ଜେଲରେ ବାପା ସହ ରହୁଥିଲା କୁନି ଝିଅ, ଜିଲ୍ଲାପାଳ ଜେଲରୁ ଆଣି ଦେଲେ ନୂଆ ଭବିଷ୍ୟତ
ବିଳାସପୁର: ଜିଲ୍ଲା ପାଇଁ ଅନେକ ବିକାଶମୂଳକ କାର୍ଯ୍ୟର ଦାୟିତ୍ୱ ଜଣେ ଜିଲ୍ଲାପାଳଙ୍କୁ ଦିଆଯାଇଥାଏ | ଆଉ ଆପଣ ମଧ୍ୟ ନିଜ ଜିଲ୍ଲାର ଜିଲ୍ଲାପାଳଙ୍କୁ ଜାଣିଥିବେ | କିନ୍ତୁ ଆଜି ଆମେ ଆପଣଙ୍କୁ ଏମିତି ଏକ ଜିଲ୍ଲାପାଳଙ୍କ କାହାଣୀ କହିବୁ ଯିଏ ଜଣେ କୁନି ଝିଅର ଭବିଷ୍ୟତ ସଜାଡିବାରେ ଲାଗିପଡିଛନ୍ତି | ଝିଅଟିକୁ ସହରର ସବୁଠାରୁ ଭଲ ସ୍କୁଲରେ ପଢ଼ାଇବା ସହ ତାହାର ସମସ୍ତ ଭରଣପୋଷଣ ଦାୟିତ୍ୱ ନିଜେ ନେଇଛନ୍ତି |
Sambad is now on WhatsApp
Join and get latest news updates delivered to you via WhatsApp
ଛତିଶଗଡ଼ ବିଳାସପୁରର ଜିଲ୍ଲାପାଳ ଡ. ସଞ୍ଜୟ ଅଲଂଗ ଯେତେବେଳେ କେନ୍ଦ୍ରୀୟ ଜେଲର ନିରୀକ୍ଷଣ କରିବାକୁ ଯାଇଥିଲେ, ସେତେବେଳେ ସେ ଦେଖିଥିଲେ ଯେ ୬ ବର୍ଷର କୁନି ଝିଅଟିଏ ନିଜ ବାପାଙ୍କୁ ଜାବୁଡି ଧରି କାନ୍ଦୁଥିଲା | ଜିଲ୍ଲାପାଳ ଏହି ଦୃଶ୍ୟ ଦେଖି ଯେତେବେଳେ ଝିଅଟି କିଏ ବୋଲି ପଚାରିଥିଲେ ସେତେବେଳେ ଜାଣିବାକୁ ପାଇଥିଲେ ଯେ କୁନି ଝିଅଟିର ବାପା ଏକ ଅପରାଧରେ ସଜ୍ଜା କାଟୁଛନ୍ତି | ଝିଅଟିକୁ ଯେତେବେଳେ ମାତ୍ର ୧୫ ଦିନ ହୋଇଥିଲା, ସେତେବେଳେ ତାହାର ମା’ ଙ୍କର ମୃତ୍ୟୁ ହୋଇଯାଇଥିଲା | କୁନି ଝିଅଟିର ଲାଳନପାଳନ ପାଇଁ ଘରେ କେହି ନଥିବାରୁ ଜନ୍ମହେବାର ୧୫ ଦିନ ପରଠାରୁ ସେ ଜେଲରେ ରହିଆସୁଥିଲା |
ଜିଲ୍ଲାପାଳ ସଞ୍ଜୟ ଅଲଂଗ ତୁରନ୍ତ ଝିଅର ବାପାଙ୍କୁ ଭେଟିଥିଲେ ଓ ଝିଅଟିର ଭବିଷ୍ୟତ ଗଢିବାକୁ ପ୍ରତିଶୃତି ଦେଇଥିଲେ | କଏଦୀ ଜଣକ ରାଜି ହେବାରୁ ସେ ଝିଅଟିକୁ ନିଜ କାରରେ ବସାଇ ନେଇଆସିଥିଲେ | ୬ ବର୍ଷର ଝିଅଟିକୁ ସହରର ସବୁଠାରୁ ଭଲ ସ୍କୁଲ ଜୈନ ଇଣ୍ଟରନ୍ୟାସନାଲରେ ଆଡ଼ମିସନ କରାଇବା ସହ ହଷ୍ଟେଲରେ ମଧ୍ୟ ଆଡ଼ମିସନ କରାଇଛନ୍ତି | ଝିଅଟି ପାଇଁ ସ୍ୱତନ୍ତ୍ର କେଆରଟେକରର ବ୍ୟବସ୍ଥା କରାଇ ତାହାର ସମସ୍ତ ଖର୍ଚ୍ଚ ଉଠାଇବାକୁ ନିଷ୍ପତ୍ତି ନେଇଛନ୍ତି |