ଭୁବନେଶ୍ବର: ସାନିଟାଇଜର ଠାରୁ ସାବୁନ ଭଲ । ସାବୁନରେ ହାତକୁ ୨୦ ସେକେଣ୍ଡ ପାଇଁ ଭଲଭାବରେ ଧୁଅନ୍ତୁ । ସାବୁନରେ ହାତ ଧୋଇଲେ ଭୂତାଣୁକୁ ମାରିବା ସହଜ ହେବ । କାରଣ ସାବୁନ ଫେଣ ହାତର ନଖ କୋଣ ଭିତରେ ପଶି ଭୂତାଣୁକୁ ମାରିପାରିବ ବୋଲି କହିଛନ୍ତି ରାଜ୍ୟ ଡିଏମ୍ଇଟି ତଥା ଖ୍ୟାତନାମା ଚିକିତ୍ସକ ଡାକ୍ତର ସି.ବି.କେ ମହାନ୍ତି ।
Sambad is now on WhatsApp
Join and get latest news updates delivered to you via WhatsApp
କରୋନା ଭୟ ବଢି ଚାଲିଥିବା ବେଳେ ସାଧାରଣ ଲୋକଙ୍କ ମନରେ ଏବେ ଗୋଟିଏ ପ୍ରଶ୍ନ ରହିଛି ସମସ୍ତେ ମାସ୍କ ପିନ୍ଧିବା ଜରୁରୀ କି ? ଆଉ ଏତିକି ବେଳେ ଡାକ୍ତର ସି.ବି.କେ ମହାନ୍ତି କହିଛନ୍ତି, ସମସ୍ତେ ମାସ୍କ ପିନ୍ଧିବା ଆଦୌ ଜରୁରୀ ନୁହେଁ । ଥଣ୍ଡା, କାଶ ଓ ଜ୍ୱରରେ ପୀଡିତ ବ୍ୟକ୍ତି ମାସ୍କ ପିନ୍ଧନ୍ତୁ ଏବଂ କରୋନା ଆକ୍ରାନ୍ତ ଓ ସନ୍ଦିଗ୍ଧଙ୍କ ପାଖରେ ରହୁଥିବା ବ୍ୟକ୍ତି ମାସ୍କ ପିନ୍ଧିବା ନିହାତି ଜରୁରୀ । ସୁସ୍ଥ ବ୍ୟକ୍ତି ମାସ୍କ ପିନ୍ଧିଲେ, ଅନ୍ୟମାନେ ଭୟଭୀତ ହେଉଥିବା ଡିଏମଇଟି କହିଛନ୍ତି ।
କାଶ ଓ ଛିଙ୍କ ବେଳେ ମୁହଁକୁ ରୁମାଲ ଓ ଟିସୁ ପେପରରେ ମୁହଁକୁ ଘୋଡେଇ ରଖନ୍ତୁ । କାଶିବା, ଛିଙ୍କିବା ପରେ ହାତ ନ ଧୋଇ ଆଖି ନାକ ଓ ପାଟିକୁ ସ୍ପର୍ଶ କରନ୍ତୁ ନାହିଁ । କାଶୁଥିବା ଓ ଛିଙ୍କୁଥିବା ଲୋକଙ୍କ ଠାରୁ ୧ ମିଟର ଦୂରତା ରକ୍ଷା କରନ୍ତୁ । ଗୋଟିଏ ସ୍ଥାନରେ ଏକାଧିକ ଲୋକ ଏକାଠି ହୁଅନ୍ତୁ ନାହିଁ । ନିଜେ ସଫା ରହିବା ସହ ନିଜ ଆଖପାଖ ଅଂଚଳକୁ ପରିସ୍କାର ପରିଚ୍ଛନ୍ନ ରଖନ୍ତୁ ବୋଲି ପରାମର୍ଶ ଦେଇଛନ୍ତି ଡିଏମଇଟିା ।
ସବୁ କାଶ, କଫ କରୋନା ଭୂତାଣୁ ଯୋଗୁଁ ହେଉଛି ତା’ ନୁହେଁ, କିନ୍ତୁ କାଶ, କଫ, ଥଣ୍ଡା ଓ ଜ୍ୱର ହେଲେ ନିଜ ସୁରକ୍ଷା ଦୃଷ୍ଟିରୁ ନିକଟସ୍ଥ ଡାକ୍ତରଖାନାରେ ଚିକିତ୍ସା କରାଇବା ଜରୁରୀ । ଡାକ୍ତରଙ୍କ ପରାମର୍ଶ କ୍ରମେ ଔଷଧ ସେବନ କରନ୍ତୁ ବୋଲି କହିଛନ୍ତି ଡାକ୍ତର ସି.ବି.କେ ମହାନ୍ତି ।