ଚୀନା ଫୋନ୍‌ନିର୍ମାତା ରିଅଲ୍‌ମି ଭାରତରେ ମଧ୍ୟମ ବର୍ଗର ଦୁଇଟି ସ୍ମାର୍ଟଫୋନ୍- ‘ରିଅଲ୍‌ମି-୫ ପ୍ରୋ ୫ଜି’ ଓ ‘ରିଅଲ୍‌ମି-୧୫ ୫ଜି’ର ବଜାରପ୍ରବେଶ ଘୋଷଣା କରିଛି। ଉନ୍ନତ କ୍ୟାମେରା ଓ କାର୍ଯ୍ୟଦକ୍ଷତା ବ୍ୟତୀତ ରିଅଲ୍‌ମି-୧୫ ୫ଜି ସିରିଜ୍‌ରେ ୮୦ ଵାଟ୍‌ର ଫାଷ୍ଟ ଚାର୍ଜିଂକୁ ସମର୍ଥନ କରୁଥିବା ୭,୦୦୦ ଏମ୍‌ଏଏଚ୍‌ର ବ୍ୟାଟେରି ଲାଗିଛି। ଉଭୟ ଫୋନ୍‌ରେ ୬.୮ ଇଞ୍ଚର ହାଇପର୍‌ଗ୍ଲୋ ୪ଡି  କର୍ଭ+ ଡିସପ୍ଲେ ରହିଛି, ଯାହାର ରିଫ୍ରେସ୍ ରେଟ୍ ୧୪୪ ହର୍ଜ ଏବଂ ପିକ୍ ବ୍ରାଇଟ୍‌ନେସ୍ ୬,୫୦୦ ନିଟ୍‌ସ। ଚତୁର୍ଥ ପିଢ଼ିର ସ୍ନାପଡ୍ରାଗନ୍‌ ୭ ପ୍ରୋସେସର୍ ଦ୍ବାରା ପରିଚାଳିତ ‘ରିଅଲ୍‌ମି ୧୫ ପ୍ରୋ’ ଫୋନ୍‌ରେ ୧୨ ଜିବି ପର୍ଯ୍ୟନ୍ତ ରାମ୍‌ ଏବଂ ୫୧୨ ଜିବି ଯାଏ ମେମୋରି ରହିଛି। ଏଥିରେ ୫୦ ଏମ୍‌ପିର ଡୁଆଲ୍ କ୍ୟାମେରା ସେଟଅପ୍ ଏବଂ ୫୦ ଏମ୍‌ପିର ସେଲ୍‌ଫି କ୍ୟାମେରା ଲାଗିଛି। ଫ୍ଲୋଇଂ ସିଲଭର, ଭେଲଭେଟ୍ ଗ୍ରିନ୍ ଓ ସିଲ୍କ ପର୍ପଲ୍ ପରି ତିନିଟି ରଙ୍ଗରେ ଉପଲବ୍‌ଧ ଏହି ମଡେଲ୍‌ର ୮ଜିବି ରାମ୍‌ ଓ ୧୨୮ ଜିବି ସଂସ୍କରଣର ମୂଲ୍ୟ ୩୧,୯୯୯ ଟଙ୍କା ଏବଂ ୧୨ ଜିବି ରାମ୍‌ ଓ ୫୧୨ ଜିବି ବିଶିଷ୍ଟ ଶୀର୍ଷ ମଡେଲ୍‌ର ଦାମ୍‌ ୩୮,୯୯୯ ଟଙ୍କା ରଖାଯାଇଛି।

Advertisment

ସେହିପରି ମିଡିଆଟେକ୍‌ ଡିମେନ୍‌ସିଟି ୭୩୦୦+ ଚିପ୍‌ସେଟ୍‌ ଦ୍ବାରା ପରିଚାଳିତ ‘ରିଅଲ୍‌ମି-୧୫’ରେ ୫୦ ଏମ୍‌ପିର ମୁଖ୍ୟ କ୍ୟାମେରା ଓ ୮ ଏମ୍‌ପିର ସେଲ୍‌ଫି କ୍ୟାମେରା ରହିଛି। ଫ୍ଲୋଇଂ ସିଲଭର, ଭେଲ୍‌ଭେଟ୍ ଗ୍ରିନ୍ ଓ ସିଲ୍‌କ ପିଙ୍କ୍ ପରି ତିନିଟି ରଙ୍ଗରେ ମିଳୁଥିବା ଏହି ଫୋନ୍‌ର ୮ ଜିବି ରାମ୍‌ ଓ ୧୨୮ ଜିବି ମେମୋରି ବିଶିଷ୍ଟ ମୂଳ ସଂସ୍କରଣର ମୂଲ୍ୟ ୨୫,୯୯୯ ଟଙ୍କା ଥିବା ବେଳେ ୧୨ ଜିବି ରାମ୍‌ ଓ ୨୫୬ ଜିବି ମେମୋରି ବିଶିଷ୍ଟ ଶୀର୍ଷ ମଡେଲ୍‌ର ଦାମ୍‌ ୩୦,୯୯୯ ଟଙ୍କା ରହିଛି। ୩୦ ତାରିଖରୁ ଫ୍ଲିପ୍‌କାର୍ଟ, ରିଅଲ୍‌ମି ଡଟ୍‌ କମ୍‌ ଓ ମୋବାଇଲ୍‌ ଷ୍ଟୋର୍‌ରେ ଫୋନ୍‌ ଦୁଇଟିର ବିକ୍ରି ଆରମ୍ଭ ହୋଇଛି।