ଅନ୍ତର୍ଜାତୀୟ ଅଲିମ୍ପିକ୍‍ ଦିବସ

୧୮୯୪ ମସିହା ଜୁନ୍ ୨୩ ତାରିଖରେ ଅନ୍ତର୍ଜାତୀୟ ଅଲିମ୍ପିକ୍‍ କମିଟି ଗଠନ ହୋଇଥିଲା। ଏହାର ସ୍ମୃତି ରକ୍ଷା ପାଇଁ ୧୯୪୮ ମସିହାରୁ ପ୍ରତି ବର୍ଷ ଜୁନ୍ ୨୩ ତାରିଖକୁ ଅନ୍ତର୍ଜାତୀୟ ଅଲିମ୍ପିକ୍‍ ଦିବସ ରୂପେ ପାଳନ କରାଯାଉଛି। ଏହା କ୍ରୀଡ଼ା ଓ ସ୍ବାସ୍ଥ୍ୟ ପାଇଁ ସମର୍ପିତ। ଏହି ଦିବସ ସୃଷ୍ଟି କରିବାର ମୂଳ ଲକ୍ଷ୍ୟ ହେଲା ବୟସ, ଲିଙ୍ଗ ଓ ଯୋଗ୍ୟତା ନିର୍ବିଶେଷରେ ଖେଳରେ ଭାଗ ନେବା ପାଇଁ ଲୋକଙ୍କୁ ଉତ୍ସାହିତ କରିବା ଏବଂ ଦୈନନ୍ଦିନ ଜୀବନରେ ଖେଳ ଓ ସ୍ବାସ୍ଥ୍ୟର ଗୁରୁତ୍ବ ସମ୍ପର୍କରେ ସଚେତନତା ସୃଷ୍ଟି କରିବା। ଏହି ଦିନ ପ୍ରାୟ ୨୦୫ ଦେଶରେ ଅଲିମ୍ପିକ୍‌ ଦିବସ ଦୌଡ଼ ଆୟୋଜିତ ହୋଇଥାଏ। ତା ସାଙ୍ଗକୁ ବିଭିନ୍ନ କ୍ରୀଡ଼ା ଓ ସାଂସ୍କୃତିକ କାର୍ଯ୍ୟକ୍ରମ, ପ୍ରଦର୍ଶନୀ, ସଂଗୀତ ଓ ଶିକ୍ଷା ସମ୍ପର୍କିତ ଆଲୋଚନାଚକ୍ର ଆଦି ମଧ୍ୟ ଆୟୋଜନ କରାଯାଉଛି। ଏ ବର୍ଷ ଅଲିମ୍ପିକ୍ ଦିବସର ସ୍ଲୋଗାନ୍ ହେଉଛି- ‘ଚାଲ ଚଳମାନ ହେବା।’ ତଥ୍ୟ ଅନୁଯାୟୀ, ଶାରୀରିକ ଓ ମାନସିକ ଭାବେ ସୁସ୍ଥ ରହିବା ଲାଗି ଦୈନିକ ଯେତିକି ଶାରୀରିକ କ୍ରିୟା କରିବା ଉଚିତ, ୮୦% ଯୁବକଯୁବତୀ ସେତିକି କରୁନାହାନ୍ତି। ଏଥିପାଇଁ ଆଜି ଦିନରୁ ସମସ୍ତେ ଚଳପ୍ରଚଳ ହେବା ଲାଗି ସମୟ କାଢ଼ିବା ପାଇଁ ଆହ୍ବାନ କରାଯାଇଛି।