ଦୀର୍ଘ ଦିନ ହେବ ପେଟ ବିନ୍ଧୁଥିବା କଥା କହୁଥିଲେ ରୋଗୀ: ପେଟ ଭିତରୁ ଏତେ ସବୁ ଜିନିଷ ବାହାର କଲେ ଡାକ୍ତର

ମୋଗା: ପେଟବ୍ୟଥା ହେଉଥିବା ଜଣେ ରୋଗୀର ଅସ୍ତ୍ରୋପଚାର କରି ଗୁରୁବାର ଦିନ ପଞ୍ଜାବର ମୋଗାସ୍ଥିତ ଏକ ଡାକ୍ତରଖାନାର ଯାହା ବାହର କଲେ ତାହା ଦେଖି ଡାକ୍ତରମାନେ ମଧ୍ୟ ବିସ୍ମିତ ହୋଇଯାଇଛନ୍ତି।

ରୋଗୀ ପେଟରୁ ଡାକ୍ତରମାନେ ‘ଇୟର୍‌ଫୋନ୍‌’, ‘ଲକେଟ୍‌’, ‘ପେଚକଣ୍ଟା’ ଓ ‘ରାଖି’ ପ୍ରଭୃତି ଅନେକ ସାମଗ୍ରୀ ବାହାର କରିଛନ୍ତି ବୋଲି ‘ଏନ୍‌ଡିଟିଭି’ ରିପୋର୍ଟ କରିଛି।

ରିପୋର୍ଟରେ ଉଲ୍ଲେଖ ଅଛି, ଦୁଇ ଦିନ ହେବ ପେଟଟଣା ଓ ଜ୍ବରରେ ପୀଡ଼ିତ ହୋଇଥିବା ଉକ୍ତ ୪୦ ବର୍ଷିୟ ରୋଗୀଙ୍କୁ ମୋଗାସ୍ଥିତ ‘ମେଡିସିଟି ହସ୍ପିଟାଲ୍‌’ରେ ଭର୍ତ୍ତି କରାଯାଇଥିଲା। ପେଟ ବିନ୍ଧା ନ କମିବାରୁ, ବିନ୍ଧାର କାରଣ ଜାଣିବା ଲାଗି ଡାକ୍ତରମାନେ ‘ଏକ୍ସ-ରେ’ କରାଇଲେ। ଫଳାଫଳ ଯାହା ବାହାରିଲା, ସେଥିରେ ଡାକ୍ତରମାନେ ଆଚମ୍ବିତ ହୋଇଗଲେ।

Image Courtesy of Netdoctor

ପେଟରେ କେତେଗୁଡ଼ିଏ ଧାତବ ସାମଗ୍ରୀ ଥିବା ଜାଣି ସେ ସବୁ ବାହାର କରିବା ଲାଗି ଡାକ୍ତରମାନେ ଅସ୍ତ୍ରୋପଚାର କଲେ। ଦୀର୍ଘ ୩ ଘଣ୍ଟାକାଳ ଅସ୍ତ୍ରୋପଚାର କରି ସେମାନେ ତାଙ୍କ ପେଟରୁ ପ୍ରାୟ ଶତାଧିକ ସାମଗ୍ରୀ ବାହାର କରିବାରେ ସଫଳ ହୋଇଥିଲେ।

ସେମାନେ ବହାର କରିଥିବା ସାମଗ୍ରୀ ଭିତରେ ଅଛି, ‘ଇୟର୍‌ଫୋନ୍‌’, ‘ୱାସର୍‌’, ‘ନଟ୍‌-ବୋଲ୍‌ଟ୍‌’, ‘ତାର’, ‘ରାଖି’, ‘ଲକେଟ୍‌’, ‘ବୋତାମ’, ‘ରାପର୍‌’, ‘ମୁଣ୍ଡକଣ୍ଟା’, ‘ଜିପର୍‌ ଟ୍ୟାଗ୍‌’, ‘ବାଟି’ ଓ ‘ସେଫ୍‌ଟି ପିନ୍‌’ ଇତ୍ୟାଦି।

ହସ୍ପିଟାଲ୍‌ର ନିର୍ଦେଶକ ଡାକ୍ତର ଆଜ୍‌ମେର୍‌ କାଲ୍‌ରା କହିଛନ୍ତି, ଦୀର୍ଘ ୨ ବର୍ଷ ହେବ ସେ ବ୍ୟକ୍ତିଙ୍କର ପେଟ ବିନ୍ଧୁଥିଲା। ତାଙ୍କ ପେଟରୁ ସବୁ ସାମଗ୍ରୀ ବାହାର କରାଯାଇଥିଲେ ବି, ତାଙ୍କର ସ୍ବାସ୍ଥ୍ୟବସ୍ଥା ଭଲ ନାହିଁ। କାରଣ, ଏତେ ସବୁ ଜିନିଷ ପେଟ ଭିତରେ ପଶି ରହି ଅନ୍ୟାନ୍ୟ ସ୍ବାସ୍ଥ୍ୟ ସମସ୍ୟା ସୃଷ୍ଟି କରିସାରିଛନ୍ତି।