ରାମବନରେ ବାହାଘର: ମଲାଯାଏଁ ମନେ ରହିବ ବର କନିଆଁଙ୍କର...

ଶ୍ରୀନଗର: ବାହାଘରକୁ ନେଇ କିଏ କେତେ ସ୍ବପ୍ନ ଦେଖିଥାଏ । ପ୍ରେମ ତ ଅନେକ ଥର ହୁଏ, କିନ୍ତୁ ଆଦ୍ୟ ଯୌବନର ପ୍ରଥମ ପ୍ରେମୋତ୍ସବ ଯଦି କୁହାଯାଏ ତାହାଲେ ବିବାହ ଏମିତି ଏକ ବନ୍ଧନ ବା ଉତ୍ସବ ଯେଉଁଠି ନାରୀପୁରୁଷ ନୂଆ ଜୀବନ ସାଥି ପାଇଥାନ୍ତି ଆଉ ନୂଆ ସଂସାର ଗଢିବାକୁ ଶପଥ ନେଇଥାନ୍ତି । ବିବାହକୁ ନେଇ ଆଜିର ଯୁବପିଢି ଅନେକ ସ୍ବପ୍ନ ଦେଖନ୍ତି । କିଏ କେମିତି ବାହାଘରକୁ କରିବ ସେନେଇ ମଧ୍ୟ ଯୋଜନା ପ୍ରସ୍ତୁତ କରିଥାନ୍ତି । ବାହାଘର କେତେ ବଜେଟରେ ହେବ, ବାହାଘର ଦିନ କିଏ କଣ ପିନ୍ଧିବ, କେଉଁଠି ବାହାଘର ହେବ ଏବଂ ରିସେପ୍ସନକୁ କେମିତି ପାଳନ କରାଯିବ ସବୁକୁ ନେଇ ପୂର୍ବ ପ୍ରସ୍ତୁତି ହେଉଛି । ଏବେ ତ ପ୍ରି ୱେଡିଂ, ବାଜା ବାଣ, ଡିଜେରେ କମ୍ପୁଛି ବାହାଘର । ବରଯାତ୍ରୀ ତ ଏବେ ବିନା ଡିଜେରେ ପାଦ ଉଠାଉ ନାହାନ୍ତି କି ବର ବି ବିନା ଶୋଭାଯାତ୍ରରେ ବାହା ହେବାକୁ ଯାଉ ନାହାନ୍ତି । ବାହାଘରକୁ ଯିଏ ଯେତେ ଚାକଚକ୍ୟ କରିପାରିଲା ସିଏ ସେତେ ଧନୀରେ ଗଣାହୁଏ...

ବାହାଘରକୁ ନେଇ ଆଜିର ଯୁବପିଢି ଭିନ୍ନ ଦୃଷ୍ଟିରେ ଦେଖି ଆୟୋଜନ କରିଥିବା ବେଳେ ସମୟ କାହା ସହ କେତେବେଳେ କଣ ଖେଳିବ କିଛି କହିହେବନି । ସମୟ ଯଦି ସାଥ୍ ନଦିଏ ତେବେ ସବୁ ଆୟୋଜନ ଅଧୁରା ରହିଯିବ । ଏଇ ଯେମିତି ଜମ୍ମୁକାଶ୍ମୀର ରାମବନରେ ଫିକାଫିକା ହୋଇଛି ବାହାଘର । ବିପର୍ୟ୍ୟୟ ଯଦିଓ ବାହାଘରର ବାଟ ରୋକି ପାରିନି ମାତ୍ର ଶୋଭାଯାତ୍ର ଓ ଆୟୋଜନକୁ ପ୍ରଭାବିତ କରିଛି । 

ରାମବନରେ ଭୟଙ୍କର ବନ୍ୟା ଏବଂ ବନ୍ୟା ପରବର୍ତ୍ତୀ ଭୂସ୍ଖଳନ ଯୋଗୁଁ ରାସ୍ତାଘାଟ ଧୋଇଯାଇଛି । ହାଇୱେରେ ପାହାଡ ଝସି ପଡିଛି ଯେଉଁଥି ପାଇଁ ଗାଡ଼ି ମଟର ଯିବା କାଠିକର ହୋଇପଡିଛି । ଏଭଳି ପରିସ୍ଥିତିରେ ବାହାଘର ପୂର୍ବରୁ ସ୍ଥିର ହୋଇସାରିଥିବାରୁ ବିଧିରକ୍ଷା ଲାଗି ବର ବାହାହେବା ପାଇଁ ଚାଲିଚାଲି ଯାଇଛି । ପାହାଡି ରାସ୍ତା, ନଈ, ନାଳ ଏବଂ ବିଲରେ ଚାଲି ଚାଲି ଯାଇ କନ୍ୟା ଘରେ ବର ପହଞ୍ଚିଥିବା ବେଳେ ଫିକା ଫିକା ପଡିଛି ବାହାଘରକୁ ନେଇ ବିରାଟ ଆୟୋଜନ, ହୋଇପାରିନି ପ୍ରୋସେସନ, ଫୁଟିନି ବି ବାଣ କି ବାଜିନି ଡିଜେ...

ରାମବନ ନିବାସୀ ହସରୁଖ ଅହମ୍ମଦ ନିଲ ଗଗନାନ ଗାଁକୁ ବିବାହ ପାଇଁ ଯାଉଥିବା ବେଳେ ରାସ୍ତା ଖରାପ ପାଇଁ ଚାଲି ଚାଲି ଯିବାକୁ ବାଧ୍ୟ ହୋଇଛନ୍ତି । ଏବଂ ବାହାଘର ପରେ ବି ନିଜ ପତ୍ନୀଙ୍କ ସହ ହସରୁଖ ସେହି ବାଟ ଦେଇ ପୁଣି ଥରେ ଚାଲିଚାଲି ଫେରିଛନ୍ତି । ଖାଲି ହସରୁଖ ନୁହେଁ ଏକାଧିକ ବର ରାମବନରେ ଏମିତି ପରିସ୍ଥିତର ସାମ୍ନା କରିଛନ୍ତି ଆଉ ଚାଲିଚାଲି ଭୂସ୍ଖଳନ ସ୍ଥଳରୁ କନ୍ୟାଘରକୁ ଯାଇଛନ୍ତି ।

ହେଉ ପଛେ କଷ୍ଟ, ନଥାଉ ପଛେ ରାସ୍ତା, ନବାଜୁ ପଛେ ଡିଜେ, ନଫୁଟୁ ପଛେ ବାଣ... ବିପଦ ଭିତରେ ଏ ବାହାଘର ପୁରୁଣା ଯୁଗର ସେ ବାହାଘର କଥା ମନେ ପକାଇ ଦେଇଛି । ଯେତେବେଳେ ଆମ ଜେଜେ ଅମଳର ଲୋକ ସବାରୀରେ ବସି ବାହାହେବାକୁ ଯାଉଥିଲେ । ପ୍ରକୃତି ଗୋଟେ ପଟେ ତାଣ୍ଡବ ରଚି ପ୍ରଳୟ ସୃଷ୍ଟି କରିଥିବା ବେଳେ ସେହି ପ୍ରକୃତି ପାଇଁ ହିଁ ଆଜିର ଯୁବପିଢି ବେରଙ୍ଗ ବାହାଘର ମାନେ ପ୍ରକୃତି ଅନୁକୂଳ ବାହାଘରର ମଜା ନେଇପାରିଲେ । ଯେଉଁଠି ବାଣ ଫୁଟି କିମ୍ବା ଡିଜେ ଶବ୍ଦପ୍ରଦୂଷଣ ହୋଇନଥିଲା... ହୁଏତ ଆଜିର ଯୁବପିଢି ବାହାଘରକୁ ସ୍ମରଣୀୟ କରିବାକୁ କେତେ ଆୟୋଜନ କରିଥିବେ ମାତ୍ର ପ୍ରକୃତିର ଏ ବିଷମ ପରିସ୍ଥିତିରେ ସେମାନଙ୍କ ବାହାଘର କାଳ କାଳ ପାଇଁ ମନେରହିଯିବ...