ଫୋକସ୍‌ରେ ଗ୍ୟାଜେଟ୍: ଭାରତୀୟ ବଜାରରେ ଗୁଗଲ୍‌ର ନୂଆ ଫୋନ୍

ଗୁଗଲ୍‌ର ମଧ୍ୟମ ବର୍ଗର ସ୍ମାର୍ଟଫୋନ୍‌ ‘ପିକ୍ସେଲ ୯ଏ’ ନିକଟରେ ଭାରତୀୟ ବଜାରରେ ଉପଲବ୍‌ଧ ହୋଇଛି। ଏହା ଗୁଗଲ୍‌ର ପ୍ରିମିଅମ୍‌ ଫୋନ୍ ଭଳି ଏକ ଟେନ୍‌ସର ଜି୪ ଚିପ୍‌ସେଟ୍‌ ଦ୍ବାରା ପରିଚାଳିତ। ଏହାର ୬.୩ ଇଞ୍ଚର ଆକ୍‌ଚୁଆ ଡିସ୍‌ପ୍ଲେର ବ୍ରାଇଟ୍‌ନେସ୍‌ ୨,୭୦୦ ନିଟ୍‌ସ ଓ ରିଫ୍ରେସ ରେଟ୍‌ ୧୨୦ ହର୍ଜ। ଆଣ୍ଡ୍ରଏଡ୍‌ ୧୫ ଆଧାରିତ ଏହି ଫୋନ୍‌ରେ ୭ ବର୍ଷ ଧରି ଓଏସ୍‌ ଅପ୍‌ଡେଟ୍‌ ମିଳିବ। ଆଇପି୬୮ ରେଟିଂ ଏହାକୁ ପାଣି ଓ ଧୂଳିରୁ ସୁରକ୍ଷିତ ରଖିବ। ଫୋନ୍‌ ପଛରେ ଏକ ୪୮ ମେଗାପିକ୍ସେଲ ମୁଖ୍ୟ କ୍ୟାମେରା ଓ ୧୩ ମେଗାପିକ୍ସେଲ ଅଲ୍‌ଟ୍ରାଵାଇଡ୍‌ କ୍ୟାମେରା ଲାଗିଛି ଏବଂ ସମ୍ମୁଖରେ ୧୩ ମେଗାପିକ୍ସେଲର ଏକ ସେଲ୍‌ଫି କ୍ୟାମେରା ଖଚିତ ହୋଇଛି। ଜେମିନି ଏଆଇ ଫିଚର ସାଙ୍ଗକୁ ଥେଫ୍ଟ ଡିଟେକ୍ସନ୍‌, କାର୍‌ କ୍ରାସ୍ ଡିଟେକ୍ସନ୍‌ ଓ ଫାଇଣ୍ଡ ମାଇଁ ଡିଭାଇସ ଭଳି ବୈଶିଷ୍ଟ୍ୟ ଏହାର କେତେକ ବିଶେଷତ୍ବ।

ଏହାର ୫,୧୦୦ ଏମ୍‌ଏଏଚ୍‌ର ବ୍ୟାଟେରିଟି ସାରା ଦିନ ବ୍ୟବହାର ପାଇଁ ଯଥେଷ୍ଟ। ଏହି ଫୋନ୍‌ର କେବଳ ୮ଜିବି ରାମ୍‌ ଓ ୨୫୬ ଜିବି ମେମୋରି ସଂସ୍କରଣ ଭାରତରେ ଉପଲବ୍‌ଧ, ଯାହାର ମୂଲ୍ୟ ୪୯,୯୯୯ ଟଙ୍କା ରହିଛି। ଇରିସ, ଓବ୍‌ସିଡିଆନ୍‌ ଓ ପୋର୍ସିଲେନ୍‌ ପରି ତିନିଟି ରଙ୍ଗରେ ମିଳୁଥିବା ଏହି ଫୋନ୍‌କୁ ଗ୍ରାହକମାନେ ଫ୍ଲିପକାର୍ଟରୁ ଅନ୍‌ଲାଇନ୍‌ରେ ଅଥବା ରିଲାଏନ୍‌ସ ଡିଜିଟାଲ୍‌, ଟାଟା କ୍ରୋମା ଓ ବିଜୟ ସେଲ୍‌ସ ଭଳି ଷ୍ଟୋର୍‌ରୁ ସିଧାସଳଖ କିଣିପାରିବେ। ଲୋକାର୍ପଣ ଉପହାର ସ୍ବରୂପ କ୍ରେତାମାନେ ନିର୍ଦ୍ଦିଷ୍ଟ ବ୍ୟାଙ୍କ କାର୍ଡ ମାଧ୍ୟମରେ ୩,୦୦୦ ଟଙ୍କା କ୍ୟାସ୍‌ବ୍ୟାକ୍‌ ଓ ଅନ୍ୟାନ୍ୟ ଲାଭ ପାଇପାରିବେ।