ମହିଳା ବିରୋଧୀ ହିଂସା ନିବାରଣ ଦିବସ ଆଜି

ଆଜି ହେଉଛି ଆନ୍ତର୍ଜାତିକ ମହିଳା ବିରୋଧୀ ହିଂସା ନିବାରଣ ଦିବସ। ସମଗ୍ର ପୃଥିବୀରେ ମହିଳାମାନେ ସମ୍ମୁଖୀନ ହେଉଥିବା ହିଂସା ସମ୍ପର୍କରେ ସଚେତନା ସୃଷ୍ଟି କରିବା ଏବଂ ତାହାକୁ ଶେଷ କରିବା ପାଇଁ ଉପାୟ ଖୋଜିବା ସହ ହିଂସା ଭୋଗୁଥିବା ଲୋକଙ୍କୁ ଆବଶ୍ୟକ ସହାୟତା ପ୍ରଦାନ କରିବା ପାଇଁ ଏହା ଏକ ଗୁରୁତ୍ବପୂର୍ଣ୍ଣ ଅବସର। ସାରା ବିଶ୍ବରେ ମହିଳାମାନଙ୍କ ପ୍ରତି ହେଉଥିବା ଅତ୍ୟାଚାର ଏକ ବଡ଼ ସମସ୍ୟା। ଘରୋଇ ହିଂସା ଅବା ଯୌନ ହିଂସା ଅବା ହତ୍ୟା, ସବୁଠି ମହିଳାମାନେ ଉତ୍ପୀଡ଼ନ ଓ ସମସ୍ୟାର ସମ୍ମୁଖୀନ ହେଉଛନ୍ତି। ୧୯୭୯ ମସିହାରେ ମିଳିତ ଜାତିସଂଘର ସାଧାରଣ ପରିଷଦରେ ମହିଳାଙ୍କ ପ୍ରତି ସମସ୍ତ ପ୍ରକାର ବୈଷମ୍ୟ ଦୂରୀକରଣ ଚୁକ୍ତି ଗୃହୀତ ହୋଇଥିଲା। ତଥାପି ମହିଳାମାନଙ୍କ ପ୍ରତି ହିଂସା ଜାରି ରହିଛି।

୧୯୮୧ ମସିହାରୁ ମହିଳା ଅଧିକାର କର୍ମୀମାନେ ପ୍ରତିବର୍ଷ ନଭେମ୍ବର ୨୫ ତାରିଖକୁ ଆନ୍ତର୍ଜାତିକ ମହିଳା ବିରୋଧୀ ହିଂସା ନିବାରଣ ଦିବସ ଭାବେ ପାଳନ କରି ଆସୁଛନ୍ତି। ୨୦୦୮ ମସିହାରେ ମହିଳା ହିଂସାର ଅନ୍ତ ଘଟାଇବା ଲାଗି ଜନ ସଚେତନତା ଓ ନୀତି ନିର୍ଦ୍ଧାରଣରେ ବୃଦ୍ଧି ଆଦି ପଦକ୍ଷେପ ନିଆଯାଇଥିଲା। କୋଭିଡ୍‌-୧୯ ମହାମାରୀ ଏକ ଆଖିଦୃଶିଆ ଘଟଣା ଥିଲା ଯେଉଁ ସମୟରେ ମହିଳାଙ୍କ ପ୍ରତି ହିଂସା ବୃଦ୍ଧି ପାଇଥିଲା। ତେଣୁ ଲିଙ୍ଗ ନିର୍ବିଶେଷରେ ସମସ୍ତଙ୍କ ପାଇଁ ସୁରକ୍ଷିତ ସ୍ଥାନ ସୃଷ୍ଟି କରିବା ଲାଗି ଆମକୁ ହାତ ମିଳାଇ ମହିଳା ବିରୋଧୀ ହିଂସାକୁ ରୋକିବାର ସମୟ ଆସିଛି। ଚଳିତ ବର୍ଷ ଏହି ଦିବସ ପାଳନର ବୈଶ୍ବିକ ପ୍ରସଙ୍ଗ ହେଉଛି: ‘ଏକଜୁଟ ହୁଅନ୍ତୁ! ମହିଳା ଓ ବାଳିକାମାନଙ୍କ ବିରୋଧରେ ହିଂସାକୁ ରୋକିବାରେ ନିବେଶ କରନ୍ତୁ’।