ଜୟପୁର: ଚାଷଜମିରେ ଦିନକୁ ଦିନ କୀଟନାଶକ ଓ ସାରର ବ୍ୟବହାର ବଢ଼ିବାରେ ଲାଗିଛି | ଗୋଟିଏ ପଟେ ଜମିର ଉର୍ବରତା ହ୍ରାସ ପାଉଥିବାବେଳେ ଅନ୍ୟପଟେ ପରିବେଶ ଉପରେ ଏହାର ପ୍ରଭାବ ପଡୁଛି | କିଛି ଏଭଳି ସମସ୍ୟା ଦେଖି ୩୧ ବର୍ଷୀୟ ଶ୍ରବଣ ଯାଦବ, ‘ଡକ୍ଟର ଅର୍ଗାନିକ ଭର୍ମିକମ୍ପୋଷ୍ଟ’ ନାମରେ ଜୈବିକ ଖତ ବ୍ୟବସାୟ ଚଳାଇଛନ୍ତି | ସେ ଜୈବିକ ଚାଷ ପ୍ରତି ଏତେ ଆଗ୍ରହୀ ଯେ ଏକ ବଡ ଡିଗ୍ରୀ ହାସଲ କରିବା ପରେ ମଧ୍ୟ ସେ ଦାମୀ ଦରମାରେ ଚାକିରି କରିବା ପରିବର୍ତ୍ତେ ଖତ ବିକ୍ରୟ ଆରମ୍ଭ କଲେ | ୨୦୨୦ ମସିହାରୁ ସେ ଜିଆ ଖତ ବ୍ୟବସାୟ ଚଳାଉଛନ୍ତି ଏବଂ ସାରା ଦେଶରେ ଚାଷୀଙ୍କୁ ଏହା ବିକ୍ରି କରୁଛନ୍ତି |
Sambad is now on WhatsApp
Join and get latest news updates delivered to you via WhatsApp
୨୦୧୨ ମସିହାରେ, ସେ କର୍ଣ୍ଣାଟକରେ ଅର୍ଗାନିକ ଫାଂର୍ମିଙ୍ଗ ବିଷୟରେ ଏମଏସସି ଅଧ୍ୟୟନ କରିଥିଲେ ଏବଂ କର୍ଣ୍ଣାଟକର ଏକ ବହୁରାଷ୍ଟ୍ରୀୟ କମ୍ପାନୀରେ କାର୍ଯ୍ୟ କରିବା ଆରମ୍ଭ କରିଥିଲେ | ଏଠାରେ ତାଙ୍କୁ କୀଟନାଶକ ପ୍ରଚାର କରିବାକୁ ପଡିଲା | ଜୈବିକ ଚାଷ ପ୍ରତି ତାଙ୍କର ଭଲପାଇବା ହେତୁ ସେ ଏହି ଚାକିରିକୁ ଛାଡିଦେଇଥିଲେ | ଏହାପରେ ଜୈବିକ ଖତ ସମ୍ବଦ୍ଧିତ ବିଷୟରେ ସେ ପିଏଚଡି ସମାପ୍ତ କରିବା ପରେ ସେହି ବିଶ୍ୱବିଦ୍ୟାଳୟରେ ୨୦୧୮ରେ ସିନିୟର ରିସର୍ଚ୍ଚ ଫେଲୋସିପ୍ ଚାକିରି ପାଇଲେ। ୨୦୧୮ ରୁ ୨୦୨୦ ପର୍ଯ୍ୟନ୍ତ ସେ ଏହି ବିଶ୍ୱବିଦ୍ୟାଳୟରେ କାର୍ଯ୍ୟ କରୁଥିଲେ। କିନ୍ତୁ ଯେତେବେଳେ ଲକଡାଉନ୍ ହେଲା ଓ ଶ୍ରବଣ ଘରେ ଥିଲେ, ସେ କେବଳ ୧୭ ଶଯ୍ୟା ବିଶିଷ୍ଟ ଭର୍ମିକମ୍ପୋଷ୍ଟର ଏକ ଛୋଟ ୟୁନିଟ୍ ସ୍ଥାପନ କରି ନୂତନ କାର୍ଯ୍ୟ ଆରମ୍ଭ କଲେ | ଶ୍ରବଣ କହିଛନ୍ତି, “ଯେତେବେଳେ ମୁଁ ଏହି କାମ ଆରମ୍ଭ କଲି, ସେତେବେଳେ ଲୋକମାନେ ମୋତେ ପରିହାସ କରୁଥିଲେ | ଲୋକମାନେ କହୁଥିଲେ ଯେ ଡକ୍ଟରେଟ କରି ଶେଷରେ ଜୈବିକ ଖତ ବିକ୍ରି କରିବାକୁ ପଡୁଛି | କିନ୍ତୁ ମୋର ଲକ୍ଷ୍ୟ ଥିଲା ସମଗ୍ର ଦେଶରେ ଚାଷୀଙ୍କୁ ଭଲ ଜୈବିକ ଖତ ଦେବା, ଯାହାଦ୍ୱାରା ଅଧିକରୁ ଅଧିକ ଲୋକ ଜୈବିକ ଚାଷ କରିବେ |
ଏହା ପରେ ସେ ୟୁଟ୍ୟୁବରେ ଭର୍ମିକମ୍ପୋଷ୍ଟ ବିଷୟରେ ଭିଡିଓ ପୋଷ୍ଟ କରିବା ଆରମ୍ଭ କଲେ | ତାଙ୍କର ଡକ୍ଟର ଅର୍ଗାନିକ୍ ଭର୍ମିକମ୍ପୋଷ୍ଟ ନାମକ ଏକ ଚ୍ୟାନେଲ ମଧ୍ୟ ଅଛି, ଯାହାକୁ ହଜାର ହଜାର ଲୋକ ଦେଖନ୍ତି | ଏହି ଚ୍ୟାନେଲ ପରେ ତାଙ୍କର ଭର୍ମିକମ୍ପୋଷ୍ଟ ବ୍ୟବସାୟ ମଧ୍ୟ ବହୁତ ବଢିବାକୁ ଲାଗିଲା | ତାଙ୍କ ସାନଭାଇ ସୁରେଶ ମଧ୍ୟ ମାର୍କେଟିଂ କାର୍ଯ୍ୟରେ ତାଙ୍କୁ ସାହାଯ୍ୟ କରନ୍ତି | ଧୀରେ ଧୀରେ ସେ ଶଯ୍ୟା ସଂଖ୍ୟା ମଧ୍ୟ ବଢ଼ାଇଲେ | ବର୍ତ୍ତମାନ, ତାଙ୍କର ପାଖାପାଖି ୭୦୦ ଶଯ୍ୟା ଥିବାବେଳେ ଯେଉଁଥିରୁ ସେ ପ୍ରତି ମାସରେ ୩୦ ଟନ୍ ପର୍ଯ୍ୟନ୍ତ ଖତ ଉତ୍ପାଦନ କରନ୍ତି | ଏହା ବ୍ୟତୀତ ସେ କମ୍ପୋଷ୍ଟ ୟୁନିଟ୍ ସ୍ଥାପନ ପାଇଁ କୃଷକମାନଙ୍କୁ ମାଗଣା ତାଲିମ ମଧ୍ୟ ଦିଅନ୍ତି | ଜିଆ ଖତରୁ ସେ ମାସକୁ ଦୁଇ ଲକ୍ଷ ଟଙ୍କା ଲାଭ କରୁଛନ୍ତି।