ଅଧ୍ୟାପକ-ଅଧ୍ୟାପିକାଙ୍କ ବଡ଼ ପଣ: ପାଣ୍ଠି ସଂଗ୍ରହ କରି ୫୦ ଜଣ ଛାତ୍ରଛାତ୍ରୀଙ୍କ କଲେଜ୍ ଫି ଭରିଲେ
ଗାଡାଗ୍: କୋଭିଡ୍-୧୯ ପାଇଁ ଦେଶରେ ଜାରି ହୋଇଥିବା ଲକ୍ଡାଉନ୍ ଯୋଗୁଁ ବହୁପରିବାର ସେମାନଙ୍କର ରୋଜଗାରର ଉତ୍ସ ହରାଇଥିବା ବେଳେ କିଛି ସହୃଦୟ ବ୍ୟକ୍ତିଙ୍କ ଉଦାରତା ଆଶାର କିରଣ ପାଲଟୁଛି । କର୍ଣ୍ଣାଟକର ଗାଡଗ ଜିଲ୍ଲାର ଶିରାହଟ୍ଟୀଠାରେ ଥିବା ଏକ କଲେଜର ଅଧ୍ୟାପକ ଓ ଅଧ୍ୟାପିକାଙ୍କ ମହାନତା ଏବେ ଚାରିଆଡ଼େ ଚର୍ଚ୍ଚା ପାଲଟିଛି। କଲେଜ୍ ଅଧ୍ୟାପକ ଓ ଅଧ୍ୟାପିକାମାନେ ପାଣ୍ଠି ଯୋଗାଡ଼ କରି ୫୦ ଜଣ ପିଲାଙ୍କର ସ୍କୁଲ୍ ଫି ଭରିଛନ୍ତି ବୋଲି ଜାଣିବାକୁ ମିଳିଛି।
ସହରର ଏଫଏମ୍ ଡାବଲି ଆର୍ଟସ କଲେଜର ମୋଟ ୧୧ ଜଣ ଅଧ୍ୟାପକ ମିଶି ୫୦ ଜଣ ଛାତ୍ରଛାତ୍ରୀଙ୍କର ପ୍ରି-ୟୁନିଭରସିଟି ପାଠ୍ୟକ୍ରମର ପ୍ରଥମ ଏବଂ ଦ୍ୱିତୀୟ ବର୍ଷରେ ନାମ ଲେଖାଇଛନ୍ତି। ଅଧ୍ୟାପକ ଓ ଅଧ୍ୟାପିକାମାନଙ୍କ ଦ୍ବାରା ପ୍ରେରିତ ହୋଇ କଲେଜ ପରିଚାଳନା ମଧ୍ୟ ବହୁ ଛାତ୍ରଛାତ୍ରୀଙ୍କୁ ପ୍ରାୟୋଜିତ କରିଥିବା ସୂଚନା ରହିଛି।
ଏପରି ସହାୟତା ପାଇବା ପରେ ସୁରୁନ ନାମକ ଜଣେ ଛାତ୍ର ନିଜର ଖୁସି ବ୍ୟକ୍ତ କରି କହିଛନ୍ତି, ‘ଯେହେତୁ ମୋର ବାପାମାଆ ଦିନ ମଜୁରିଆ, ପରିବାର ପ୍ରତିପୋଷଣ ପାଇଁ ମୋତେ ମଧ୍ୟ କାମ କରିବାକୁ ପଡ଼େ। କଲେଜ୍ ଫି ବାବଦରେ ମୋତେ ୩ ହଜାର ଟଙ୍କା ଦେବାକୁ ପଡ଼ିଥାନ୍ତା। ଏହି କାରଣରୁ ମୁଁ ମୋର ପାଠ ପଢ଼ା ପ୍ରାୟ ଛାଡ଼ି ଦେଇଥାନ୍ତି। ମାତ୍ର କଲେଜର ଅଧ୍ୟାପକ ଓ ଅଧ୍ୟାପିକାଙ୍କ ଉଦାରତା ପାଇଁ ମୁଁ ପୁଣି ଥରେ ପାଠ ପଢ଼ିବାକୁ ସମର୍ଥ ହେଲିି। ସମସ୍ତଙ୍କୁ ମୁଁ ମୋ ଅନ୍ତରରୁ କୃତଜ୍ଞତା ଜଣାଉଛି।’
Comments are closed.