ନବଜାତ ପାଇଁ ସବୁଦିନ ବିମାନରେ ଲେହରୁ ଦିଲ୍ଲୀ କ୍ଷୀର ପଠାଉଛି ମା’, ଜାଣନ୍ତୁ କାରଣ
ନୂଆଦିଲ୍ଲୀ: ମା’ ଭଗବାନଙ୍କର ଦ୍ଵିତୀୟ ରୂପ ଅଟନ୍ତି ବୋଲି କୁହାଯାଏ | ନିଜ ପିଲାକୁ କୌଣସି ଅସୁବିଧା ଛୁଇଁବା ପୂର୍ବରୁ ଜଣେ ମା’ ଆଗରେ ଠିଆ ହୋଇ ଅସୁବିଧା ସହ ଲଢେଇ କରିଥାଏ | ମା’ର ମମତା କୌଣସି ଅସମ୍ଭବକୁ ସମ୍ଭବ କରିବାର କ୍ଷମତା ରଖିଥାଏ, ଯାହାର ଏକ ଜ୍ୱଳନ୍ତ ଉଦାହରଣ ଲେହରେ ଦେଖିବାକୁ ମିଳିଛି | ଦିଲ୍ଲୀ ନବଜାତର ଚିକିତ୍ସା ଚାଲିଥିବା ବେଳେ ଲେହରୁ କ୍ଷୀର ପଠାଉଛନ୍ତି ମହିଳା | ଏହା ଶୁଣିବାକୁ ଆଶ୍ଚର୍ଯ୍ୟ ଲାଗୁଥିଲେ ମଧ୍ୟ ସତ | ପ୍ରତିଦିନ ଲେହରୁ ଦିଲ୍ଲୀକୁ ଜନୈକା ମହିଳା ନିଜ କ୍ଷୀର ନବଜାତ ପାଇଁ ପଠାଉଛନ୍ତି |
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ନବଜାତର ଜନ୍ମ ଜୁନ ୧୬ରେ ହୋଇଥିବା ବେଳେ ଜନ୍ମ ପରେ ତାର ଖାଦ୍ୟ ନଳୀ ଏବଂ ନିଶ୍ୱାସ ପ୍ରଶ୍ୱାସ ନେବା ନଳୀ ପରସ୍ପର ସହ ମିଶି ରହିଥିବା ଦେଖିଥିଲେ ଡାକ୍ତର | ଏହା ପରେ ନବଜାତକୁ ତୁରନ୍ତ ଦିଲ୍ଲୀରେ ଥିବା ଏକ ଡାକ୍ତରଖାନା ନେଇ ଅସ୍ତ୍ରୋପଚାର କରିବା ପାଇଁ କହିଥିଲେ ଡାକ୍ତର | ପ୍ରସବ ପରେ ମହିଳାଙ୍କ ଅବସ୍ଥା ଭଲ ନ ଥିବାରୁ ମହିଳାଙ୍କ ଭାଇ ନବଜାତକୁ ଦିଲ୍ଲୀ ନେଇଥିଲେ | ଏହି ଖବର ଶୁଣି ନବଜାତର ବାପା ଜିକମେଟ କର୍ଣ୍ଣାଟକରୁ ଦିଲ୍ଲୀ ଆସିଥିଲେ | ତେବେ ଅସ୍ତ୍ରୋପଚାର ପରେ ନବଜାତ ପାଇଁ ମା’ କ୍ଷୀର ହିଁ ଉପଯୁକ୍ତ ବୋଲି ଡାକ୍ତର କହିବା ପରେ ଜିକମେଟ ଲେହରୁ ଦିଲ୍ଲୀ କ୍ଷୀର ଆଣିବାର ବ୍ୟବସ୍ଥା କରିଥିଲେ |
ତାଙ୍କ କହିବା ମୁତାବକ, ଆମେ ଶିଶୁକୁ ଖାଇବାକୁ ଦେଉଥିବା ପାଉଡର କ୍ଷୀର ପିଲାଙ୍କ ପାଇଁ ପର୍ଯ୍ୟାପ୍ତ ନୁହେଁ | ତେଣୁ ଡାକ୍ତରମାନେ ଆମକୁ ମା’ର କ୍ଷୀର ଦେବାକୁ ଚେଷ୍ଟା କରିବାକୁ ପରାମର୍ଶ ଦେଇଥିଲେ। ପ୍ରଥମେ ଏହା ଚିନ୍ତାର କାରଣ ପାଲଟିଥିବା ବେଳେ ଲଦାଖ ବିମାନବନ୍ଦରରେ ମୋର କିଛି ବନ୍ଧୁ କାମ କରୁଥିବା ମୁଁ ଜାଣିବାକୁ ପାଇଥିଲି | ପରେ ସେମାନଙ୍କ ସହଯୋଗରେ ମୁଁ ବିମାନ ଯୋଗେ ଲେହରୁ ଦିଲ୍ଲୀ କ୍ଷୀର ଆଣିବାରେ ସଫଳ ହେଲି |