ଚେନ୍ନାଇ: ବଡ ବଡ ସହରମାନଙ୍କରେ ମୁଖ୍ୟତଃ ଆଇଟି କମ୍ପାନିମାନେ ନିଜର ଅଫିସ ପାଇଁ ଉଚ୍ଚ ଅଟ୍ଟାଳିକା ନିର୍ମାଣ କରିଥାନ୍ତି | ଏହି ସବୁ ଅଫିସରେ ଦିନରାତି ଏୟାରକଣ୍ଡିସନିଙ୍ଗ ସହ ଲିଫ୍ଟର ବ୍ୟବସ୍ଥା ଥାଏ | କିନ୍ତୁ ଆମେ ଯଦି ଆପଣଙ୍କୁ କହିବୁ ଚାଳ ଛପରରେ ବି ଅଛି ଆଇଟି ଅଫିସ, ଆପଣ ବିଶ୍ୱାସ କରିବେ କି? କିନ୍ତୁ ଏକଥା ଏକଦମ ସତ | ତାମିଲନାଡୁର ଏକ ଆଇଟି କମ୍ପାନୀ ‘ଜୋହୋ’ର ସିଇଓ ବା ମୁଖ୍ୟ କାର୍ଯ୍ୟନିର୍ବାହୀ ଶ୍ରୀଧର ଭେମ୍ବୁ ତାଙ୍କ ନୂତନ କାର୍ଯ୍ୟାଳୟ ଏକ ଗାଁରେ ନିର୍ମାଣ କରିଛନ୍ତି | ଯେତେବେଳେ ନୂଆ ଅଫିସ କରିବାର ଆବଶ୍ୟକତା ପଡିଲା, ସେତେବେଳେ ତାଙ୍କ ମୁଣ୍ଡକୁ ଏକ ଭିନ୍ନ ପରିକଳ୍ପନା ଆସିଥିଲା |
Sambad is now on WhatsApp
Join and get latest news updates delivered to you via WhatsApp
ଅନ୍ୟ କମ୍ପାନିଗୁଡିକ ପରି କୌଣସି ବଡ ସହରରେ ବହୁ ମହଲା ବିଶିଷ୍ଟ ଅଫିସ୍ କୋଠା ନିର୍ମାଣ କରିବା ପରିବର୍ତ୍ତେ, ସେ ମାଟି କାନ୍ଥରେ ନଡା ପକାଇ ଏକ ଗାଁରେ ଅଫିସ ନିର୍ମାଣ କରିଛନ୍ତି | ଏହି ଅଫିସରେ ଏବେ ପ୍ରାୟ ୧୮ ଜଣ ସଫ୍ଟୱେୟାର ଇଞ୍ଜିନିୟର କାମ କରୁଛନ୍ତି | ତେବେ ଜୋହୋ ସିଇଓ ନୂତନ କାର୍ଯ୍ୟାଳୟର ସ୍ଥାନ ପ୍ରକାଶ କରିନାହାଁନ୍ତି। ସେ ଟ୍ୱିଟ୍ କରିଛନ୍ତି ଯେ ଏଭଳି ଗରମ ଦିନରେ ମଧ୍ୟ ଏହି ଅଫିସ ବହୁତ ଥଣ୍ଡା ହୋଇଥାଏ |
ଏହି ଅଫିସରେ କୌଣସି ଏସି ବ୍ୟବହାର ହୋଇନଥିଲେ ବି ମାଟି କାନ୍ଥ ଓ ନଡ଼ା ଯୋଗୁଁ ଏହା ଥଣ୍ଡା ରହୁଛି | ଶ୍ରୀଧର ଭେମ୍ବୁ କହିଛନ୍ତି ଯେ ‘ଏହି ଅଫିସକୁ ମୁଁ ବହୁତ ପସନ୍ଦ କରେ । ଏହି କାର୍ଯ୍ୟାଳୟରେ ୩୦ ଜଣଙ୍କ ପାଇଁ କାମ କରିବାର ସ୍ଥାନ ଥିବାବେଳେ ବର୍ତ୍ତମାନ ଏଠାରେ ୧୮ ଜଣ କର୍ମଚାରୀ କାର୍ଯ୍ୟ କରୁଛନ୍ତି’ |