ଭାଇଚାରା : ଗାଁର ମୁସଲମାନଙ୍କ ପାଇଁ ମସଜିଦ୍ ନିର୍ମାଣ କଲେ ଶିଖ
‘ଦୁଃଖ ସମୟର ବନ୍ଧୁ ହିଁ ପ୍ରକୃତ ବନ୍ଧୁ ‘ଏହି ଆପ୍ତ ବାକ୍ୟକୁ ପ୍ରମାଣିତ କରିଛନ୍ତି ପଞ୍ଜାବର ସରଓ୍ଵାପୁରର ଗ୍ରାମବାସୀ । ଧର୍ମ ଓ ସଂପ୍ରଦାୟର ଭେଦଭାବକୁ ଭୁଲି ଏହି ଗ୍ରାମର ଶିଖ ପରିବାର ଏକତ୍ର ହୋଇ ନିର୍ମାଣ କରିଛନ୍ତି ମୁସଲମାନମାନଙ୍କ ପାଇଁ ମସଜିଦ୍ । ପଞ୍ଜାବର ଏହି ଛୋଟ ଗ୍ରାମରେ ୧୧ଟି ମୁସଲମାନ୍ ପରିବାର ଏବଂ ୩୦୦ଟି ଶିଖ ପରିବାର ରହନ୍ତି । ଗ୍ରାମରେ ଶିଖ ଲୋକ ଅଧିକ ସଂଖ୍ୟାରେ ରହୁଥିବାରୁ ସେଠାରେ ରହିଛି ଗୁରୁଦ୍ୱାରା । କିନ୍ତୁ ମୁସଲମାନ ପରିବାରଙ୍କୁ ଇଦ ଏବଂ ପ୍ରତି ଶୁକ୍ରବାର ନମାଜ୍ ପାଇଁ ଯିବାକୁ ପଡ଼ିଥାଏ ୧୦ କିଲୋମିଟର ସମରାଲା ସହରରେ ଥିବା ମସଜିଦକୁ ।
Sambad is now on WhatsApp
Join and get latest news updates delivered to you via WhatsApp
ଗାଁର ମୁସଲମାନମାଙ୍କର ଏହି ସମସ୍ୟାକୁ ଶିଖ ସଂପ୍ରଦାୟର ଜୋଗା ସିଂ ଅନୁଭବ କଲେ ଏବଂ ଗ୍ରାମରେ ଏକ ମସଜିଦ୍ ନିର୍ମାଣ ପାଇଁ ଇଂଲଣ୍ଡରେ ଥିବା ତାଙ୍କ ଭାଇ ସଜ୍ଜନ ସିଂଙ୍କୁ ପ୍ରସ୍ତାବ ଦେଲେ । ସଜ୍ଜନ ମଧ୍ୟ ମସଜିଦ୍ ପାଇଁ ଟଙ୍କା ଦେବା ପାଇଁ ତୁରନ୍ତ ରାଜି ହୋଇଗଲେ। ୧୯୪୭ ମସହାରେ ଦଙ୍ଗା ସମୟରେ ଗ୍ରାମରେ ଥିବା ମସଜିଦ୍ ଭାଙ୍ଗି ଯାଇ ଥିବା ସ୍ଥାନରେ ଗ୍ରାମବାସୀ ମିଳିତ ଭାବେ ନୂତନ ମସଜିଦ୍ ନିର୍ମାଣ କଲେ । ଏହା ଦ୍ୱାରା ମୋର ସ୍ୱପ୍ନ ସାକାର ହୋଇଛି ବୋଲି କହିଛନ୍ତି ଗ୍ରାମରେ ରହୁଥିବା ଜଣେ ୮୦ ବର୍ଷର ବୃଦ୍ଧ ମୁସଲମାନ । ବର୍ତ୍ତମାନ ଏହି ଘଟଣାଟି ସାରା ଦେଶରେ ଏକ ବିରଳ ଉଦାହରଣ ସୃଷ୍ଟି କରିବା ସହ ସମାଜରେ ଜାତି ଧର୍ମ ନିର୍ବିଶେଷରେ ମିଳିତ ଭାବେ ରହିବାର ଶିକ୍ଷା ପ୍ରଦାନ କରିଛି।