ମୁମ୍ବାଇ: ୧ ଟଙ୍କାରେ ଜଳଖିଆ, ୧୦ ଟଙ୍କାରେ ମଧ୍ୟାହ୍ନ ଭୋଜନ ମିଳୁଥିବାର କେବେ ଶୁଣିଛନ୍ତି କି? କୌଣସି ସରକାରୀ ଯୋଜନା ବା ମନ୍ଦିର ବା ଗୁରୁଦ୍ୱାରକୁ ଛାଡିଦେଲେ ଆଜିକାର ମହଙ୍ଗା ଯୁଗରେ ଏତେ ଶସ୍ତାରେ କେହି ଖାଦ୍ୟ ଦେଉଥିବାର ହୁଏତ ଆପଣ ଶୁଣିନଥିବେ | କିନ୍ତୁ ମହାରାଷ୍ଟ୍ରରେ ଏବେ ଏମିତି ଏକ ବ୍ୟବସ୍ଥା ଆରମ୍ଭ କରିଛନ୍ତି ଏଠାକାର କିନ୍ନର ସଂଗଠନ | ୬ ସେପ୍ଟେମ୍ବର ୨୦୨୨ରୁ ମହାରାଷ୍ଟ୍ରର କଲ୍ୟାଣ ରେଳ ଷ୍ଟେସନ ନିକଟରେ ଏଭଳି ଏକ ନିଆରା ରୋଷେଇ ଘର 'ଗରିବ କି ଥାଲି' ଆରମ୍ଭ ହୋଇଛି | ଏଠାରେ, ନିକଟସ୍ଥ ଡାକ୍ତରଖାନାକୁ ଚିକିତ୍ସା ପାଇଁ ଆସୁଥିବା ରୋଗୀଙ୍କ ସମ୍ପର୍କୀୟ ଏବଂ ଷ୍ଟେସନ ନିକଟରେ ରହୁଥିବା ଅନେକ ଅଭାବୀ ଲୋକଙ୍କୁ କେବଳ ୧ଟଙ୍କାରେ ସକାଳ ଜଳଖିଆ ଏବଂ ୧୦ ଟଙ୍କାରେ ମଧ୍ୟାହ୍ନ ଭୋଜନ ଏବଂ ରାତ୍ରୀ ଭୋଜନ ଯୋଗାଇ ଦିଆଯାଏ | ପ୍ରଥମ ଦିନରେ ଏହିଠାରେ ପ୍ରାୟ ୨୭୦ ଲୋକ ଖାଦ୍ୟ ଖାଇଥିବାବେଳେ ମାତ୍ର ଗୋଟିଏ ସପ୍ତାହ ମଧ୍ୟରେ, ଏହି ସ୍ଥାନ ଅନେକ ଲୋକଙ୍କ ପାଇଁ ପେଟ ପୁରାଇବାର ଠିକଣାରେ ପରିଣତ ହୋଇଛି | ବଡ କଥା ହେଉଛି ଯେ କୌଣସି ବଡ ଟ୍ରଷ୍ଟ କିମ୍ବା ସରକାରଙ୍କ କୌଣସି ଯୋଜନା ଦ୍ୱାରା ନୁହେଁ, ବରଂ ମୁମ୍ବାଇର ଖ୍ୱାଇସ୍ ଫାଉଣ୍ଡେସନ୍ ଦ୍ୱାରା ଏହା ପରିଚାଳିତ ହେଉଛି।

Advertisment

feeding needy at Garib Ki Thali an initiative by transgender community

ଏହି ସଂସ୍ଥା ୫୦୦୦ କିନ୍ନରଙ୍କ ଏକ ସଂଗଠନ ହୋଇଥିବାବେଳେ ସମସ୍ତ କିନ୍ନରମାନେ ସେମାନଙ୍କର ରୋଜଗାରର କିଛି ଅଂଶ ଜମା କରି ଅଭାବୀ ଲୋକଙ୍କୁ ସାହାଯ୍ୟ କରିବା ପାଇଁ ଏହି ରୋଷେଇ ଘର ଚଳାଉଛନ୍ତି | କରୋନା ଅବଧି ସମୟରେ ଖ୍ୱାଇସ୍ ଫାଉଣ୍ଡେସନର ସଭାପତି ପୁଣମ୍ ଆମ୍ମାଙ୍କ ମନରେ 'ଗରିବ କି ଥାଲି' ଯୋଜନା ଆସିଥିଲା | ସେ କୁହନ୍ତି, “ଆମେ କରୋନା ସମୟରେ ଦେଖିଛୁ ଯେ ଭୋକ ଆଜିର ସବୁଠାରୁ ବଡ ସଙ୍କଟ । ଆମେ ନିଜେ ଆମର ଖାଦ୍ୟ ପାଇଁ ଅନ୍ୟମାନଙ୍କ ଉପରେ ନିର୍ଭର କରୁଥିଲୁ | ସେବେଠାରୁ ଆମେ ଲୋକମାନଙ୍କୁ ସାହାଯ୍ୟ କରିବା ପାଇଁ ଏକ ଉପାୟ ଖୋଜିଥିଲୁ | ଏହି ଚିନ୍ତାଧାରାକୁ ଦୃଷ୍ଟିରେ ରଖି କିନ୍ନର ସଂଗଠନର ସାହାଯ୍ୟରେ ମୁଁ ଏହି ଯୋଜନାକୁ ଆଗକୁ ବଢ଼ାଇ ନେଇପାରିଥିଲି | ତେବେ କେବଳ ଖାଦ୍ୟ ବଣ୍ଟନ କରିବା ନୁହେଁ, ଏହି ସଂଗଠନ ମହାରାଷ୍ଟ୍ରର ପ୍ରାୟ ୪,୦୦୦ ପିଲାଙ୍କୁ ସାହାଯ୍ୟ କରୁଛି। ଆର୍ଥିକ ଅନଟନର ଶିକାର ହେଉଥିବା ଯୁବତୀମାନଙ୍କୁ ବିୟୁଟି ପାର୍ଲର, ଟେଲରିଂ ଏବଂ କମ୍ପ୍ୟୁଟର ତାଲିମ ମଧ୍ୟ ପ୍ରଦାନ କରାଯାଏ, ଯାହାଦ୍ୱାରା ସେମାନେ ମଧ୍ୟ ଆତ୍ମନିର୍ଭରଶୀଳ ହୋଇପାରିବେ | ତେବେ ବର୍ତ୍ତମାନ 'ଗରିବ କି ଥାଲି'କୁ ଲୋକମାନେ ମଧ୍ୟ ସାହାଯ୍ୟ କରୁଛନ୍ତି | ଲୋକମାନେ ରାସନଠାରୁ ଆରମ୍ଭ କରି ପନିପରିବା ଏବଂ ଅନ୍ୟାନ୍ୟ ଜିନିଷ ଦେଉଛନ୍ତି | ସଂଗଠନର ସଦସ୍ୟମାନେ ପ୍ରତିଦିନ ପ୍ରାୟ ୫୦୦ ଲୋକଙ୍କ ପାଇଁ ଖାଦ୍ୟ ପ୍ରସ୍ତୁତ କରାଯାଉଛି |