ପତ୍ନୀଙ୍କ ହାତରୁ ମେହେନ୍ଦି ଲିଭିନଥିଲା, ନକ୍ସଲଙ୍କ ଗୁଳିରେ ଦେଶ ପାଇଁ ସହିଦ ହୋଇଗଲେ ସବଇନ୍ସପେକ୍ଟର ଦୀପକ
ସୁକମା: ଆଖିବୁଜା ଗୁଳି ବର୍ଷୁଥିଲା, ଆଉ ନିଜ ସାଥି ଯବାନଙ୍କ ମନୋବଳ ବଢାଇବାକୁ ଦେଶପ୍ରେମର ଗୀତ ଗାଉଥିଲେ ଯବାନ ଦୀପକ ଭରଦ୍ୱାଜ | ନିଜ ସାଥିଙ୍କୁ ବଞ୍ଚାଉ ବଞ୍ଚାଉ ନକ୍ସଲଙ୍କ ଆଇଡି ବିସ୍ଫୋରଣରେ ସହିଦ ହୋଇଯାଇଛନ୍ତି ସବଇନ୍ସପେକ୍ଟର ଦୀପକ ଭରଦ୍ୱାଜ | ଆଜି ଆମେ ଆପଣଙ୍କୁ ଛତିଶଗଡ଼ ମାଓ ହମଲାର ଏଭଳି ଜଣେ ଯବାନଙ୍କ କାହାଣୀ କହିବୁ ଯାହାକି ଆପଣଙ୍କୁ ଭାବବିହ୍ୱଳ କରିଦେବ | ବାସ୍କେଟବଲ ଖେଳିବା ଓ ଗୀତ ଗାଇବା ଦୀପକଙ୍କର ରୁଚି ଥିଲା | ୨୦୧୯ ମସିହାରେ ତାଙ୍କର ବିବାହ ହୋଇଥିଲା | ଆଉ ଅନେକ ମାଓ ବିରୋଧୀ ଅପରେସନକୁ ସଫଳତାର ସହ ସମ୍ପନ୍ନ କରିଥିଲେ ଦୀପକ |
Sambad is now on WhatsApp
Join and get latest news updates delivered to you via WhatsApp
ଶନିବାର ଦିନ ଯେତେବେଳେ ସର୍ଚ୍ଚ ଅପରେସନରେ ଯାଇଥିଲେ ସେତେବେଳେ ନକ୍ସଲ ଆଖିବୁଜା ଗୁଳି ଚଳାଇଥିଲେ | ନିଜର ସାଥି ଯବାନମାନେ ଆହତ ହୋଇଥିବାବେଳେ ସଫଳତାର ସହ ନକ୍ସଲଙ୍କୁ ମଧ୍ୟ ମୁକାବିଲା କରିଥିଲେ | ଦୀପକଙ୍କ ବାପା କହିଛନ୍ତି ଯେ ଶେଷ ଥର ପାଇଁ ହୋଲି ସମୟରେ ସେ କଥା ହୋଇଥିଲେ |
ସେପ୍ଟେମ୍ବର ୬, ୧୯୯୦ ମସିହାରେ ଜନ୍ମଗ୍ରହଣ କରିଥିବା ଦୀପକ ୨୦୧୩ ମସିହାରେ ମାତ୍ର ୨୩ ବର୍ଷ ବୟସରେ ଛତିଶଗଡ଼ ପୁଲିସରେ ଯୋଗ ଦେଇଥିଲେ | ଆଉ ନିଜର ଦାୟିତ୍ୱ ପ୍ରତି ନିଷ୍ଠା ଯୋଗୁଁ ତାଙ୍କୁ ସ୍ପେଶାଲ ଟାସ୍କଫୋର୍ସରେ କାମ କରିବାର ସୁଯୋଗ ମିଳିଥିଲା | ମାଓ ବିରୋଧୀ ଅପରେସନରେ ବଡ ବଡ ଦାୟିତ୍ୱ ତାଙ୍କୁ ଦିଆଯାଉଥିଲା | ସୂଚନା ଥାଉ କି ଗତ ଶନିବାର ଦିନ ସୁକୁମାର ବିଜେପୁର ଜଙ୍ଗଲରେ ମାଓବାଦୀଙ୍କ ସହ ଗୁଳିବିନିମୟରେ ୨୨ ଜଣ ଯବାନ ସହିଦ ହୋଇଯାଇଥିଲେ ଆଉ ସେମାନଙ୍କ ମଧ୍ୟରେ ଦୀପକ ଭରଦ୍ୱାଜ ମଧ୍ୟ ଥିଲେ |