ମିର୍ଜାପୁର: ବିଦେଶରେ ଦାମୀ ଚାକିରି ପାଇଲେ ବି ମନ ଲାଗୁନଥିଲା | କିଭଳି ନିଜ ଦେଶକୁ ଫେରିବେ ଓ ସମାଜ ପାଇଁ କାମ କରିବେ ସେହି ଚିନ୍ତା ସବୁବେଳେ ତାଙ୍କ ମୁଣ୍ଡକୁ ଆସୁଥିଲା | ଠିକ ସେଥିପାଇଁ ତ ସୁଦୂର ଲଣ୍ଡନର ଲକ୍ଷେ ଟଙ୍କିଆ ଚାକିରି ଛାଡି ଭାରତକୁ ଫେରିଆସିଥିଲେ | ଆଉ ଆପଣ ଜାଣି ଆଶ୍ଚର୍ଯ୍ୟ ହେବେ ଭାରତକୁ ଫେରିବା ପରେ ସେ ସିଭିଲ ସର୍ଭିସ ପରୀକ୍ଷା ପାଇଁ ପ୍ରସ୍ତୁତି ଆରମ୍ଭ କରିଦେଇଥିଲେ | ଆଜି ଆମେ ଆପଣଙ୍କୁ ଉତ୍ତରପ୍ରଦେଶର ମିର୍ଜାପୁର ଜିଲ୍ଲାର ଜିଲ୍ଲାପାଳ ଦିବ୍ୟା ମିତ୍ତଲଙ୍କ ବାବଦରେ କହିବୁ | ଦିବ୍ୟା ମିତ୍ତଲ ପ୍ରଥମେ ଆଇପିଏସ୍ ହୋଇଥିଲେ ଏବଂ ପରବର୍ଷ ଆଇଏଏସ ପରୀକ୍ଷାରେ ଉତ୍ତୀର୍ଣ୍ଣ ହୋଇଥିଲେ। ଆଇଏଏସ୍ ଦିବ୍ୟା ମିତ୍ତଲ ହରିୟାଣାର ରେୱାନି ଜିଲ୍ଲାର ବାସିନ୍ଦା। ଦିବ୍ୟା ମିତ୍ତଲ ଦିଲ୍ଲୀରେ ଜନ୍ମଗ୍ରହଣ କରିଥିଲେ, ଯେଉଁଠାରେ ସେ ଦିଲ୍ଲୀରୁ ପ୍ରାଥମିକ ଶିକ୍ଷା କରିଥିଲେ। ଦ୍ୱାଦଶ ପରୀକ୍ଷାରେ ଉତ୍ତୀର୍ଣ୍ଣ ହେବା ପରେ ଦିବ୍ୟା ମିତ୍ତଲ ଦିଲ୍ଲୀ ଆଇଆଇଟିରୁ ବି.ଟେକ୍ କରିଥିଲେ। ବିଟେକ୍ ପରେ ସେ ଆଇଆଇଏମ୍ ବାଙ୍ଗାଲୋରରୁ ଏମବିଏ କରିଥିଲେ।

Advertisment

ଏମବିଏ ଅଧ୍ୟୟନ ପରେ ଦିବ୍ୟା ମିତ୍ତଲ ଗଗନଦୀପ ସିଂଙ୍କୁ ବିବାହ କରିଥିଲେ। ବିବାହ ପରେ ଗଗନଦୀପ ଏବଂ ଦିବ୍ୟା ମିତ୍ତଲ ଲଣ୍ଡନରେ ଲକ୍ଷ ଲକ୍ଷ ଟଙ୍କା ପ୍ୟାକେଜରେ ଚାକିରି ପାଇଲେ, କିନ୍ତୁ ସେଠାକାର ଜୀବନ ସେମାନଙ୍କୁ ସୁହାଇଲା ନାହିଁ | ଉଭୟ ନିଜ ଦେଶକୁ ଫେରି କିଛି କରିବା ପାଇଁ ସ୍ବପ୍ନ ଦେଖିଥିଲେ | ଏହାପରେ ସ୍ୱାମୀ-ସ୍ତ୍ରୀ ଏକାଠି ଚାକିରିରୁ ଇସ୍ତଫା ଦେଇ ନିଜ ଦେଶକୁ ଫେରିଥିଲେ। ଦେଶକୁ ଫେରିବା ପରେ ଦିବ୍ୟା ମିତ୍ତଲ ଆଇଏଏସ ପାଇଁ ପ୍ରସ୍ତୁତି ଆରମ୍ଭ କରିଥିଲେ। ୨୦୧୨ରେ, ଦିବ୍ୟା ମିତ୍ତଲଙ୍କୁ ଆଇପିଏସ୍ ଭାବରେ ମନୋନୀତ କରାଯାଇଥିଲା, ଯେଉଁଠାରେ ସେ ଗୁଜୁରାଟ କ୍ୟାଡର ପାଇଥିଲେ। ଆଇପିଏସ୍ ଟ୍ରେନିଂ ସମୟରେ, ସେ ୨୦୧୩ରେ ପୁନର୍ବାର ପରୀକ୍ଷା ଦେଇଥିଲେ, ଆଉ ସେ ଆଇଏଏସ ପାଇଁ ମନୋନୀତ ହୋଇଥିଲେ | ଦିବ୍ୟା ମିତ୍ତଲଙ୍କ ସ୍ୱାମୀ ମଧ୍ୟ ଜଣେ ଆଇଏଏସ୍ ଅଧିକାରୀ |