ବୁଢ଼ା ବାପା-ମା’ଙ୍କୁ ହତାଦର କରି ସଂପତ୍ତି ହଡ଼ପ କରିପାରିବେ ନାହିଁ ପୁଅଝିଅ; ଆଇନରେ ଦେଉଛି ଅନେକ ସୁରକ୍ଷା
ନୂଆଦିଲ୍ଲୀ: କୁହାଯାଏ, ଭଗବାନଙ୍କ ଚଳନ୍ତି ପ୍ରତିମା ହେଉଛନ୍ତି ବାପାମାଆ। ହେଲେ ଏହା ଜାଣି ମଧ୍ୟ କିଛି ସନ୍ତାନ ଜନ୍ମକଲା ବାପାମାଆଙ୍କ ସେବା କରିବା ତ ଦୂରର କଥା ବରଂ ତାଙ୍କୁ ଆଡ ଆଖିରେ ବି ଚାହୁଁନାହାନ୍ତି । ତେବେ ଏଭଳି ଉଦ୍ଧତ ପିଲାମାନଙ୍କୁ ବାଟକୁ ଆଣିବା ପାଇଁ ଏବଂ ଅସହାୟ ବୁଦ୍ଧ ବାପାମାଆଙ୍କୁ ସୁରକ୍ଷା ଦେବାକୁ ଆମ ଦେଶର ଆଇନ ବ୍ୟବସ୍ଥାରେ ଅନେକ ଗୁରୁତ୍ୱପୂର୍ଣ୍ଣ ଅଧିକାର ବରିଷ୍ଠ ନାଗରିକଙ୍କୁ ଦିଆଯାଇଛି । ଯେଉଁଥିରେ ଯଦି କୌଣସି ସନ୍ତାନ ନିଜ ବାପାମାଆଙ୍କୁ ଅଣଦେଖା କରେ ତେବେ ସେ ପୈତୃକ ସଂପତ୍ତିରୁ ବଂଚିତ ହେବା ସହ ବାପାମାଆ ଚାହିଁଲେ ତାଙ୍କୁ ଘରୁ ମଧ୍ୟ ବେଦଖଲ କରିପାରିବେ।
Sambad is now on WhatsApp
Join and get latest news updates delivered to you via WhatsApp
• ଯଦି କୌଣସି ସନ୍ତାନ ନିଜ ବାପାମାଆଙ୍କୁ ଦୁର୍ବ୍ୟବହାର କରନ୍ତି କିମ୍ବା ଖାଇବା ପିଇବା ଦେବାରେ ଅବହେଳା କରନ୍ତି, ବାପାମାଆଙ୍କ ସହ ଚାକର ଭଳି ବ୍ୟବହାର କରନ୍ତି ତେବେ ବାପାମାଆ ଚାହିଁଲେ ଏଭଳି ପୁଅ-ଝିଅ-ଜ୍ୱାଇଁ କିମ୍ବା ନାତି-ନାତୁଣୀଙ୍କୁ ନିଜ ମାଲିକାନାରେ ଥିବା ଘରୁ ବାହାର କରିପାରିବେ । ଏପରିକି ସଂପତ୍ତିରୁ ମଧ୍ୟ ଏମାନଙ୍କୁ ବେଦଖଲ କରିପାରିବେ । ସେହିଭଳି ଯଦି ପିଲାମାନଙ୍କ ନାଁରେ ପୂର୍ବରୁ ସଂପତ୍ତି କରିଦେଇଛନ୍ତି ତେବେ ତାକୁ ଫେରାଇ ମଧ୍ୟ ଆଣିପାରିବେ । ତେବେ ଏହା କେବଳ ସେମାନଙ୍କ ଅର୍ଜିତ ତଥା ପୈତୃକ ସଂପତ୍ତି ଉପରେ ଲାଗୁ ହେଉନି ବରଂ ବାପାମାଆଙ୍କ ନାଁରେ ଥିବା ଅନ୍ୟାନ୍ୟ ସଂପତ୍ତି ଉପରେ ମଧ୍ୟ ଲାଗୁ ହେଉଛି।
• ସେହିଭଳି ହିନ୍ଦୁ ମ୍ୟାରେଜ୍ ଆକ୍ଟ ଅନୁସାରେ ପ୍ରଥମ ପତ୍ନୀ ବଂଚି ଥାଉ ଥାଉ ଯଦି ସ୍ୱାମୀ ଦ୍ୱିତୀୟ ବିବାହ କରେ ତେବେ ଏହା ଦଣ୍ଡନୀୟ ଅପରାଧ । କିନ୍ତୁ ପ୍ରଥମ ପତ୍ନୀଙ୍କ ମୃତ୍ୟୁ ପରେ ବ୍ୟକ୍ତି ଜଣକ ଯଦି ଦ୍ୱିତୀୟ ବିବାହ କଲେ ତାହା ଗ୍ରହଣ ଯୋଗ୍ୟ ଅଟେ । ଏଥିସହିତ ଦ୍ୱିତୀୟ ପତ୍ନୀଙ୍କ ଔରସରୁ ଜାତ ସନ୍ତାନ ବି ସଂପତ୍ତିର ହକଦାର ହେବେ।
• ଯଦି କୌଣସି ପରିବାରରେ ଚାରି ଭାଇ ଥାନ୍ତି ଆଉ ଏମାନଙ୍କ ଭିତରୁ ଜଣେ କେହି ବାପାମାଆଙ୍କୁ ଫସେଇ ସେମାନଙ୍କର ଜାଲ ଦସ୍ତଖତ କରି ସଂପତ୍ତି ନିଜ ନାଁରେ କରିଦିଅନ୍ତି ତେବେ ବାକି ଭାଇମାନେ ଚାହିଁଲେ ଏ ବାବଦରେ କୋର୍ଟରେ ଚ୍ୟାଲେଂଜ କରିପାରିବେ।
• ସେହିଭଳି ବାପାମାଆ ବଂଚିଥିବା ସମୟରେ ଯଦି ସେ ତାଙ୍କର ଅର୍ଜିତ ସଂପତି ଅନ୍ୟ କୌଣସି ବ୍ୟକ୍ତିଙ୍କୁ ଦାନ କରିଦିଅନ୍ତି ତେବେ ଏଭଳି ପରିସ୍ଥିତିରେ ସନ୍ତାନମାନେ ଏଥିରେ କୌଣସି ଅଧିକାର ଜାହିର କରିପାରିବେନି । ଏପରିକି ତାଙ୍କ ମୃତ୍ୟୁ ପରେ ବି ସେ ସେଥିରେ ନିଜ ଅଧିକାର ଜାହିର କରିପାରିବେ ନାହିଁ । ତେବେ ରେଜିଷ୍ଟ୍ରେସନ୍ ଆକ୍ଟ ଅନୁସାରେ ଅସ୍ଥାବର ସଂପତ୍ତିର କବଲା କରିବା ନିହାତି ଜରୁରୀ । ଯଦି ବାପା ଏହାକୁ ରେଜିଷ୍ଟର୍ଡ କରି ନ ଥିବେ ତେବେ ଆପଣ ଏ ନେଇ କୋର୍ଟରେ ଚ୍ୟାଲେଂଜ କରିପାରିବେ।