ଜାନୁଆରିର ଜିନିୟସ୍‌

ଇଂରାଜୀ ନବବର୍ଷର ଆରମ୍ଭ ମାସ ଜାନୁଆରି। ପ୍ରତ୍ୟେକ ଆରମ୍ଭକୁ ଆମେ ଶୁଭ ବୋଲି ବିଚାର କରୁ। ତେଣୁ ତା’ସହ ସ୍ବପ୍ନ, ସମ୍ଭାବନା ଓ ସଫଳତାର ଭାବନା ଯୋଡ଼ି ହୋଇ ରହିଥାଏ। ସ୍ବପ୍ନକୁ ସଫଳତାର ରୂପ ଦେଇଥିବା ଅନେକ ରୂପକାର ସିନେମା, ସାହିତ୍ୟ, କ୍ରୀଡ଼ା, ରାଜନୀତି ପରି ବିଭିନ୍ନ କ୍ଷେତ୍ରରେ ରହିଛନ୍ତି। ତେବେ ବର୍ଷର ଆରମ୍ଭ ମାସ ଜାନୁଆରିରେ ଜନ୍ମିତ ବିବିଧ କ୍ଷେତ୍ରରେ ପ୍ରତିଷ୍ଠିତ ଏମିତି କିଛି ଜିନିୟସ୍‌ଙ୍କୁ ନେଇ ଏଥରର ପ୍ରଚ୍ଛଦ ପ୍ରସଙ୍ଗ...
ଉପସ୍ଥାପନା: ରବିବାର ବ୍ୟୁରୋ

ଜାନୁଆରି ମାସରେ ଜନ୍ମିତ ଶିଶୁଙ୍କଠାରେ ସ୍ବଭାବତଃ ନେତୃତ୍ବ, ଉଚ୍ଚାଭିଳାଷ, ସର୍ଜନଶୀଳତା ଭଳି ଗୁଣ ବିଦ୍ୟମାନ ଥାଏ ବୋଲି କୁହାଯାଏ। କେତେକ ଗବେଷଣାଲବ୍ଧ ନିଷ୍କର୍ଷରୁ ଜଣାପଡ଼େ, ଏ ମାସରେ ଜନ୍ମିତ ପିଲାଙ୍କର ଚିନ୍ତନଶକ୍ତି ଯଥେଷ୍ଟ ବିକଶିତ ହୋଇଥାଏ। କେବଳ ଗବେଷଣା କୁହେନାହିଁ, ଏହାର ଅନେକ ଉଦାହରଣ ଓଡ଼ିଶାର କଳା, ସାହିତ୍ୟ, ରାଜନୀତି ପରି ବିବିଧ କ୍ଷେତ୍ରରେ ଦେଖିବାକୁ ମିଳେ। 
ଜନତାଙ୍କ ମନ ଜିଣିଛନ୍ତି ଜାନୁଆରି ଜନ୍ମିତ ନେତା

ଜାନୁଆରିରେ ଜନ୍ମିତ ଅନେକ ରାଜନେତା ଜନତାଙ୍କ ମନ ଜିଣି ନିର୍ବାଚନ ବୈତରଣୀ ପାର ହୋଇ ବହୁବାର ଶାସନ କ୍ଷମତାକୁ ଆସିଛନ୍ତି। ଏହି କ୍ରମରେ ପ୍ରଥମେ ଆସନ୍ତି ଆମ ରାଜ୍ୟର ମୁଖ୍ୟମନ୍ତ୍ରୀ ମୋହନଚରଣ ମାଝୀ। ସ୍ବାଧୀନତାର ୭୫ ବର୍ଷ ପରେ ପ୍ରଥମ ଥର ପାଇଁ ବିଜେପି କ୍ଷମତାସୀନ ହେଉ ହେଉ ଏହାର ଶାସନର ମୁଖ୍ୟ ହୋଇଛନ୍ତି ଆଦିବାସୀ ନେତା ଶ୍ରୀ ମାଝୀ। ୬ ଜାନୁଆରି ୧୯୭୨ରେ ଜନ୍ମିତ ଶ୍ରୀ ମାଝୀ ପ୍ରଥମେ ସରସ୍ୱତୀ ଶିଶୁ ମନ୍ଦିରରେ ଶିକ୍ଷକ ଭାବେ ଚାକିରି ଜୀବନ ଆରମ୍ଭ କରିଥିଲେ ଏବଂ ପରେ ରାଜନୀତିକୁ ଆସି ସରପଞ୍ଚ ହୋଇଥିଲେ। ୨୦୦୫, ୨୦୦୯ ନିର୍ବାଚନରେ କେନ୍ଦୁଝର ବିଧାନସଭା ନିର୍ବାଚନମଣ୍ଡଳୀରୁ ବିଜେପି ପ୍ରାର୍ଥୀ ହୋଇ ନିର୍ବାଚନ ଜିତିଥିଲେ। ଏହାପରେ ୨୦୧୯ ନିର୍ବାଚନ ଓ ଏବେ ୨୦୨୪ ନିର୍ବାଚନ ଜିତି ଶାସନ ମୁଖ୍ୟ ହୋଇପାରିଛନ୍ତି। ୪ ଜାନୁଆରି ୧୯୫୫ରେ ଜନ୍ମିତ ବାଲେଶ୍ବର ସାଂସଦ ପ୍ରତାପ ଷଡ଼ଙ୍ଗୀ ନିଜର ସରଳ ଜୀବନଶୈଳୀ ପାଇଁ ଜାତୀୟସ୍ତରରେ ବେଶ୍ ଚର୍ଚ୍ଚିତ। ୨୦୦୪ ମସିହାରେ ନୀଳଗିରି ବିଧାନସଭା ଆସନରୁ ବିଜେପି ଟିକେଟରେ ନିର୍ବାଚନ ଜିତିଥିବା ବେଳେ ୨୦୦୯ ମସିହାରେ ସେହି ଆସନରୁ ହିଁ ସ୍ବାଧୀନ ପ୍ରାର୍ଥୀ ଭାବେ ଲଢ଼ି ନିଜ ଲୋକପ୍ରିୟତାର ପ୍ରମାଣ ଦେଇଥିଲେ। ଏହାପରେ ୨୦୧୯ ମସିହାରେ ପୁଣି ବିଜେପି ଟିକେଟରୁ ବାଲେଶ୍ବର ଲୋକସଭା ନିର୍ବାଚନ ଜିତି କେନ୍ଦ୍ରମନ୍ତ୍ରୀ ହୋଇଥିଲେ। ୨୦୨୪ରେ ବି ସେ ଲୋକସଭାକୁ ନିର୍ବାଚିତ ହୋଇଛନ୍ତି।

ପୂର୍ବତନ ସାଂସଦ ଅଚ୍ୟୁତ ସାମନ୍ତ ଜଣେ ଶିକ୍ଷାବିତ୍ ଭାବେ ସାରା ଦେଶରେ ବେଶ୍ ଜଣାଶୁଣା। କିଟ୍ ଓ କିସ୍‌  ପ୍ରତିଷ୍ଠା କରି ଓଡ଼ିଶା ତଥା ଭାରତୀୟ ଶିକ୍ଷା ବ୍ୟବସ୍ଥାକୁ ତାଙ୍କର ଅବଦାନ ଉଲ୍ଲେଖନୀୟ। ଶିକ୍ଷା ଓ ସମାଜସେବା ପରେ ସେ ରାଜନୀତିକୁ ଆସି ୨୦୧୯ ମସିହାରେ କନ୍ଧମାଳ ସାଂସଦ ଭାବେ ନିର୍ବାଚିତ ହୋଇଥିଲେ। ସେ ୨୦ ଜାନୁଆରି ୧୯୬୪ରେ ଜନ୍ମଗ୍ରହଣ କରିଥିଲେ। କେନ୍ଦ୍ରାପଡ଼ା ସାଂସଦ ବୈଜୟନ୍ତ ପଣ୍ଡା ଜାତୀୟସ୍ତରର ଜଣେ ଅତି ପରିଚିତ ଚେହେରା। ସେ ଶାସକ ଦଳ ବିଜେପିର ରାଷ୍ଟ୍ରୀୟ ଉପାଧ୍ୟକ୍ଷ ଥିବାବେଳେ ଉଭୟ ରାଜ୍ୟସଭା ଓ ଲୋକସଭାର ସାଂସଦ ଭାବେ ନିର୍ବାଚିତ ହୋଇଛନ୍ତି। ୧୨ ଜାନୁଆରି ୧୯୬୪ରେ ଜନ୍ମିତ ଶ୍ରୀ ପଣ୍ଡା ୨୦୦୦ରୁ ୨୦୦୯ ମସିହାଯାଏ ରାଜ୍ୟସଭା ସାଂସଦ ଭାବେ ବିଭିନ୍ନ ପର୍ଯ୍ୟାୟରେ ନିର୍ବାଚିତ ହୋଇଥିଲେ। ସେହିଭଳି ୨୦୧୪ ଓ ୨୦୨୪ରେ କେନ୍ଦ୍ରାପଡ଼ା ଲୋକସଭା ଆସନରୁ ନିର୍ବାଚନ ଜିତି ନିଜ ଲୋକପ୍ରିୟତାର ପ୍ରମାଣ ଦେଇଛନ୍ତି। 

ରାଉରକେଲା ବିଧାୟକ ସାରଦାପ୍ରସାଦ ନାୟକ ୫ ଜାନୁଆରି ୧୯୫୯ରେ ଜନ୍ମଗ୍ରହଣ କରିଥିଲେ। ରାଉରକେଲାରେ ବାରମ୍ବାର ନିର୍ବାଚନ ଜିତି ସେ ନିଜ କୌଶଳ ଓ ପ୍ରତିଭାର ପ୍ରମାଣ ଦେଖାଇଛନ୍ତି। ସେ ୨୦୦୪, ୨୦୦୯, ୨୦୧୯ ଓ ୨୦୨୪ରେ ବିଧାନସଭା ନିର୍ବାଚନ ଜିତି ନିଜକୁ ରାଜନୀତିରେ ସଫଳ ପ୍ରମାଣିତ କରିଛନ୍ତି। ବିିଭିନ୍ନ ପର୍ଯ୍ୟାୟରେ ସେ ରାଜ୍ୟର ମନ୍ତ୍ରୀ ପଦ ମଧ୍ୟ ସମ୍ଭାଳିଛନ୍ତି। ରାଜ୍ୟ ରାଜନୀତିର ଅନ୍ୟଜଣେ ଅପରାଜେୟ ନେତା ହେଉଛନ୍ତି ପୂର୍ବତନ ମନ୍ତ୍ରୀ ତଥା ବିଧାୟକ ନିରଞ୍ଜନ ପୂଜାରୀ। ୩୧ ଜାନୁଆରି ୧୯୬୧ରେ ଜନ୍ମିତ ଶ୍ରୀ ପୂଜାରୀ ଗତ ୨୪ ବର୍ଷ ହେଲା ୨୦୦୦ ମସିହାରୁ ଲଗାତାର ନିର୍ବାଚନ ଜିତି ତାଙ୍କ ଲୋକପ୍ରିୟତାରେ ଖାଦ ନାହିଁ ବୋଲି ସ୍ପଷ୍ଟ କରିଛନ୍ତି। ଖାଦ୍ୟ ଯୋଗାଣ, ଅବକାରୀ, ଅର୍ଥ, ସଂସଦୀୟ ବ୍ୟାପାର, ସ୍ବାସ୍ଥ୍ୟ ଭଳି ବହୁ ଗୁରୁତ୍ବପୂର୍ଣ୍ଣ ବିଭାଗର ମନ୍ତ୍ରୀ ରହି ସେ ସୂଚାରୁରୂପେ ପ୍ରଶାସନ ପରିଚାଳନା କରି ଦକ୍ଷତା ପ୍ରତିପାଦିତ କରିଛନ୍ତି।  

ପୂର୍ବତନ ଭୁବନେଶ୍ବର ମହାନଗର ନିଗମ ମେୟର୍‌ ତଥା ମଧ୍ୟଭୁବନେଶ୍ବର ବିଧାୟକ ଅନନ୍ତନାରାୟଣ ଜେନା ବି ଜାନୁଆରିରେ ଜନ୍ମିତ ଜଣେ ଲୋକପ୍ରିୟ ନେତା। ୫ ଜାନୁଆରି ୧୯୫୯ ଜନ୍ମିତ ଶ୍ରୀ ଜେନା ପ୍ରଥମେ ୨୦୦୮ରେ ଭୁବନେଶ୍ବର ମହାନଗର ନିଗମ (ବିଏମ୍‌ସି) ନିର୍ବାଚନ ଜିତି ଭୁବନେଶ୍ବର ମେୟର୍‌ ଭାବେ ଦାୟିତ୍ବ ସମ୍ଭାଳିଥିଲେ। ୨୦୧୩ରେ ପୁଣିଥରେ ସେ ବିଏମ୍‌ସି ମେୟର୍‌ ହୋଇଥିଲେ। ୨୦୧୯ ଓ ୨୦୨୪ ନିର୍ବାଚନରେ ସେ ଦୁଇ ଥର ଭୁବନେଶ୍ବର ମଧ୍ୟନିର୍ବାଚନ ମଣ୍ଡଳୀରୁ ବିଧାୟକ ଭାବେ ନିର୍ବାଚିତ ହୋଇ ରାଜଧାନୀରେ ତାଙ୍କ ଲୋକପ୍ରିୟତାର ପ୍ରମାଣ ଦେଇଛନ୍ତି।

ଜାନୁଆରିର ସାହିତ୍ୟିକ
ଓଡ଼ିଆ ଭାଷା ସାହିତ୍ୟ ପ୍ରତି ଅତୁଳନୀୟ ଅବଦାନ ରହିଥିବା ବ୍ୟାସକବି ଫକୀରମୋହନ ସେନାପତି, ଭକ୍ତକବି ମଧୁସୂଦନ ରାଓଙ୍କ ପରି ଅନେକ ଦିଗ୍‌ଗଜ ସ୍ର‌‌ଷ୍ଟାଙ୍କ ଜନ୍ମ ଜାନୁଆରି ମାସରେ। ୧୩ ଜାନୁଆରି ୧୮୪୩ ମସିହା ମକର ସଂକ୍ରାନ୍ତିରେ ବ୍ୟାସକବି ଫକୀରମୋହନଙ୍କ ଜନ୍ମ। ସେ ଥିଲେ ପ୍ରଥମ ଓଡ଼ିଆ ଆଧୁନିକ କ୍ଷୁଦ୍ରଗଳ୍ପ ‘ରେବତୀ’ର ଲେଖକ। ଓଡ଼ିଆ କଥା ସାହିତ୍ୟ ପ୍ରତି ତାଙ୍କର ଅବଦାନ ଅତୁଳନୀୟ। ସେହିପରି ଭକ୍ତକବି ମଧୁସୂଦନଙ୍କ ଜନ୍ମ ୧୮୫୩ ମସିହା ଜାନୁଆରି ୨୯ ତାରିଖ। ଜଣେ ଓଡ଼ିଆ କବି ଓ ଓଡ଼ିଆ ଭାଷାର ପ୍ରଥମ ବର୍ଣ୍ଣବୋଧର ପ୍ରଣେତା ଭାବେ ସେ ଘରେ ଘରେ ପରିଚିତ। ଦିବଂଗତ ଆହୁରି ଅନେକ ସାରସ୍ବତ ସ୍ର‌‌ଷ୍ଟାଙ୍କର ଜନ୍ମ ଜାନୁଆରିରେ। ସାଂପ୍ରତିକ ସମୟର ଅନେକ ଖ୍ୟାତିସଂପନ୍ନ ସ୍ରଷ୍ଟାଙ୍କର ଜନ୍ମ ମଧ୍ୟ ଜାନୁଆରିରେ। ବିଶିଷ୍ଟ ଲେଖିକା ପ୍ରତିଭା ରାୟଙ୍କର ଜନ୍ମ ୨୧ ଜାନୁଆରି ୧୯୪୩ ମସିହାରେ ଜଗତ୍‌ସିଂହପୁର ଜିଲ୍ଲାର ଅଳାବୋଳ ଗ୍ରାମରେ। ଓଡ଼ିଶାର ଘରେ ଘରେ ପରିଚିତ ପ୍ରତିଭା ରାୟ ଜ୍ଞାନପୀଠ ପୁରସ୍କାର ଲାଭ କରିବାରେ ପ୍ରଥମ ଓଡ଼ିଆ ସାହିତ୍ୟିକା। ତାଙ୍କ ପ୍ରଥମ ଉପନ୍ୟାସ ‘ବର୍ଷା, ବସନ୍ତ ଓ ବୈଶାଖ’ ୧୯୭୪ରେ ପ୍ରକାଶ ପାଇ ବେଶ୍‌ ପାଠକୀୟ ଆଦୃତି ଲାଭ କରିଥିଲା। ତାଙ୍କ ରଚିତ ‘ଯାଜ୍ଞସେନୀ’ ପୁସ୍ତକ ଲାଗି ୧୯୯୦ ମସିହାରେ ସେ ଶାରଳା ପୁରସ୍କାର ଓ ୧୯୯୧ ମସିହାରେ ମୂର୍ତ୍ତିଦେବୀ ପୁରସ୍କାର ଲାଭକରିଛନ୍ତି। ପଦ୍ମଶ୍ରୀ, ପଦ୍ମଭୂଷଣ ସହ କେନ୍ଦ୍ର ସାହିତ୍ୟ ଏକାଡେମି, ଓଡ଼ିଶା ସାହିତ୍ୟ ଏକାଡେମି ପୁରସ୍କାର ପରି ଆହୁରି ଅନେକ ସମ୍ମାନ ଓ ସ୍ବୀକୃତି ତାଙ୍କୁ ପ୍ରାପ୍ତ ହୋଇଛି। ଓଡ଼ିଅା ବାଣୀ ଭଣ୍ଡାରକୁ ତାଙ୍କର ସୃଷ୍ଟି ଯେ ସମୃଦ୍ଧ କରିଛି ଏହା ପ୍ରତ୍ୟେକ ଓଡ଼ିଆ ସ୍ବୀକାର କରନ୍ତି।

 ୨୦୦୧ରେ ‘ତନ୍ମୟ ଧୂଳି’ ପାଇଁ କେନ୍ଦ୍ର ସାହିତ୍ୟ ଏକାଡେମି, ୧୯୮୬ରେ ‘ନିମିଷେ ଅକ୍ଷର’ ପାଇଁ ଓଡ଼ିଶା ସାହିତ୍ୟ ଏକାଡେମି, ୧୯୯୨ ‘ଶବରୀ’ ପାଇଁ ଶାରଳା ପୁରସ୍କାର ଲାଭ କରିଥିବା ବିିଶିଷ୍ଟ କବି ପ୍ରତିଭା ଶତପଥୀଙ୍କର ଜନ୍ମ ୧୯୪୫ ମସିହା ଜାନୁଆରି ୧୮ ତାରିଖରେ। କଟକ ଜିଲ୍ଲାର ସତ୍ୟଭାମାପୁରଠାରେ ପ୍ରତିଭାଙ୍କର ଜନ୍ମ। ତାଙ୍କର ପ୍ରଥମ କବିତା ପୁସ୍ତକ ‘ଶେଷ ଜହ୍ନ’ ୧୯୬୨ମସିହାରେ ପ୍ରକାଶିତ ହୋଇଥିଲା। 

୧୯୫୬ ମସିହା ଜାନୁଆରୀ ୪ ତାରିଖରେ ପ୍ରବୀଣ କଥାଶିଳ୍ପୀ ସରୋଜିନୀ ସାହୁଙ୍କର ଜନ୍ମ। କେବଳ ଓଡ଼ିଆ କଥା ସାହିତ୍ୟ ଜଗତରେ ସେ ସ୍ବତନ୍ତ୍ର ସ୍ଥାନର ଅଧିକାରିଣୀ ନୁହନ୍ତି, ଅନେକ ବିଦେଶୀ ତଥା ପ୍ରତିବେଶୀ ଭାଷାର ପାଠକମାନଙ୍କ ମଧ୍ୟରେ ଜଣେ ଅଗ୍ରଣୀ ନାରୀବାଦୀ ଲେଖିକା ଭାବରେ ପରିଚିତ। ତାଙ୍କର ବହୁ ସୃଷ୍ଟି ବିଭିନ୍ନ ଭାଷାରେ ଅନୂଦିତ ହୋଇଛି। ତାଙ୍କର ସାହିତ୍ୟ କୃତି ପାଇଁ ସେ ଓଡ଼ିଶା ସାହିତ୍ୟ ଏକାଡେମୀ ପୁରସ୍କାର, ଶାରଳା ପୁରସ୍କାର ସମେତ ଆହୁରି ଅନେକ ସମ୍ମାନ ଓ ସ୍ବୀକୃତି ଲାଭ କରିଛନ୍ତି। ନିଜ ଗହୀରରେ ନିଜେ, ଅମୃତର ପ୍ରତୀକ୍ଷାରେ, ଚଉକାଠ, ତରଳି ଯାଉଥିବା ଦୁର୍ଗ, ଦୁଃଖ ଅପ୍ରମିତ ପରି ଆହୁରି ଅନେକ ଗଳ୍ପ ସଂକଳନ ଏବଂ ଅସ୍ଥିର ପାଦ, ଗମ୍ଭୀରି ଘର, ବିଷାଦ ଈଶ୍ୱରୀ ପରି ଅନେକ ଉପନ୍ୟାସର ସ୍ରଷ୍ଟା ହେଉଛନ୍ତି ସରୋଜିନୀ ସାହୁ। 

ଜାନୁଆରିରେ ଜନ୍ମିତ ଖେଳାଳି
ଓଡ଼ିଶାର ବହୁ ସଫଳ ଖେଳାଳିଙ୍କର ଜାନୁଆରି ମାସରେ ଜନ୍ମ। ଏକଦା ଭାରତୀୟ କ୍ରିକେଟ୍‌ ଦଳରେ ପ୍ରବେଶର ଦ୍ବାରଦେଶରେ ପହଞ୍ଚିଥିବା ଅଫ୍‌ସ୍ପିନର୍‌ କୁଳମଣି ପରିଡ଼ାଙ୍କ ଜନ୍ମ ଜାନୁଆରି ୫ରେ। ସେ ରେଳବାଇ ପାଇଁ ରଣଜୀ ଟ୍ରଫି ଜିତିଥିଲେ, ଯାହାକି ଓଡ଼ିଶା କ୍ରିକେଟର୍‌ଙ୍କ ଲାଗି ବିରଳ ସଫଳତା ହୋଇ ରହିଛି। ଓଡ଼ିଶା କେବେ ରଣଜୀ ଟ୍ରଫି ଜିତି ନଥିବା ବେଳେ କୁଳମଣି ରେଳବାଇରୁ ରଣଜୀ ଟ୍ରଫି ଜିତିବାର ଗୌରବ ପାଇଛନ୍ତି। ଅନ୍ୟ କିଛି ପ୍ରମୁଖ କ୍ରିକେଟ ଖେଳାଳି ମଧ୍ୟ ଏହି ବର୍ଗରେ ଆସନ୍ତି। ସେମାନଙ୍କ ମଧ୍ୟରୁ ଅଜୟ ବାରିକ (ଜାନୁଆରି ୧୦), ଦୀପକ ବେହେରା (ଜାନୁଆରି ୧୫) ଓ ସୌମ୍ୟରଂଜନ ସ୍ବାଇଁ (ଜାନୁଆରି ୬) ଅନ୍ୟତମ। ସେହିପରି ଆଥ୍‌ଲେଟ୍‌ ପାର୍ବତୀ ସେଠୀ ଓ ରେଣୁବାଳା ମହାନ୍ତଙ୍କ ଜନ୍ମ ଜାନୁଆରି ୧ରେ ହୋଇଥିବା ବେଳେ ଜାନୁଆରି ୭ରେ ଜନ୍ମ ପାର୍ଥସାରଥୀ ପହି। ଭେଟେରାନ୍‌ ଚେସ୍‌ ଖେଳାଳି ଦେବାଶିଷ ଚକ୍ରବର୍ତ୍ତୀ (ଜାନୁଆରି ୧୦), ହକି କୋଚ୍‌ କାଳୁଚରଣ ଚୌଧୁରୀ (ଜାନୁଆରି ୧) ମିଲ୍‌ଟନ୍‌ ଦିଲୁଙ୍ଗ (ଜାନୁଆରି ୨୨) ଓ ଅମୂଲ୍ୟ ବିହାରୀ (ଜାନୁଆରି ୧୨) ମଧ୍ୟ ଏହି ବର୍ଗରେ ସାମିଲ୍‌।  

ଜାନୁଆରି ଓ ସିନେମା 
ଜାନୁଆରି ସତରେ ଏକ ସୃଜନର ମାସ କି ନୁହେଁ ଏହାର ଯଦିଓ କିଛି ବୈଜ୍ଞାନିକ ପ୍ରମାଣ ବା ଅପ୍ରମାଣ ନାହିଁ, ଓଡ଼ିଆ ସିନେମା ଦୁନିଆକୁ ଦେଖିଲେ ଜାନୁଆରି ଓ ସୃଜନଶୀଳତା ଭିତରେ କିଛି ସଂପର୍କ ଥିବାଭଳି ମନେହୁଏ। ଓଡ଼ିଆ ସିନେମାର ଇତିହାସରେ ଅନ୍ୟତମ ସଫଳ ଓ ଲୋକପ୍ରିୟ କଣ୍ଠଶିଳ୍ପୀ ପ୍ରଣବ ପଟ୍ଟନାୟକ ଏବଂ ନିଜ ଅଭିନୟର ଯାଦୁରେ ପିଢ଼ି ପରେ ପିଢ଼ି ଦର୍ଶକଙ୍କର ମନୋରଞ୍ଜନ କରି ଆସୁଥିବା କିମ୍ବଦନ୍ତୀ ହାସ୍ୟ ଅଭିନେତା ଜୟୀରାମ ସାମଲଙ୍କଠାରୁ ଆରମ୍ଭକରି ବର୍ତ୍ତମାନର ଅନ୍ୟତମ ସଫଳ ସଙ୍ଗୀତ ନିର୍ଦ୍ଦେଶକ ଭାବେ ପରିଚିତ ପ୍ରେମ୍‌ ଆନନ୍ଦ ଏବଂ ନୂଆପିଢ଼ିର ଅନ୍ୟତମ ସଫଳ ଓ ଲୋକପ୍ରିୟ ଅଭିନୟ ପ୍ରତିଭା ସ୍ବରାଜ ବାରିକଙ୍କ ପର୍ଯ୍ୟନ୍ତ ଓଡ଼ିଆ ସିନେମାର ଅନେକ ପରିଚିତ ଓ ଦକ୍ଷ କଳାକାରଙ୍କର ଜନ୍ମ ଜାନୁଆରି ମାସରେ। ଜାନୁଆରି ୧ ତାରିଖରୁ ତାଲିକା ଆରମ୍ଭ କରାଯାଉ! ଜାନୁଆରି ୧ ହେଉଛି ଜୟୀରାମ ସାମଲଙ୍କ ଜନ୍ମଦିନ। ଏକ ସମୟ ଥିଲା ଯେତେବେଳେ ଜୟୀଭାଇଙ୍କ ନାଁରେ ଫିଲ୍ମ ଚାଲୁଥିଲା। ତାଙ୍କର ଚାହିଦା ଫିଲ୍ମର ନାୟକ ବା ନାୟିକାଙ୍କଠାରୁ କିଛି କମ୍‌ ନଥିଲା। ଓଡ଼ିଆ ଫିଲ୍ମକୁ ତାଙ୍କର ଆଜୀବନ ଅବଦାନର ସ୍ବୀକୃତି ସ୍ବରୂପ ନିକଟରେ ଓଡ଼ିଆ ସିନେମାର ସବୁଠୁ ବଡ଼ ସମ୍ମାନ ‘ମୋହନ ସୁନ୍ଦର ଦେବ ଗୋସ୍ବାମୀ ପୁରସ୍କାର’ ପ୍ରଦାନ କରାଯାଇଛି। ତାଙ୍କ ପଛକୁ ପଛ ଭର୍ସାଟାଇଲ୍‌ ଗାୟିକା ତପୁ ମିଶ୍ରଙ୍କ ଜନ୍ମ ଜାନୁଆରି ୧୧ରେ। ଅଭିନେତାରୁ ନେତା ହୋଇ ବିଜେଡି ଟିକେଟରେ ବର୍ତ୍ତମାନ ରାଜ୍ୟସଭା ସଦସ୍ୟ ଥିବା ମୁନ୍ନା ଖାଁଙ୍କର ଜନ୍ମ ଜାନୁଆରି ୧୩ ତାରିଖରେ। ଅବଶ୍ୟ ଶ୍ରୀ ଖାଁ ଏବେ ଅଭିନୟଠୁ ଦୂରେଇ ଯାଇଛନ୍ତି। ବରିଷ୍ଠ ସଙ୍ଗୀତକାର ଶାନ୍ତନୁ ମହାପାତ୍ରଙ୍କ ଜନ୍ମ ଜାନୁଆରି ୧୬ ତାରିଖରେ।

ସେମିତି ପ୍ରସିଦ୍ଧ ଓ ବରିଷ୍ଠ ଗାୟକ ପ୍ରଣବ ପଟ୍ଟନାୟକଙ୍କ ସହିତ ଅଭିନେତ୍ରୀ ଲିପି ମହାପାତ୍ରଙ୍କର ଜନ୍ମଦିନ ଜାନୁଆରି ୨୦। ୨୦୦ରୁ ଅଧିକ ଫିଲ୍ମରେ ଗୀତ ଗାଇଥିବା ତଥା ଜୟଦେବ ପୁରସ୍କାରପ୍ରାପ୍ତ ଶ୍ରୀ ପଟ୍ଟନାୟକ  ଶ୍ରେଷ୍ଠ ଗାୟକ ଭାବେ ୭ଥର ରାଜ୍ୟ ପୁରସ୍କାର ପାଇଛନ୍ତି। ହେମଲତା, ବାଣୀ ଜୟରାମ, ଏସ୍‌ ଜାନକୀ, ନିର୍ମଳା ମିଶ୍ର, ଭୂପିନ୍ଦର ସିଂହ ଓ ଉଷା ମଙ୍ଗେସକରଙ୍କ ଭଳି ପ୍ରସିଦ୍ଧ କଣ୍ଠଶିଳ୍ପୀମାନଙ୍କ ସହିତ ଗାଇବାର ବିରଳ ଅଭିଜ୍ଞତା ତାଙ୍କର ରହିଛି। ଅଭିନେତା କୁନା ତ୍ରିପାଠୀ ଓ ଅଭିନେତ୍ରୀ ଭୂମିକା ଦାଶଙ୍କର ଜାନୁଆରି ୨୨, ପୁଣି ସଙ୍ଗୀତକାର ପ୍ରେମ୍‌ ଆନନ୍ଦଙ୍କର ଜାନୁଆରି ୨୩ରେ ଜନ୍ମଦିନ। ଅଭିନେତା କୁନା ତ୍ରିପାଠୀଙ୍କୁ ଜଣେ ଅଲ୍‌ରାଉଣ୍ଡର କହିଲେ ଭୁଲ୍‌ ହେବନି। ପୂର୍ବ ବିଜେଡି ସରକାରର ନିକଟ ଥିବା ଶ୍ରୀ ତ୍ରିପାଠୀଙ୍କୁ ୨୦୧୮ରେ ଓଡ଼ିଶା ଚଳଚ୍ଚିତ୍ର ଉନ୍ନୟନ ନିଗମ (ଓଏଫ୍‌ଡିସି)ର ଅଧ୍ୟକ୍ଷ ପଦ ପ୍ରଦାନ କରାଯାଇଥିଲା। ଜାନୁଆରି ୨୪ ତାରିଖରେ ଅଭିନେତା ସ୍ବରାଜ ବାରିକଙ୍କର ଜନ୍ମଦିନ ପଡୁଥିବାବେଳେ ହ୍ୟାଣ୍ଡସମ୍‌ ଅଭିନେତା ସମ୍ବିତ ଆଚାର୍ଯ୍ୟଙ୍କ ଜନ୍ମଦିନ ଜାନୁଆରି ୨୫ ତାରିଖରେ। ଶିଶୁ ଅଭିନେତା ଭାବେ କ୍ୟାରିୟର୍‌ ଆରମ୍ଭ କରିଥିବା ସ୍ବରାଜ ଚଳନ୍ତି ସମୟର ଜଣେ ଲୋକପ୍ରିୟ ନାୟକ। ସେମିତି ଜଣେ ଆକ୍ସନ ହିରୋ ଭାବେ ସମ୍ବିତ ଭଲ ନାଁ କରିଛନ୍ତି। ଏମାନଙ୍କ ସହିତ ଓଡ଼ିଆ ସିନେମା ଜଗତର ଆହୁରି ଅନେକ ପୂର୍ବତନ ତଥା ବର୍ତ୍ତମାନ ସକ୍ରିୟ ଥିବା ବ୍ୟକ୍ତିବିଶେଷ ଜାନୁଆରି ଜନ୍ମିତ। ସମସ୍ତଙ୍କର ତାଲିକା କରାଗଲେ ଖୁବ୍‌ ଦୀର୍ଘ ହେବ।