଡିଓ ମଧ୍ୟ ଟ୍ୱିଟରରେ ସେୟାର କରିଛନ୍ତି, ଯେଉଁଠାରେ ଅରୁଣ ରୀତିନୀତି ବିଷୟରେ ବର୍ଣ୍ଣନା କରିଛନ୍ତି ।