ଓପନ ହାର୍ଟ ସର୍ଜରି ନ କରି କେବଳ ଛୁଞ୍ଚିର ସହାୟତାରେ ଅସ୍ତ୍ରୋପଚାର କରିଲେ ଡାକ୍ତର !

ଗୁରୁଗ୍ରାମର ଏକ  ଘରୋଇ  ହସ୍ପିଟାଲରେ  ସର୍ଜରି  କରା ନ ଯାଇ  କେବଳ ଏକ  ଛୁଞ୍ଚିର  ସହାୟତାରେ  ଜଣେ  ୮୦ ବର୍ଷୀୟା ବୃଦ୍ଧାଙ୍କର  ହାର୍ଟ  ଭଲ୍‌ଭକୁ  ବଦଳାଯାଇ  ପାରିଛି ।  ସାଧାରଣତଃ  ହାର୍ଟଭଲ୍‌ଭ ବଦଳାଇବା ଲାଗି  ଓପନ ହାର୍ଟ ସର୍ଜରିର  ଆବଶ୍ୟକତା  ପଡିଥାଏ  ଏବଂ  ଏଥିପାଇଁ  ବହୁତ  ସମୟ  ଲାଗିଥାଏ ।

କିନ୍ତୁ  ଏହି  ଘଟଣାରେ ଡାକ୍ତରମାନେ  ବୃଦ୍ଧାକୁ କୌଣସି କଷ୍ଟ ନଦେଇ  କେବଳ ଏକ  ଛୁଞ୍ଚି ସହାୟତାରେ  ମହିଳାଙ୍କର  ଅସ୍ତ୍ରୋପଚାର  ମାତ୍ର ଘଣ୍ଟାକ  ଭିତରେ ଶେଷ  କରିଥିଲେ ।  ଏହା ସଫଳ  ମଧ୍ୟ  ହୋଇଥିଲା ।  ଏହି  ଅସ୍ତ୍ରୋପଚାରକୁ  ଟ୍ରାନ୍ସକେଥେଟର  ମାଇଟ୍ରେଲ୍‌ ଭଲଭ୍‌ ରିପ୍ଳେସ୍‌ମେଣ୍ଟ  ( ଟି ଏମ୍‌ଭି ଆର୍‌ )  ବୋଲି  କୁହାଯାଏ । ଡାକ୍ତରମାନଙ୍କ  ଅନୁଯାୟୀ  ଭାରତରେ  ଏହା ହେଉଛି  ଏହି ଧରଣର ପ୍ରଥମ  ସଫଳ  ଅସ୍ତ୍ରୋପଚାର ।

ହୃଦ୍‌ରୋଗ  ବିଶେଷଜ୍ଞ ଡ ପ୍ରକାଶ  ଚନ୍ଦ୍ରାଙ୍କ  ଅନୁଯାୟୀ ମଧ୍ୟପ୍ରଦେଶର  ୮୦ ବର୍ଷୀୟା ବୃଦ୍ଧାଙ୍କର  ଓପନ ହାର୍ଟ ସର୍ଜରି କରାଯାଇଥିଲେ  ମୃତ୍ୟୁର  ଆଶଙ୍କା  ଅଧିକ ଥିଲା ।  ଏଣୁ  ଟିଏମ୍‌ଭି.ଆର୍‌ ଅସ୍ତ୍ରୋପଚାର କରାଯାଇଥିଲା ।  ଉକ୍ତ ବୃଦ୍ଧାଙ୍କୁ ଅସ୍ତ୍ରୋପଚାରର  ତିନି  ଦିନ ପରେ  ହସ୍ପିଟାଲରୁ  ଡିସଚାର୍ଜ କରାଯାଇଥିବା  ଜଣାଯାଇଛି ।  ସେ ସଂପୂର୍ଣ୍ଣ ସୁସ୍ଥ ଥିବା ଜଣାଯାଇଛି ।