ଅର୍ଥ ସୂତ୍ର: ଗୃହ ଋଣ ନେଲାବେଳେ ଧ୍ୟାନ ଦିଅନ୍ତୁ

ନିଜର ଘରଟିଏ କିଣିବା ପାଇଁ ଅନେକେ ବ୍ୟାଙ୍କ୍‌ରୁ ଋଣ ନେଇଥାନ୍ତି। ଅଧିକାଂଶ ଲୋକ କେବଳ ସୁଧ ହାର ଦେଖି ବ୍ୟାଙ୍କ୍‌ ବାଛନ୍ତି। ହେଲେ ତା’ର ନିୟମ ଓ ସର୍ତ୍ତାବଳୀ ପ୍ରତି ଧ୍ୟାନ ନ ଦେଲେ ଲକ୍ଷ ଲକ୍ଷ ଟଙ୍କାର କ୍ଷତି ହୋଇପାରେ। ଏଣୁ ଗୃହ ଋଣ ନେବା ପୂର୍ବରୁ ନିମ୍ନୋକ୍ତ ବିଷୟ ଉପରେ ଧ୍ୟାନ ଦିଅନ୍ତୁ।

 ସୁଧ ହାର-ବିସ୍ତାର ବୁଝନ୍ତୁ: ସ୍ପ୍ରେଡ୍‌ ବା ବିସ୍ତାର ଯେତେ କମ୍ ହେବ, ଶସ୍ତା ଗୃହ ଋଣ ପାଇବାର ସମ୍ଭାବନା ସେତେ ଅଧିକ। ପ୍ରତ୍ୟେକ ବ୍ୟାଙ୍କ୍‌ର ସୁଧ ହାର ଓ ସ୍ପ୍ରେଡ୍‌ ଭିନ୍ନ। ଏହି ସ୍ପ୍ରେଡ୍‌ ସମଗ୍ର ଋଣ ଅବଧି ମଧ୍ୟରେ ପରିବର୍ତ୍ତନ ହୁଏ ନାହିଁ। 
 ଋଣ ପରିମାଣ ଓ ସର୍ତ୍ତାବଳୀ ଯାଞ୍ଚ କରନ୍ତୁ: ବ୍ୟାଙ୍କ୍‌ ଦେଉଥିବା ଋଣ ପରିମାଣ ସମ୍ପତ୍ତିର ମୋଟ୍‌ ମୂଲ୍ୟର କେତେ ପ୍ରତିଶତ ଜାଣିବା ଉଚିତ। ଏହାକୁ ଲୋନ୍‌-ଟୁ-ଭାଲ୍ୟୁ (ଏଲ୍‌ଟିଭି) ଅନୁପାତ କୁହାଯାଏ। ପ୍ରତ୍ୟେକ ବ୍ୟାଙ୍କ୍‌ର ଋଣ ଦେବାର ଭିନ୍ନ ଭିନ୍ନ ନିୟମ ଅଛି। ଯେପରିକି, ଆପଣଙ୍କ ବୟସ, ଚାକିରି, ଆୟ, କ୍ରେଡିଟ୍‌ ସ୍କୋର୍‌ ଇତ୍ୟାଦି। ତେଣୁ ଯୋଗ୍ୟତା ଜାଣିବା ପାଇଁ ବ୍ୟାଙ୍କ୍‌ ୱେବ୍‌ସାଇଟ୍‌ରେ ଥିବା କାଲ୍‌କୁଲେଟର୍‌ ବ୍ୟବହାର କରନ୍ତୁ।
 ପ୍ରିପେମେଣ୍ଟ: ସମୟ ପୂର୍ବରୁ ଋଣ ପରିଶୋଧ କରିବାର ନିୟମ ଜାଣିବା ଜରୁରି। ଅନେକ ବ୍ୟାଙ୍କ୍‌ ପ୍ରତି ମାସରେ ପ୍ରିପେମେଣ୍ଟର ସୁବିଧା ଦେଇଥାନ୍ତି, ଅନ୍ୟ ବ୍ୟାଙ୍କ୍‌ କେବଳ ୩ ମାସ ପରେ ବା ବର୍ଷକୁ ଥରେ ଏହି ସୁଯୋଗ ଦିଅନ୍ତି।
 ଋଣ ପ୍ରକ୍ରିୟାକରଣ ସମୟ: ଯେଉଁ ବ୍ୟାଙ୍କ୍‌ଗୁଡ଼ିକ ଶୀଘ୍ର ଋଣ ଆବେଦନଗୁଡ଼ିକୁ ଅନୁମୋଦନ କରନ୍ତି ଆପଣ ସେଭଳି ବ୍ୟାଙ୍କ୍‌କୁ ବାଛନ୍ତୁ। ଋଣ ପାଇବା ପରେ ମଧ୍ୟ ବ୍ୟାଙ୍କ୍‌ ସେବା ଆବଶ୍ୟକ। ତେଣୁ, ଭଲ ସେବା ଦେବାର ଟ୍ରାକ୍‌ ରେକର୍ଡ ଥିବାପରି ଏକ ବ୍ୟାଙ୍କ୍‌ ବାଛନ୍ତୁ।