ମରୁଡ଼ି ହେବାରୁ କାମ ଖୋଜିବାକୁ ଦୁବାଇ ଚାଲିଗଲେ କୃଷକ, ଜିତିଲେ ୨୮.୫କୋଟି ଟଙ୍କାର ଲଟେରି
ନୂଆଦିଲ୍ଲୀ : କଥାରେ ଅଛି ଭଗବାନ ଯାହାକୁ ଦିଅନ୍ତି, ଛପର ଫାଡ଼ିକି ଦିଅନ୍ତି । ଅନେକ ସମୟରେ ଏହାର ଉଦାହରଣ ଦେଖିବାକୁ ମିଳେ । ଠିକ୍ ସେଭଳି ତେଲେଙ୍ଗାନାର ଜଣେ କୃଷକଙ୍କ ସହ ମଧ୍ୟ ଘଟିଛି । ମରୁଡ଼ି ସମସ୍ୟା ହେତୁ ଘରେ ଖାଇବାକୁ ନଥିବା ବେଳେ ଏବେ ତାଙ୍କୁ ଏକା ସାଙ୍ଗରେ ୨୮.୫କୋଟି ଟଙ୍କା ମିଳିବା ଖବରକୁ ନେଇ ଚର୍ଚ୍ଚା ଆରମ୍ଭ ହୋଇ ଯାଇଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ତେଲେଙ୍ଗାନାରେ ରହୁଥିବା ବିଳାଶ ମରୁଡ଼ି ସମସ୍ୟା ଉପୁଜିବାରୁ କାମ ଖୋଜିବା ପାଇଁ ୨୦୧୪ରେ ଦୁବାଇ ଚାଲି ଯାଇଥିଲେ । ସେଠାରେ କୁଲି କାମ କରି ସେ ନିଜର ପେଟ ପୋଷିବା ସହ ଘରକୁ କିଛି କିଛି ଟଙ୍କା ପଠାଉଥିଲେ । ତେବେ ତାଙ୍କର ଭିଜାର ସମୟ ଅବଧି ସାରି ଆସୁଥିବା ଦେଖି ସେ ୨୦,୦୦୦ଟଙ୍କା ଦେଇ ଏକ ଲଟେରି କିଣିଥିଲେ । ଅନ୍ୟମାନଙ୍କର ଲଟେରି ଜିତିବା କାହାଣୀ ଶୁଣି ବିଳାଶ ଏପରି କରିଥିବା ବେଳେ ଆବୁ ଧାବି ଛାଡ଼ିବା ପୂର୍ବରୁ ତାଙ୍କୁ ଖୁସି ଖବର ମିଳିଥିଲା । ୨୦,୦୦୦ଟଙ୍କାର ଲଟେରି ବଦଳରେ ସେ ୨୮.୫କୋଟି ଟଙ୍କା ଜିତିଥିଲେ । ଘରକୁ ଫେରି ଏ ବିଷୟରେ ପରିବାର ସଦସ୍ୟଙ୍କୁ ଜଣାଇବା ପରେ କେହି ଏହାକୁ ବିଶ୍ୱାସ କରି ପାରି ନଥିଲେ । ବିଳାଶ ଜିତିଥିବା ଟଙ୍କା ଏବେ ତାଙ୍କ ଦୁଇ ଝିଅଙ୍କ ଶିକ୍ଷା ଓ ବିବାହରେ ଲଗାଇବେ ବୋଲି କହିଛନ୍ତି । ସେ ଜିତିଥିବା ଟଙ୍କାରେ ତାଙ୍କର ଆଗାମୀ ଦୁଇ ପିଢ଼ି ଚଳିଯିବେ ବୋଲି କହିଛନ୍ତି ବିଳାଶ ।