ସେଲୁନର କାଚ ଭାଙ୍ଗି ଭିତରକୁ ପଶି ଆସିଲା ହରିଣ, ଭିଡିଓରେ ଦେଖନ୍ତୁ ସେ ସମୟର ଦୃଶ୍ୟ
ନୂଆଦିଲ୍ଲୀ : ଅନେକ ସମୟରେ ସୋସିଆଲ ମିଡିଆରେ ଅଜବ ଅଜବ ଭିଡିଓ ଭାଇରାଲ ହେଉଥିବାର ଦେଖାଯାଏ । ପୂର୍ବରୁ ଆମେ ଆପଣଙ୍କୁ ସେଭଳି ଭିଡିଓ ଦେଖାଇବା ସହ ପୂରା କାହାଣୀ ଜଣାଇଛୁ । ଏବେ ସେଭଳି ଏକ ହୃଦୟ ଥରାଇଦେବା ଭଳି ଭିଡିଓ ସାମ୍ନାକୁ ଆସିଛି । ଯେଉଁଥିରେ ଏକ ହରିଣ ସେଲୁନର କାଚ ଭାଙ୍ଗି ଭିତରକୁ ପଶି ଆସୁଥିବା ଦେଖାଯାଇଛି । ସେଲୁନରେ ଲାଗିଥିବା ସିସିଟିଭିରେ ପୂରା ଦୃଶ୍ୟ କଏଦ ହୋଇଥିବା ବେଳେ ଭିଡିଓଟି ଏବେ ଭାଇରାଲ ହେବାରେ ଲାଗିଛି ।
Sambad is now on WhatsApp
Join and get latest news updates delivered to you via WhatsApp
ଘଟଣାଟି ନ୍ୟୁୟର୍କରେ ଘଟିଥିବା ବେଳେ ଭାଇରାଲ ଭିଡିଓରେ ଦେଖାଯାଇଛି କି, ଜଣେ ମହିଳା ସୋଫା ଉପରେ ବସି କେଶ କାଟିବା ପାଇଁ ଅପେକ୍ଷା କରିଛନ୍ତି । ଆଉ ଜଣେ ମହିଳା ଜଣେ ଯୁବକଙ୍କ କେଶ କାଟୁଛନ୍ତି । ଏହି ସମୟରେ ରାସ୍ତାରୁ ଏକ ହରିଣ ଦ୍ରୁତ ଗତିରେ ଦଉଡ଼ି ଆସିବା ସହ ସେଲୁନର କବାଟକୁ ଭାଙ୍ଗି ଭିତରକୁ ପଶୁଛି । ସୋଫାରେ ବସିଥିବା ମହିଳାଙ୍କ ଉପରେ ଡ଼େଇଁ ସେ ଭିତରକୁ ପଶୁଛି । ଭିତରେ କିଛି ସମୟ ଭଙ୍ଗାରୁଜା କରିବା ପରେ ସେ ପୁଣି ଥରେ ସେଲୁନର କାଚ ଭାଙ୍ଗି ବାହାରକୁ ଚାଲି ଯାଉଛି । ସେଇ କିଛି ସେକେଣ୍ଡ ମଧ୍ୟରେ ସେଲୁନର ଅନେକ କ୍ଷତି ହୋଇଥିବା ବେଳେ ସୋଫାରେ ବସିଥିବା ମହିଳାଙ୍କୁ ସାମାନ୍ୟ ଆଘାତ ଲାଗିଥିବା ଜଣା ପଡ଼ିଛି ।