୬ଲକ୍ଷ ଟଙ୍କାର ସୁନା ଅଟୋରେ ଛାଡ଼ି ଆସିଲେ ମହିଳା, ତା’ପରେ……
ଚେନ୍ନାଇ : ସଚ୍ଚୋଟପଣିଆ ବୋଲି ଏ ସମାଜରେ କିଛି ନାହିଁ ବୋଲି ଅନେକ ଥର ଲୋକେ କହୁଥିବାର ଆମେ ଶୁଣିଥାଉ । କୌଣସି ଅପ୍ରୀତିକର ଘଟଣା ଘଟିଲେ ଏହି ଶବ୍ଦର ମାନେ ଲୋକେ ଭୁଲି ଗଲେଣି ବୋଲି ମନକୁ ଆସିଥାଏ । କିନ୍ତୁ ଅନେକ ସମୟରେ କିଛି ଏଭଳି ଘଟଣା ଘଟିଥାଏ, ଯାହା ମାନବିକତା ଓ ସଚ୍ଚୋଟପଣିଆ ଭଳି ଶବ୍ଦ ସମାଜରେ ବଞ୍ଚି ରହିଛି ବୋଲି ବିଶ୍ୱାସ ଆସି ଯାଇଥାଏ । ପୂର୍ବରୁ ଜଣେ ଅଟୋ ଚାଳକ ଆଇଫୋନ ଫେରାଇବା ଘଟଣା ଚର୍ଚ୍ଚାରେ ରହିଥିବା ବେଳେ ଏବେ ଜଣେ ଅଟୋ ଚାଳକ ମହିଳାଙ୍କୁ ସେ ଛାଡ଼ି ଯାଇଥିବା ସୁନା ଫେରାଇଥିବା ଜଣାପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ଚେନ୍ନାଇର ଜଣେ ଅଟୋ ଚାଳକ ୬ଲକ୍ଷ ଟଙ୍କାର ସୁନା ଫେରାଇବା ଘଟଣା ସଚ୍ଚୋଟପଣିଆ ଏବେ ବି ସମାଜରେ ଜୀବିତ ରହିଥିବା ପ୍ରମାଣ କରିଛି । ସୂଚନା ମୁତାବକ, ତେନାମ୍ପେଟର କମରାଜନଗରରେ ରହୁଥିବା ବିଜୟଲକ୍ଷ୍ମୀ ସଲିଗ୍ରାମମ୍କୁ ଏକ ବିବାହରେ ଯୋଗ ଦେବା ପାଇଁ ଯାଇଥିଲେ । ଯାତ୍ରା ସମୟରେ ସୁନା ପିନ୍ଧିବାକୁ ସୁରକ୍ଷିତ ମନେ ନ କରି ସେ ସବୁ ସୁନା କାଢ଼ିଦେବା ସହ ନିଜ ବ୍ୟାଗ୍ରେ ରଖି ଦେଇଥିଲେ । ସଂନ୍ଧ୍ୟା ୬ଟାରେ ସେ ଉଦୟକୁମାରଙ୍କ ଅଟୋରେ ବସିଥିଲେ । ଗନ୍ତବ୍ୟସ୍ଥଳରେ ପହଞ୍ଚିବା ପରେ ସେ ସୁନା ରଖିଥିବା ବ୍ୟାଗ୍ଟି ଅଟୋରେ ଛାଡ଼ି ଚାଲି ଯାଇଥିଲେ । କିଛି ବାଟ ଯିବା ପରେ ଅଟୋରେ ବସିଥିବା ଆଉ ଜଣେ ଯାତ୍ରୀ ବ୍ୟାଗ୍ ଦେଖି ଉଦୟକୁମାରଙ୍କୁ ଜଣାଇଥିଲେ । ଯାହା ପରେ ଉଦୟକୁମାର ବିଜୟଲକ୍ଷ୍ମୀଙ୍କୁ ଛାଡ଼ିଥିବା ବିବାହ ମଣ୍ଡପରେ ପହଞ୍ଚି ତାଙ୍କୁ ସୁନା ଥିବା ବ୍ୟାଗ୍ ଫେରାଇଥିଲେ ।