ଏହି କାରଣ ପାଇଁ ମାଗଣାରେ କରୋନା ଆକ୍ରାନ୍ତଙ୍କୁ ସେବା ଯୋଗାଉଛନ୍ତି ଅଟୋ ଚାଳକ
ବେଙ୍ଗାଲୁରୁ: କରୋନା ମହାମାରୀ ସମୟରେ ଆମ୍ବୁଲାନ୍ସ ଚାଳକମାନେ ଲୋକଙ୍କୁ ଲୁଟୁଥିବାର ଅନେକ ଖବର ପୂର୍ବରୁ ସାମ୍ନାକୁ ଆସିସାରିଛି | କିଛି ବାଟ ଯିବା ପାଇଁ କରୋନା ରୋଗୀଙ୍କ ପରିବାରଠାରୁ ଆମ୍ବୁଲାନ୍ସ ଚାଳକମାନେ ହଜାର ହଜାର ଟଙ୍କା ନେବାର ଖବର ବିବାଦରେ ରହିଥିବା ବେଳେ କର୍ଣ୍ଣାଟକର ଜଣେ ଅଟୋ ଚାଳକଙ୍କୁ ନେଇ ଏବେ ଚର୍ଚ୍ଚା ଜୋର ଧରିଛି |
Sambad is now on WhatsApp
Join and get latest news updates delivered to you via WhatsApp
ଆମ୍ବୁଲାନ୍ସ ସେବା ଯୋଗାଇବା କାମରେ ନିୟୋଜିତ ନଥିଲେ ମଧ୍ୟ କର୍ଣ୍ଣାଟକର ଅଟୋ ଚାଳକ ପ୍ରଶାନ୍ତ ମାଗଣାରେ କରୋନା ରୋଗୀଙ୍କୁ ସେବା ଯୋଗାଇବା ଖବର ଏବେ ତାଙ୍କୁ ପ୍ରଶଂସାର ପାତ୍ର ବନାଇଛି | ତେବେ ତାଙ୍କ ମା’ କରୋନା ଆକ୍ରାନ୍ତ ହେବା ପରଠାରୁ ସେ ମାଗଣା ଅଟୋ ସେବା ଆରମ୍ଭ କରିଥିବା କହିବା ସହ ଏପର୍ଯ୍ୟନ୍ତ ୫୫ଜଣ ତାଙ୍କ ମାଗଣା ସେବାର ଲାଭ ଉଠାଇ ସାରିଥିବା ସେ କହିଛନ୍ତି |
ତାଙ୍କ କହିବା ମୁତାବକ, ମୋ ମା’ କରୋନା ଆକ୍ରାନ୍ତ ହେବା ପରେ ଯେତେବେଳେ ମୁଁ ମା’ଙ୍କୁ ମାଡିକେରୀ ଡାକ୍ତରଖାନାରେ ଭର୍ତ୍ତି କଲି, ମୁଁ ଦେଖିଲି ଯେ ପରିବହନ ସୁବିଧା ଉପଲବ୍ଧ ନହେବା ହେତୁ ଅନେକ କରୋନା ରୋଗୀ ହନ୍ତସନ୍ତ ହେଉଛନ୍ତି | ଜଣେ ସ୍କୁଲ ଶିକ୍ଷକ ଏବଂ ତାଙ୍କ ପରିବାର, ଯେଉଁମାନେ ମୋ ଘର ପାଖରେ ରୁହନ୍ତି, ସେମାନେ କରୋନା ପଜିଟିଭ୍ ହେବା ପରେ ସେମାନଙ୍କୁ ପ୍ରାୟ ୧୫ କିଲୋମିଟର ଦୂରରେ ଥିବା ମାଡିକେରୀ କୋଭିଡ ହସ୍ପିଟାଲକୁ ନେବାକୁ କେହି ଆଗକୁ ଆସିନଥିଲେ | କେହି ନଆସିବାରୁ ମୁଁ ସେମାନଙ୍କୁ ନେଇ ଡାକ୍ତରଖାନାରେ ଛାଡ଼ିଥିଲି | ଏହା ପରଠାରୁ ମୁଁ ମୋର ଏକ ହ୍ଵାଟ୍ସଆପ ଗ୍ରୁପ ତିଆରି କରି ଲୋକଙ୍କୁ ମାଗଣା ସେବା ଯୋଗାଇବା ଆରମ୍ଭ କଲି |