ନୂଆଦିଲ୍ଲୀ: ୨୦୨୦ ୟୁପିଏସସି ପରୀକ୍ଷା ଫଳ ପ୍ରକାଶ ପାଇ ସାରିଛି । ଏଥିରେ ୭୬୧ ଜଣ ଆଶାୟୀ ଉତ୍ତିର୍ଣ୍ଣ ହୋଇଛନ୍ତି । ଆଉ ସେମାନଙ୍କ ମଧ୍ୟରେ ଶୁଭମ କୁମାର ଟପ୍ପର ହୋଇଛନ୍ତି । ତେବେ ପ୍ରତି ବର୍ଷ ଦେଶରେ ଏହି ପରୀକ୍ଷା ହୋଇଥାଏ । ଆଉ ଏଥିରେ ପାସ କରିଥିବା ଛାତ୍ରଛାତ୍ରୀ ଦେଶରେ ବଡ ବଡ ଅଫିସର ଭାବେ ନିଯୁକ୍ତି ପାଇଥାନ୍ତି । ତେବେ ଆପଣ ଜାଣିଛନ୍ତି କି କେବେଠୁ ଏହି ପରୀକ୍ଷା ଆରମ୍ଭ ହୋଇଛି? ଆଉ କିଏ ଦେଶର ପ୍ରଥମ ଆଇଏଏସ ଅଫିସର ଥିଲେ? ତେବେ ଆସନ୍ତୁ ଜାଣିବା ଏହାର ଇତିହାସ ।
Sambad is now on WhatsApp
Join and get latest news updates delivered to you via WhatsApp
ୟୁପିଏସସି ଅନୁସାରେ ଇଷ୍ଟ ଇଣ୍ଡିଆ କମ୍ପାନି କୋଭେନାନଟେଡ ସିଭିଲ ସର୍ଭିସ (ସିସିଏସ) ଆରମ୍ଭ କରିଥିଲା। ପରେ ଏହା ଭାରତୀୟ ସିଭିଲ ସର୍ଭିସରେ ପରିଣତ ହେଲା | ୧୮୫୪ ମସିହାରେ ପ୍ରଥମ ଥର ପାଇଁ ପରୀକ୍ଷା ଆରମ୍ଭ ହୋଇଥିଲା ଏବଂ ଏହାର ବୟସ ସୀମା ସେତେବେଳେ ୧୮ରୁ ୨୩ ବର୍ଷ ରଖାଯାଇଥିଲା ।
ରବିନ୍ଦ୍ରନାଥ ଟାଗୋରଙ୍କ ବଡ ଭାଇ ସତ୍ୟେନ୍ଦ୍ରନାଥ ଟାଗୋର ଥିଲେ ଭାରତର ପ୍ରଥମ ଆଇଏଏସ ଅଫିସର । ଯିଏ ୧୮୬୪ ମସିହାରେ ସିଭିଲ ସର୍ଭିସ ପରୀକ୍ଷାରେ ପାସ କରି ଆଇଏଏସ ଅଫିସର ହୋଇଥିଲେ । ଏହାର ପ୍ରସ୍ତୁତି ପାଇଁ ସେ ୧୮୬୨ ମସିହାରେ ଭାରତରୁ ଇଂଲଣ୍ଡ ଯାଇଥିଲେ । ୧୮୬୩ ମସିହାରେ ତାଙ୍କୁ ସାଧାରଣ ସେବା ପାଇଁ ଚୟନ କରାଯାଇଥିଲା । ୧୮୬୪ ମସିହାରେ ନିଜ ଟ୍ରେନିଂ ଶେଷ କରି ସେ ଭାରତକୁ ଫେରିଥିଲେ । ଏହାପରେ ତାଙ୍କୁ ବମ୍ବେ ପ୍ରେସିଡେନ୍ସିରେ ନିଯୁକ୍ତି ଦିଆଯାଇଥିଲା ।
ସତ୍ୟେନ୍ଦ୍ରନାଥ ଟାଗୋରଙ୍କ ଜନ୍ମ ୧୮୪୨ ମସିହା ଜୁନ ୧ ତାରିଖରେ ହୋଇଥିଲା । ହିନ୍ଦୁ ସ୍କୁଲରୁ ପାଠପଢା ଶେଷ କରିବା ପରେ ୧୮୫୭ ମସିହାରେ କୋଲକାତା ବିଶ୍ବବିଦ୍ୟାଳୟ ପାଇଁ ପରୀକ୍ଷା ଦେଇଥିବା ସେ ପ୍ରଥମ ଛାତ୍ର ଥିଲେ। ତାଙ୍କ ବିବାହ ମାତ୍ର ୧୭ ବର୍ଷ ବୟସରେ ହୋଇଥିଲା । ଯେତେବେଳେ ସେ ଆଇଏଏସ ଅଫିସର ହେଲେ ସେତେବେଳେ ତାଙ୍କୁ ୨୧ ବର୍ଷ ହୋଇଥିଲା ।