ତୁ ଏତେ ବାଟରୁ ଆସିଛୁ, ତୋ ଦେହରେ କରୋନା ଭୂତାଣୁ ଥିବ ! ଏଭଳି କହି ୨ ମାସ ପରେ ଫେରିଥିବା ୮୦ବର୍ଷର ମା’କୁ ଘରେ ଭର୍ତ୍ତି କରାଇବାକୁ ମନା କରିଦେଲା ପୁଅ
କରିମନଗର: ମରିଗଲାଣି କି ମାନବିକତା ? କରୋନା ସଂକ୍ରମଣରୁ ନିଜକୁ ରକ୍ଷା କରିବା ପାଇଁ ଲୋକ ନିଜ ମାନବିକତା ଭୁଲିବାରେ ଲାଗିଛନ୍ତି | କରୋନା ଦେଶକୁ ଲକଡାଉନ କରିବା ସହ ରକ୍ତ ସମ୍ପର୍କକୁ ମଧ୍ୟ ଲକଡାଉନ କରି ଦେଇଛି। ଏଭଳି ଏକ ଉଦାହରଣ ତେଲେଙ୍ଗାନାରେ ଦେଖିବାକୁ ମିଳିଛି | ତେଲେଙ୍ଗାନାର କରିମନଗରରେ ଅମାନବିକତାର ଏକ ଦୃଶ୍ୟ ଦେଖିବାକୁ ମିଳିଛି | ମା’ ଓ ପୁଅ ମଧ୍ୟରେ ଥିବା ସମ୍ପର୍କରେ ବାଧା ସାଜିଛି କରୋନା | ସଂକ୍ରମଣ ଭୟରେ ନିଜର ୮୦ବର୍ଷୀୟା ବୃଦ୍ଧା ମା’କୁ ଘର ଭିତରକୁ ଆସିବାକୁ ନ ଦେବା ସହ ପୁଅ କବାଟ ବନ୍ଦ କରିଦେବା ଘଟଣା ସମସ୍ତଙ୍କ ଆଖିରେ ଲୁହ ଆଣି ଦେଇଛି |
Sambad is now on WhatsApp
Join and get latest news updates delivered to you via WhatsApp
ପୁଅର ଏଭଳି ବ୍ୟବହାରର ଶିକାର ହୋଇଥିବା ବୃଦ୍ଧାଙ୍କ ନାଁ କଟା ଶ୍ୟାମଲା। ସେ ଶୁକ୍ରବାର ଶୋଲାପୁରରୁ ନିଜ ଘରକୁ ଫେରିଥିଲେ | ଲକଡାଉନ ପୂର୍ବରୁ ଶ୍ୟାମଲା ଜଣେ ସମ୍ପର୍କୀୟଙ୍କ ଘରକୁ ବୁଲିବା ପାଇଁ ଯାଇଥିଲେ | ପରେ ଲକଡାଉନ ଘୋଷଣା ହେବାରୁ ସେ ସେଠାରେ ଫସି ରହିଥିଲେ | ଏବେ ସରକାର ଯାତାୟତକୁ ଅନୁମତି ଦେବାରୁ ଶ୍ୟାମଲା ଏକ କାର ଯୋଗେ ହାଇଦ୍ରାବାଦ ଆସିବା ସହ ସେଠାରୁ ବସ ଯୋଗେ ନିଜ ଘର କରିମନଗର ଆସି ପହଞ୍ଚିଥିଲେ |
ଏତେ ଦିନ ନିଜ ପୁଅ ଓ ପରିବାରଠାରୁ ଶ୍ୟାମଲା ଦୂରରେ ରହିଥିବା ବେଳେ ସେମାନଙ୍କୁ ଭେଟିବା ପାଇଁ ସେ ଘର ବାହାରେ ପହଞ୍ଚିବା ପରେ କବାଟ ବନ୍ଦ କରିଦେଇଥିଲା ପୁଅ | ତୁ ଏତେ ବାଟରୁ ଆସିଛୁ, ତୋ ଭିତରେ କରୋନା ଭୂତାଣୁ ଥାଇ ପାରେ ବୋଲି କହି ଶ୍ୟାମଲାଙ୍କୁ ତାଙ୍କ ପୁଅ ଭିତରକୁ ଯିବାକୁ ଦେଇ ନଥିଲେ | ହାତରେ ହୋମ କ୍ଵାରେଣ୍ଟାଇନର ଷ୍ଟାମ୍ପ ଥାଇ ମଧ୍ୟ ତାଙ୍କ ପୁଅ ନିଜ ୮୦ବର୍ଷର ବୃଦ୍ଧା ମା’କୁ ବାହାରେ ବସିବାକୁ ବାଧ୍ୟ କରିଦେଇଥିଲେ | ସକାଳ ୭ଟାରୁ ମଧ୍ୟାହ୍ନ ୧ଟା ପର୍ଯ୍ୟନ୍ତ ଟାଣ ଖରାରେ ବସି ରହିବା ସହ ସ୍ଥାନୀୟ ବାସିନ୍ଦା ଏବଂ କର୍ପୋରେଟରଙ୍କ ପରାମର୍ଶ ପରେ ଶ୍ୟାମଲାଙ୍କ ପୁଅ ତାଙ୍କୁ ଘର ଭିତରକୁ ନେବାକୁ ରାଜି ହୋଇଥିଲା |