ଭୂତାଣୁ ଦାଉରୁ ବନବାସୀଙ୍କୁ ରକ୍ଷା କରିଛି ପତ୍ର ତିଆରି ମାସ୍କ୍‌

ନୂଆଦିଲ୍ଲୀ: କୋଭିଡ୍‌-୧୯କୁ ଦୂରେଇ ରଖିବାକୁ ଆନ୍ଧ୍ରପ୍ରଦେଶ ଓ ତେଲେଙ୍ଗାନାର ଜନଜାତି ସମ୍ପ୍ରଦାୟ ଔଷଧୀୟ ଗୁଣ ଥିବା ପତ୍ର ତିଆରି ମାସ୍କ୍ ପିନ୍ଧୁଛନ୍ତି। ଦାରିଦ୍ର୍ୟ ପ୍ରପୀଡ଼ିତ ବନବାସୀ ଏଥିଯୋଗୁଁ ଉପକୃତ ମଧ୍ୟ ହୋଇଛନ୍ତି। ସେମାନଙ୍କ ମଧ୍ୟରୁ ପ୍ରାୟ କେହି କରୋନାଭାଇରସ୍ ଦ୍ବାରା ସଂକ୍ରମିତ ହୋଇ ନାହାନ୍ତି।

ଦେଶରେ କୋଭିଡ୍-୧୯ ସଂକ୍ରମଣ ହେବାର ଆଦ୍ୟ ସମୟରେ ଘନ ଅରଣ୍ୟରେ ବାସ କରୁଥିବା ଆନ୍ଧ୍ରପ୍ରଦେଶ ଓ ତେଲେଙ୍ଗାନାର ଆଦିମ ଜନଜାତି ନିଜେ ନିଜର ମାସ୍କ୍ ତିଆରି କଲେ। ଔଷଧୀୟ ଗୁଣ  ଥିବା ଅଳ୍ପ କେତୋଟି ବୃକ୍ଷ ଚୟନ କରି ସେମାନେ ତା’ ପତ୍ରରେ ତିଆରି କଲେ ମୁଖାବରଣ।

Image Courtesy of The Indian Express

‘ନେଚର୍‌’ ନାମକ ‘ଏନ୍‌ଜିଓ’ର ନିର୍ଦେଶକ ଏସ୍ ବାଳରାଜୁ କହନ୍ତି, ଉତ୍ତର ଓ ଉପକୂଳବର୍ତ୍ତୀ ଆନ୍ଧ୍ରର କେତେଗୁଡ଼ିଏ ଜନଜାତି ଅଞ୍ଚଳରେ ପ୍ରାୟ ୧୫୦୦୦ ଲୋକ ପତ୍ର-ମାସ୍କ୍‌ ବ୍ୟବହାର କରୁଛନ୍ତି। ଆନ୍ଧ୍ରପ୍ରଦେଶ-ତେଲେଙ୍ଗାନା ସୀମାନ୍ତ ଅଞ୍ଚଳ ଅନ୍ତର୍ଗତ ଭଦ୍ରାଚଳମ୍‌ର ନିଘଞ୍ଚ ଅରଣ୍ୟରେ ବାସ କରୁଥିବା ଜନଜାତି ହିଁ ପତ୍ର-ମାସ୍କ୍‌ ପିନ୍ଧିବା ଆରମ୍ଭ କରିଥିଲେ।

ସେଠାରୁ ଏ ଉପାୟ ଆନ୍ଧ୍ରପ୍ରଦେଶର ନଲ୍ଲମାଲା, ୟେରାମାଲା ଏବଂ ଆରାକୁ ଓ ତେଲେଙ୍ଗାନାର ଆଦିଲ୍‌ବାଦ, ଖମ୍ମାମ ଏବଂ ୱାରାଙ୍ଗଲ୍‌ ଜନତାତିଙ୍କ ପାଖକୁ ଆସିଥିଲା। ସ୍ଥାନୀୟ ଅଞ୍ଚଳରେ ମିଳୁଥିବା ଭିନ୍ନ ଭିନ୍ନ ପତ୍ର ଯଥା:- ଶାଳ, ଶାଗୁଆନ, ତାଳ, କରଞ୍ଜ ଏବଂ ଗବଗଛକୁ ଆଧାର କରି ଜନଜାତି ସମ୍ପ୍ରଦାୟ ମାସ୍କ ତିଆରି କଲେ। ଏ ସବୁ ସେମାନଙ୍କୁ ପ୍ରାୟ ୫ ଘଣ୍ଟା ସୁରକ୍ଷା ଦେଉଥିଲା।

ପରେ ଅବଶ୍ୟ ସରକାର ଜନଜାତି ସମ୍ପ୍ରଦାୟଙ୍କୁ ମୁଣ୍ଡପିଛିା ତିନିଟି ଲେଖାଏଁ ମାସ୍କ୍ ବାଣ୍ଟିଥିଲେ।

 

ସମ୍ବନ୍ଧିତ ଖବର