କୁକୁର ଛୁଆକୁ ଘରକୁ ନେବା ପାଇଁ ଘରୋଇ ଜେଟ୍ରେ ପରିବାର ସହିତ ବେଙ୍ଗାଲୁରୁ ପହଞ୍ଚିଲେ ଶିଳ୍ପପତି
ବେଙ୍ଗାଲୁରୁ: କରୋନା ସଂକ୍ରମଣ ରୋକିବା ପାଇଁ ଦେଶରେ ଲକଡାଉନ୍ ଲାଗୁ କରାଯାଇଥିଲା । ଏବେ ଲକଡାଉନ୍ କଟକଣାକୁ ଅନେକ ମାତ୍ରାରେ କୋହଳ କରାଯାଇଛି । ଏହି ସମୟରେ ଜଣେ ଶିଳ୍ପପତି ଓ ତାଙ୍କ ପରିବାର ସହିତ ଏକ କୁକୁର ଛୁଆକୁ ନେବା ପାଇଁ ବେଙ୍ଗାଲୁରୁରେ ପହଞ୍ଚିଥିଲେ।
Sambad is now on WhatsApp
Join and get latest news updates delivered to you via WhatsApp
ଗୋଲ୍ଡନ୍ ରିଟ୍ରିଭର୍ କୁକୁର ଛୁଆକୁ ନେବା ପାଇଁ ଅଟୋମୋବାଇଲ୍ ଶିଳ୍ପର ଜଣେ ଶିଳ୍ପପତି ତାଙ୍କ ପତ୍ନୀ ଓ ପୁଅ ସହିତ ଗତ ଜୁନ୍ ୪ ତାରିଖରେ ଏକ ଘରୋଇ ଚାର୍ଟାର୍ଡ୍ ଫ୍ଲାଇଟ୍ ବୁକ୍ କରିଥିଲେ । ଏଥିରେ ସେମାନେ ମୁମ୍ବାଇରୁ ବେଙ୍ଗାଲୁରୁ ଯାତ୍ରା କରିଥିଲେ।
ସାଥୀରେ ତିନିଜଣ କୋଭିଡ-୧୯ ନେଗେଟିଭ୍ ରିପୋର୍ଟ ବି ନେଇଥିଲେ। କାରଣ ମହାରାଷ୍ଟ୍ରରେ ଯାତ୍ରୀଙ୍କ ପାଇଁ କୋଭିଡ-୧୯ ନେଗେଟିଭ୍ ସାର୍ଟିଫିକେଟ୍ ଆଣିବା ରାଜ୍ୟ ସରକାରଙ୍କ ଦ୍ୱାରା ଅନିବାର୍ଯ୍ୟ କରାଯାଇଛି। ବେଙ୍ଗାଲୁରୁରେ ଶିଳ୍ପପତି ପହଞ୍ଚିବା ପରେ କୁକୁର ଛୁଆଟିକୁ ଧରି ପୁଣି ମୁମ୍ବାଇ ଫେରି ଯାଇଥିଲେ।
ଲକଡାଉନ୍ ସମୟରେ ଶିଳ୍ପପତିଙ୍କର କୁକୁର ପ୍ରତି ସଉକ୍ ବୃଦ୍ଧି ପାଇଥିଲା । ସେ ଯେଉଁ ପ୍ରଜାତିର କୁକୁର ଚାହୁଁଥିଲେ ତାହା ବେଙ୍ଗାଲୁରୁରେ ଥିବା ଜାଣିପାରିଥିଲେ। ତେବେ ଲକଡାଉନ୍ ପାଇଁ କୁକୁରଟିକୁ ବେଙ୍ଗାଲୁରୁରୁ ମୁମ୍ବାଇ ପଠାଯାଇ ପାରି ନଥିଲା । କୁକୁର ପାଳିବାର ନିଶା ଶିଳ୍ପପତିଙ୍କୁ ଏତେ ଘାରିଥିଲା ଯେ ସେ ତାଙ୍କ ପରିବାର ସହିତ ଏକ ଘରୋଇ ଚାର୍ଟାର୍ଡ ଫ୍ଲାଇଟ୍ ବୁକ୍ କରି ମୁମ୍ବାଇରୁ କର୍ଣ୍ଣାଟକ ଯାତ୍ରା କରିଥିଲେ। ବେଙ୍ଗାଲୁରୁରୁ କୁକୁର ଛୁଆକୁ ଧରି ଖୁସିରେ ଘରକୁ ଫେରିଥିଲେ।