ବ୍ରିସବେନ୍: ପୃଥିବୀରେ ଏପରି କିଛି ଲୋକ ଅଛନ୍ତି ଯେଉଁମାନଙ୍କୁ ନିଜ ଜୀବନର ପୁରୁଣା ଘଟଣାଗୁଡିକ ସେପରି ଭାବେ ଟିକିନିଖି ମନେ ଅଛି ଯେପରି ଭାବେ ସେଗୁଡିକ ଘଟିଥିଲା । ଏପରି ସଠିକ୍ ଭାବେ ଘଟଣା ଗୁଡିକୁ ମନେ ରଖିବାର ଲକ୍ଷଣକୁ ‘ହାୟର ସୁପିରିୟର ଅଟୋବାୟୋଗ୍ରାଫିକାଲ୍ ମେମୋରି’ ବା ‘ହାଇପରଥଇମେସିଆ’ କୁହା ଯାଇଥାଏ।
Sambad is now on WhatsApp
Join and get latest news updates delivered to you via WhatsApp
ଏମାନଙ୍କ ମଧ୍ୟରୁ ଜଣେ ହେଉଛନ୍ତି ଅଷ୍ଟ୍ରେଲିଆର ବ୍ରିସବେନରେ ରହୁଥିବା ୩୧ ବର୍ଷୀୟ ରେବେକା ଶାରାକ । ରେବେକାଙ୍କୁ ଜାନୁଆରି ୨୦୦୪ ପରଠାରୁ ଆଜି ପର୍ଯ୍ୟନ୍ତ ସବୁ ଦିନର ଘଟଣା ଟିକିନିଖି ମନେ ଅଛି । ତାଙ୍କ ଦିନଚର୍ଯ୍ୟାର ପ୍ରତ୍ୟେକ କଥା ଯେପରିକି ସେ ଏକ ନିର୍ଦ୍ଦିଷ୍ଟ ଦିନରେ କଣ ଖାଇଥିଲେ, କେଉଁଠିକି ଯାଇଥିଲେ, କେଉଁ ପୋଷାକ ପିନ୍ଧିଥିଲେ ଏହି ସମସ୍ତ କଥା ତାଙ୍କର ମନେ ଅଛି । ତେବେ ରେବେକା ଏହାକୁ ଆଶୀର୍ବାଦ ନୁହେଁ ଅଭିଶାପ ମାନନ୍ତି । ସେ କହିଛନ୍ତି ସେ ବି ଅନ୍ୟ ଲୋକମାନଙ୍କ ପରି ଘଟଣାଗୁଡିକୁ ଭୁଲିଯିବାକୁ ଚାହୁଁଛନ୍ତି ।
ରେବେକାଙ୍କୁ ତାଙ୍କର ଏହି ମନେପଡିବାର ଅନନ୍ୟ କଥା ବିଷୟରେ ୨୦୧୧ ମସିହାରେ ଜଣା ପଡିଥିଲା ଯେତେବେଳେ ସେ ମାତାପିତାଙ୍କ ସହ ଏକ ଟିଭି ସୋ ଦେଖୁଥିଲେ । ଏହି ସୋ ଏପରି ଲୋକଙ୍କ ବିଷୟରେ ଥିଲା ଯେଉଁମାନଙ୍କୁ ବର୍ଷ ବର୍ଷ ଧରି ତାଙ୍କର ପ୍ରତ୍ୟେକ କଥା ମନେ ରହେ । ସେତେବେଳେ ରେବେକାଙ୍କୁ ଜଣା ପଡିଥିଲା ଯେ ତାଙ୍କ ସ୍ମୃତିଶକ୍ତି ମଧ୍ୟ ସେଭଳି ।
ପୃଥିବୀସାରା ‘ହାଇପରଥଇମେସିଆ ସିଣ୍ଡ୍ରୋମ’ର ମାତ୍ର ୬୦ ଜଣ ଲୋକ ଅଛନ୍ତି ବୋଲି ଜଣା ପଡିଛି । କାଲିଫର୍ଣ୍ଣିଆ ବିଶ୍ଵବିଦ୍ୟାଳୟର ପ୍ରଫେସର କ୍ରେଗ୍ ଷ୍ଟାର୍କ କହିଛନ୍ତି, ‘ହାଇପରଥଇମେସିଆ’ ଥିବା ଲୋକଙ୍କ ସ୍ମରଣଶକ୍ତିକୁ ‘ଏପିସୋଡିକ ମେମୋରି‘ କୁହାଯାଇଥାଏ ଅର୍ଥାତ୍ ଏହି ଲୋକମାନଙ୍କୁ ଅନ୍ୟ ଲୋକଙ୍କ ଅପେକ୍ଷା ଅଧିକ ସମୟ ପର୍ଯ୍ୟନ୍ତ ଘଟଣାଗୁଡିକ ମନେ ରହିଥାଏ ।
ତେବେ ଏହି ଲୋକମାନଙ୍କର ଅଧିକ ‘ଆଇକ୍ୟୁ‘ ଥିବା ଲୋକଙ୍କ ଭଳି କୌଣସି ବିଷୟରେ ବୈଜ୍ଞାନିକ ଅଥବା ତାର୍କିକ ସ୍ମରଣଶକ୍ତି ନଥାଏ । ରେବେକା କହିଛନ୍ତି, ମୁଁ ଯେତେବେଳେ କୌଣସି ଘଟଣାକୁ ମନେ ପକାଇ ଥାଏ, ମୋତେ ସମ୍ପୂର୍ଣ୍ଣ ଦିନର ସମ୍ପୂର୍ଣ୍ଣ ଦିନଚର୍ଯ୍ୟା ମନେ ପଡି ଯାଇଥାଏ । ଲୋକେ ଏହାକୁ ପ୍ରକୃତିର ବରଦାନ କହି ପାରନ୍ତି କିନ୍ତୁ ଏହା ମୋ ପାଇଁ କୌଣସି ଅଭିଶାପରୁ କମ ନୁହେଁ । ରେବେକା କହିଛନ୍ତି ମୁଁ ମଧ୍ୟ ଭୁଲିଯିବାକୁ ଚାହେଁ । ରେବେକା ପୁଣି କହିଛନ୍ତି ରାତିରେ ଶୋଇବା ସମୟରେ ତାଙ୍କୁ ଅଧିକ ଶବ୍ଦ ଓ ଅଧିକ ଆଲୋକର ଆବଶ୍ୟକତା ପଡିଥାଏ । ଶାନ୍ତ ବାତାବରଣରେ ତାଙ୍କୁ ନିଦ ଆସେ ନାହିଁ । ରେବେକାଙ୍କୁ ମାନସିକ ଅବସାଦ ମଧ୍ୟ ଅଛି ।