କାନ୍‌ ଫିଲ୍ମ ଫେଷ୍ଟିଭାଲ୍‌ର ରେଡ୍‌ କାର୍ପେଟ୍‌ରେ ଚାଲିବା ପୃଥିବୀର ପ୍ରାୟ ସବୁ ଅଭିନେତା ଓ ସେଲିବ୍ରିଟିମାନଙ୍କର ଏକ ସ୍ବପ୍ନ ଥାଏ। ଜଣେ ଭାରତୀୟ ଫ୍ୟାସନ୍‌ ଇନ୍‌ଫ୍ଲୁଏନ୍‌ସର ଅଭିନବ ଶୈଳୀର ନିଜର ସେହି ସ୍ବପ୍ନ ପୂରଣ କରିଛନ୍ତି। ସେ ହେଉଛନ୍ତି ଦିଲ୍ଲୀର ନାନ୍‌ସି ତ୍ୟାଗୀ। କାନ୍‌ ରେଡ୍‌ କାର୍ପେଟ୍‌ରେ ପଦାର୍ପଣ କରିବା ବେଳେ ପିନ୍ଧିଥିବା ଗୋଲାପି ଗାଉନ୍‌ ପାଇଁ ସେ ଏବେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛନ୍ତି। ସେଲିବ୍ରିଟିମାନେ ସାଧାରଣତଃ ନାମକରା ଡିଜାଇନର୍‌ଙ୍କ ପୋଷାକ ପିନ୍ଧି ରେଡ୍‌ କାର୍ପେଟ୍‌ରେ ଚାଲନ୍ତି। କିନ୍ତୁ ନାନ୍‌ସି ନିଜ ହାତରେ ପ୍ରସ୍ତୁତ ଗାଉନ୍‌ ପିନ୍ଧି କାନ୍‌ ଫିଲ୍ମ ଫେଷ୍ଟିଭାଲ୍‌ରେ ଇତିହାସ ସୃଷ୍ଟି କରିଛନ୍ତି। ଏହାକୁ ବୁଣିବା ପାଇଁ ତାଙ୍କୁ ତିରିଶ ଦିନ ଲାଗିଥିଲା।

Advertisment

ଏଥିପାଇଁ ସେ ୧୦୦୦ ମିଟର କନା ବ୍ୟବହାର କରିଥିଲେ। ତାଙ୍କର ଏହି ପୋଷାକର ଓଜନ ୨୦ କିଲୋଗ୍ରାମ୍‌। ‘ବ୍ରୁଟ୍‌ ଇଣ୍ଡିଆ’ ଦଳର ସଦସ୍ୟା ଭାବେ ନାନ୍‌ସିଙ୍କୁ କାନ୍‌ ରେଡ୍‌ କାର୍ପେଟ୍‌ରେ ପଦାର୍ପଣ କରିବାର ସୁଯୋଗ ମିଳିଥିଲା। ସେ ମୂଳତଃ ଉତ୍ତର ପ୍ରଦେଶର ବାସିନ୍ଦା। ଦ୍ବାଦଶ ପରୀକ୍ଷାରେ ଉତ୍ତୀର୍ଣ୍ଣ ହେବା ପରେ ସେ ଦିଲ୍ଲୀ ଚାଲିଆସିଥିଲେ। ମହାମାରୀ ସମୟରେ ସାମାଜିକ ଗଣମାଧ୍ୟମରେ ତାଙ୍କ ହାତତିଆରି ଡିଜାଇନ୍‌ ଖୁବ୍‌ ଶୀଘ୍ର ଲୋକପ୍ରିୟ ହୋଇଯାଇଥିଲା। ବିଭିନ୍ନ ଫ୍ୟାସନ୍‌ ସାମଗ୍ରୀକୁ ନିଜ ଶୈଳୀରେ ପ୍ରସ୍ତୁତ କରିବାରେ ସେ ପାରଙ୍ଗମ। ତାଙ୍କ ସୃଜନଶୀଳତା ଓ ଫ୍ୟାସନ୍‌ ପ୍ରତି ଉତ୍ସର୍ଗୀକୃତ ମନୋଭାବକୁ ବିଭିନ୍ନ ମହଲରୁ ପ୍ରଶଂସା ମିଳୁଛି। ୟୁଟ୍ୟୁବ୍‌ରେ ତାଙ୍କ ଚ୍ୟାନେଲ୍‌ର ସବ୍‌ସ୍କ୍ରାଇବର୍‌ ସଂଖ୍ୟା ୧ ନିୟୁତ ଟପିସାରିଥିବା ବେଳେ ଇନ୍‌ଷ୍ଟାଗ୍ରାମ୍‌ରେ ତାଙ୍କର ପ୍ରାୟ ୯ ଲକ୍ଷ ୯୪ ହଜାର ଅନୁଗାମୀ ଅଛନ୍ତି।