ଦିନକୁ ୫୦ ହଜାର କଲ୍, ୨୨ ଘଣ୍ଟା ପର୍ଯ୍ୟନ୍ତ ପରିଶ୍ରମ: ମହାମାରୀ ବେଳେ ଭଗବାନ ସାଜି ଏମିତି ସାହାଯ୍ୟ କରୁଛନ୍ତି ସୋନୁ ସୁଦ୍
ନୂଆଦିଲ୍ଲୀ: ଦିନକୁ ଆସୁଛି ୫୦ ହଜାର କଲ୍…୨୪ ଘଣ୍ଟାରୁ ୨୨ ଘଣ୍ଟା ଧରି କାମ । ସଙ୍କଟ ବେଳେ ଏମିତି ସାହାଯ୍ୟ କରୁଛନ୍ତି ସୋନୁ । ଦିନକୁ ୫୦ ହଜାର କଲ୍, ୨୨ ଘଂଟା ପର୍ଯ୍ୟନ୍ତ ଅହରହ କାମ । ଦେଶର କୋଣ ଅନୁକୋଣରୁ ଯିଏ ଯେଉଁଠୁ ବି ସାହାଯ୍ୟ ମାଗୁଛି, ବିପଦ ବେଳର ବନ୍ଧୁ ସାଜି ସାହାଯ୍ୟର ହାତ ବଢାଉଛନ୍ତି ଅସହାୟଙ୍କ ଭଗବାନ ସୋନୁ ସୁଦ୍ ।
Sambad is now on WhatsApp
Join and get latest news updates delivered to you via WhatsApp
ସୋନୁ ସୁଦ, ଏବେ ଏହା କେବଳ ଏକ ନାଁ ନୁହେଁ, କୋଟି କୋଟି ଲୋକଙ୍କ ନିଶ୍ୱାସ, ବିଶ୍ୱାସ ଆଉ ହୃଦୟରେ ସାଇତା ହୋଇ ରହିଥିବା ସୁନ୍ଦର ସ୍ମୃତି ଟିଏ । ଗତ ୧୪ ମାସ ହେଲାଣି କଷ୍ଟ ଦେଇଚାଲିଛି କରୋନା । ଆଉ ସଙ୍କଟ ସମୟରେ ଅସହାୟଙ୍କ ଦେବଦୂତ ସାଜିଛନ୍ତି ସୋନୁ ସୁଦ୍ । ତେବେ ସମସ୍ତଙ୍କ ମନରେ ନିହାତି ଭାବେ ଜାଣିବାକୁ ଇଚ୍ଛା ରହିଥିବ, ଯେ ଜଣେ ମଣିଷ କୋଟି କୋଟି ଲୋକଙ୍କ ହୃଦୟ କେମିତି ଜିଣିଲେ । କେମିତି ଏତେ ଲୋକଙ୍କୁ ସାହାଯ୍ୟ କରୁଛନ୍ତି ସୋନୁ । ଏନେଇ ନିଜେ ପ୍ରତିକ୍ରିୟା ରଖିଛନ୍ତି ସୋନୁ ସୁଦ୍ ।
ଏକ ଜାତୀୟ ଗଣମାଧ୍ୟମକୁ ସାକ୍ଷାତକାର ଦେଇ ସୋନୁ କହିଛନ୍ତି, ଏଭଳି ସଙ୍କଟ ସମୟରେ ସମସ୍ତେ ସମସ୍ତଙ୍କୁ ସାହାଯ୍ୟ କରିବା ଦରକାର । ସେ କେମିତି ଏତେ ଲୋକଙ୍କୁ ସାହାଯ୍ୟ କରୁଛନ୍ତି ସେ ନିଜେ ବି ଜାଣିପାରୁନାହାନ୍ତି । ଦିନର ୨୪ ଘଂଟାରୁ ୨୨ ଘଂଟା ଧରି ଅହରହ ଲୋକଙ୍କୁ ସାହାଯ୍ୟ କରିବା କାମ କରୁଛନ୍ତି ସୋନୁ । ସେ କହିଛନ୍ତି ଦିନକୁ ତାଙ୍କୁ ୪୦ ହଜାରରୁ ୫୦ ହଜାର କଲ ଆସୁଛି ।
ସୋନୁ ନିଜର ଏକ ଟିମ୍ ତିଆରି କରିଛନ୍ତି । ଏହି ଟିମ୍ ଅଲଗା ଅଲଗା ସହରରେ କାମ କରୁଛନ୍ତି । ପ୍ରତିଦିନ ଦେଶର ବିଭିନ୍ନ ଡାକ୍ତରଙ୍କ ସହ ଫୋନରେ କଥା ହୁଅନ୍ତି ସୋନୁ । କେମିତି କରୋନା କବଳରୁ ଲୋକଙ୍କ ଜୀବନ ସୁରକ୍ଷିତ ରହିପାରିବ, ସେ ଦିଗରେ ସୋନୁ ଅହରହ କାମ କରନ୍ତି । ବେଡ୍ ଯୋଗାଡ କରିବା, ଆବଶ୍ୟକ କରୁଥିବା ଲୋକଟିଏ ପାଖରେ ଅକ୍ସିଜେନ୍ ପହଞ୍ଚାଇବା ଏବଂ ଜୀବନ ମରଣ ସହ ସଂଘର୍ଷ କରୁଥିବା ଲୋକଟିଏ ପାଖରେ ଔଷଧ ପହଂଚାଇଦିଅନ୍ତି ସୋନୁ ।
ସୋନୁ କୁହନ୍ତି, ଯଦି ସମୁଦ୍ରରେ କେହି ବୁଡିଯାଉଛି, ତେବେ ସାହାଯ୍ୟ ପାଇଁ ସମୁଦ୍ର ଭିତରକୁ ଡେଇଁବାକୁ ପଡିବ । ସମୁଦ୍ରର ଢେଉ ଆଉ ଲହରି ଆପଣଙ୍କୁ ପହଁରା ଶିଖାଇଦେବ । ସତରେ, ପରଦାର ଏହି ଖଳନାୟକ, ସତ ଜୀବନରେ କିନ୍ତୁ ନାୟକ ସାଜିଛନ୍ତି । ଆଉ ସେଇଥିପାଇଁ ତ କୋଟି କୋଟି ଭାରତୀୟଙ୍କ ହୃଦୟ ଭିତରେ ସ୍ୱତନ୍ତ୍ର ଜାଗାଟିଏ କିଣିପାରିଛନ୍ତି ହୃଦୟର ହିରୋ ସୋନୁ ସୁଦ୍ । ଆଉ ପୂରା ଦୁନିଆ ଆଜି ସୋନୁଙ୍କୁ ସଲ୍ୟୁଟ୍ କରୁଛି ।