ହୀରାପୁରସ୍ଥିତ ଚଉଷଠୀ ଯୋଗିନୀ ପୀଠ : ଅଷ୍ଟମୀରେ ସଂପନ୍ନ ହୁଏ ପୋଡ଼ାମାଛ ବଳି ପରମ୍ପରା
ହାକେରା ହାଣ୍ଡି ପ୍ରସାଦ ପାଇଁ ଚାହିଁ ରହିଥାନ୍ତି ଭକ୍ତ
ବାଲିଅନ୍ତା : ମହାମାରୀ କରୋନା ଲକଡାଉନ ପାଇଁ ତାଲାପଡ଼ିଥିବା ସ୍ଥାନୀୟ ହୀରାପୁରସ୍ଥିତ ଚଉଷଠୀ ଯୋଗିନୀ ପୀଠ ଷୋଳପୂଜା ପାଇଁ ଉତ୍ସବମୁଖର ହୋଇପଡ଼ିଛି । ଶାରଦୀୟ ଦୁର୍ଗାପୂଜା ନେଇ ମହାମାୟାଙ୍କ ଷୋଳପୂଜା ରୀତିନୀତି ବିଧି ମୁତାବକ ଚାଲିଛି । ଚଳିତ ବର୍ଷ ଯୋଡ଼ା ଆଶ୍ବିନ ମାସ ପାଇଁ ମଳମାସ ପଡ଼ିଥିବାରୁ ଦୁଇଟି ପର୍ଯ୍ୟାୟରେ ମା’ଙ୍କ ଷୋଳପୂଜା ନୀତି ଅନୁଷ୍ଠିତ ହେଉଥିବା କୁହାଯାଇଛି । ଦ୍ବିତୀୟା ଓଷା ଦିନ ଆରମ୍ଭ ହୋଇଥିବା ଷୋଳପୂଜା ଗତମାସରେ ୮ ଦିନ କରାଯାଇ ବନ୍ଦ ରହିଥିଲା । ଏ ମାସରେ ପୁଣି ୮ ଦିନ ଅର୍ଥାତ ଆଜିଠାରୁ ୭ମୀ ପର୍ଯ୍ୟନ୍ତ ଷୋଳପୂଜା ଚାଲିବ ବୋଲି ମୁଖ୍ୟ ପୂଜକ ଭୀମସେନ ପାଢ଼ୀ ସୂଚନା ଦେଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଗୁରୁତ୍ବପୂର୍ଣ୍ଣ କଥା ହେଉଛି ମା’ଙ୍କର ଏହି ଷୋଳପୂଜା ଅବସରରେ ଚଉଷଠୀ ଯୋଗିନୀ ଟ୍ରଷ୍ଟ ପକ୍ଷରୁ ପଣ୍ଡା ପୂଜାରୀମାନଙ୍କ ଦ୍ବାରା ପ୍ରସ୍ତୁତ ହାକେରା ହାଣ୍ଡି ପ୍ରସାଦ ଖାଇବା ପାଇଁ ଆଖପାଖ ଅଞ୍ଚଳର ଶ୍ରଦ୍ଧାଳୁ ଚାହିଁ ରହିଥାନ୍ତି । ନୈବେଦ୍ୟ ଭାବେ ସଂଧ୍ୟାରେ ମାଟିହାଣ୍ଡି ଭିତରେ ଖେଚୁଡ଼ି , ଖିରି ଓ ପୁର ଏଣ୍ଡୁରି ପିଠା ଦେବୀଙ୍କୁ ଅର୍ପଣ କରାଯାଇଥାଏ । ଏବେ ପୁର ଏଣ୍ଡୁରି ବଦଳରେ ପୁର ଇଟିଲ ପିଠା ଭୋଗ ପ୍ରସ୍ତୁତ ହେଉଥିବା ଜଣାପଡ଼ିଛି । ମା’ଙ୍କର ହାକେରା ହାଣ୍ଡି ପ୍ରସାଦ ସେବନ କରିବା ପାଇଁ ଲୋକମାନେ ଉତ୍କଣ୍ଠାର ସହ ଚାହିଁ ରହୁଥିବା ବେଳେ ଅନେକ ଶ୍ରଦ୍ଧାଳୁ ମା’ଙ୍କ ହାକେରା ପ୍ରସାଦ ଖାଇବାରୁ ବଞ୍ଚିତ ହେଉଥିବା ଅଭିଯୋଗ ହେଉଛି । ହେଲେ ମନ୍ଦିର ପ୍ରଶାସନ , ପଣ୍ଡା ସେବାୟତ ଏବଂ ଟ୍ରଷ୍ଟର କର୍ମକର୍ତ୍ତା ଏଭଳ ଅଭିଯୋଗକୁ ଖଣ୍ଡନ କରିଛନ୍ତି । ପୂର୍ବଭଳି ଏହି ପ୍ରଥା ପରଂପରା ଚାଲିଥିବା କହିଛନ୍ତି ।
ଦ୍ବିତୀୟ ପର୍ଯ୍ୟାୟ ଷୋଳପୂଜା ଅବସରରେ ଆଜି ପ୍ରତ୍ୟୁଷରେ ମା’ଙ୍କର ମାର୍ଜନା , ସୁବାସିତ ଜଳରେ ମହାସ୍ନାନ ଓ ନବ ପାଟବସ୍ତ୍ର ପରିଧାନ ନୀତି ସଂପନ୍ନ ହୋଇଥିଲା । ଏହାପରେ ଆଳତି ଏବଂ ବାଳଭୋଗ ନୈବେଦ୍ୟ ହୋଇଥିଲା । ମଧ୍ୟାହ୍ନରେ ଶଙ୍ଖୁଡ଼ି ଧୂପ ହୋଇଥିଲା । ଆଜିଠାରୁ ନବରାତ୍ର ପୂଜା ମଧ୍ୟ ଆରମ୍ଭ ହୋଇଛି । ଆଉ ଗୋଟିଏ ବଡ଼ କଥା ହେଉଛି ଅଷ୍ଟମୀ ଦିନ ବିଳମ୍ବିତ ରାତିରେ ମା’ଙ୍କ ପାଖରେ ପୋଡ଼ାମାଛ ବଳି ଚଢ଼ାଯିବା ଅନ୍ୟତମ ମୁଖ୍ୟ ପରଂପରା ବୋଲି ବରିଷ୍ଠ ସେବାୟତ ରଘୁନାଥ ମହାପାତ୍ର ସୂଚନା ଦେଇଛନ୍ତି । ସେହିପରି ୮ମୀ ପର୍ଯ୍ୟନ୍ତ ପ୍ରତ୍ୟୁଷରେ ଓ ଅପରାହ୍ନରେ ସ୍ନାନ ନୀତି ସଂପନ୍ନ ହୁଏ । ମା’ଙ୍କୁ ବିଭିନ୍ନ ପୁଷ୍ପରେ ସଜାଯିବା ସହ ମୁଖା , ଚକ୍ଷୁ , କିରିଟି , ଚୂଡ଼ି , ମଥାମଣୀ ଓ ଘାଗରା ଆଦି ସୁନା ଓ ରୂପା ଅଳଙ୍କାରରେ ଆଭୂଷଣ କରାଯାଇଥାଏ । ବାଲିଅନ୍ତା ପଞ୍ଚାୟତ ମା’ ଉତ୍ତରମୁଖୀ ପୀଠ , ବାଳକାଟିସ୍ଥିତ ଦୁଲ୍ଲାଦେବୀ ମନ୍ଦିର , ଟଙ୍କପାଣି ଠାକୁରାଣୀଙ୍କ ଓ ସରକଣାସ୍ଥିତ ଭଗବତୀଙ୍କ ପୀଠରେ ଅନୁରୂପ ଭାବେ ଷୋଳପୂଜା ଚାଲିଛି ।