ଦିନେ ଦେବାକୁ ପଡୁଥିଲା ୯ ହଜାର ଟଙ୍କାର ବିଦ୍ୟୁତ ବିଲ, ଏବେ ସରକାରଙ୍କୁ ବିକୁଛନ୍ତି ବିଜୁଳି
ବାଙ୍ଗାଲୋର: ଦିନେ ଏମିତି ସମୟ ଥିଲା ଯେ ମାସ ଶେଷକୁ ୯ ହଜାର ଟଙ୍କାର ବିଦ୍ୟୁତ ବିଲ ଦେଉଥିଲେ, ହେଲେ ଏବେ ସେ ସରକାରଙ୍କୁ ବିଦ୍ୟୁତ ବିକୁଛନ୍ତି | କଥାଟି ଶୁଣିବାକୁ ଟିକେ ଅଜବ ଲାଗୁଥିଲେ ବି ଏକଥା ଏକଦମ ସତ | ଆଜି ଆମେ ଆପଣଙ୍କୁ ବାଙ୍ଗାଲୋରର ପୃଥ୍ଵୀ ମଙ୍ଗିରିଙ୍କ କଥା କହିବୁ ଯିଏ ସୌରଶକ୍ତି ଦ୍ୱାରା ନିଜେ ଆତ୍ମନିର୍ଭରଶୀଳ ହୋଇପାରିଛନ୍ତି | ପୃଥ୍ଵୀ ନିଜ ଘରର ଛାତରେ ସୋଲାର ପ୍ୟାନେଲ ଲଗାଇଛନ୍ତି | ଆଉ ଏହି ସୋଲାର ପ୍ୟାନେଲ ଦ୍ୱାରା ନିଜ ଘରର ଆବଶ୍ୟକତା ପୂରା ହେବା ସହ ବଳକା ବିଦ୍ୟୁତକୁ ସେ ବାଙ୍ଗାଲୋର ଇଲେକ୍ଟ୍ରିସିଟି ସପ୍ଲାଇ କମ୍ପାନୀ ଲିମିଟେଡ଼କୁ ବିକ୍ରୟ କରୁଛନ୍ତି |
Sambad is now on WhatsApp
Join and get latest news updates delivered to you via WhatsApp
ବାଙ୍ଗାଲୋରରେ ରହୁଥିବା ପୃଥ୍ଵୀ ମଙ୍ଗିରି ଯେତେବେଳେ ନିଜ ଘରର ଆସୁଥିବା ବିଦ୍ୟୁତ ବିଲକୁ ଦେଖିଲେ ସେ ଭାବିଥିଲେ ଯେ କିଭଳି ଏହାର ସମାଧାନ କରାଯାଇପାରିବ | ଆଉ ଦେଢ଼ ବର୍ଷ ପୂର୍ବେ ସେ ଘରର ଛାତରେ ପାଞ୍ଚ କିଲୋୱାଟର ସୋଲାର ପ୍ୟାନେଲ ଲଗାଇଥିଲେ | ଏଥିରେ ୧୫ଟି ସୋଲାର ପ୍ୟାନେଲ ଲଗାଯାଇଥିବାବେଳେ ପାଖାପାଖି ୫ ଲକ୍ଷ ଟଙ୍କା ଖର୍ଚ୍ଚ କରିବାକୁ ପଡିଥିଲା | ଆଉ ଏହି ପ୍ୟାନେଲ ଲଗାଇବା ଦ୍ୱାରା ଦେଢ଼ ବର୍ଷ ମଧ୍ୟରେ ପ୍ରାୟ ୧ ଲକ୍ଷ ଟଙ୍କାର ବିଦ୍ୟୁତ ବିଲ ଦେବାକୁ ପଡ଼ିନାହିଁ |
ବଡ କଥା ଯେ ନିଜ ଘର ପାଇଁ ବିଦ୍ୟୁତ ବ୍ୟବହାର ପରେ ବଳକା ପଡୁଥିବା ବିଦ୍ୟୁତକୁ ବାଙ୍ଗାଲୋର ଇଲେକ୍ଟ୍ରିସିଟି ସପ୍ଲାଇ କମ୍ପାନୀ ଲିମିଟେଡ଼ ନେଇଯାଇଥାଏ | ପୃଥ୍ଵୀଙ୍କ ଘରେ ଏକ ମିଟର ଲଗାଯାଇଥିବାବେଳେ ପାଖରେ ଥିବା ଟ୍ରାନ୍ସଫର୍ମରକୁ ଏହି ବିଦ୍ୟୁତ ନିଆଯାଇଥାଏ | ଯେତେ ପରିମାଣର ବିଦ୍ୟୁତ ନିଆଯାଇଥାଏ ସେହି ୟୁନିଟ ବାବଦରେ ପୃଥ୍ଵୀଙ୍କୁ ଟଙ୍କା ମଧ୍ୟ ଦିଆଯାଇଥାଏ |