ଇନ୍ଷ୍ଟାରେ ଏଭଳି ରିଜ୍ୟୁମ ତିଆରି କଲେ ୨୦ବର୍ଷୀୟ ଯୁବତୀ, ତୁରନ୍ତ ମିଳିଲା ଚାକିରିର ପ୍ରସ୍ତାବ, ଦେଖନ୍ତୁ ରିଜ୍ୟୁମର ଝଲକ
ନୂଆଦିଲ୍ଲୀ : ଦେଶରେ ସବୁଠାରୁ ବଡ଼ ସମସ୍ୟା ପାଲଟିଛି ବେରୋଜଗାରୀ । ପିଲାମାନେ ବଡ଼ ବଡ଼ ଡିଗ୍ରି ହାସଲ କରି ମଧ୍ୟ ଘରେ ବସି ରହୁଛନ୍ତି । ସରକାରୀ ହେଉ ବା ବେସରକାରୀ ସବୁ କ୍ଷେତ୍ରରେ ଚାକିରିର ଅଭାବ ଥିବାରୁ ଯୁବପିଢ଼ି ଏବେ ଚିନ୍ତାରେ । କିନ୍ତୁ ଏତେ ଭିଡ଼ ଭିତରେ ଜଣେ ୨୦ବର୍ଷୀୟ ଯୁବତୀଙ୍କୁ ସହଜରେ ଚାକିରି ମିଳିଯିବା ଖବରକୁ ନେଇ ଏବେ ଚର୍ଚ୍ଚା ଆରମ୍ଭ ହୋଇଛି । ଯୁବତୀଙ୍କ ରିଜ୍ୟୁମ ତିଆରି କରିବା ଶୈଳୀକୁ ଦେଖି ତାଙ୍କୁ ଏବେ ଡେଲାଇଟ୍ ଇଣ୍ଡିଆରେ ଚାକିରି ମିଳି ଯାଇଥିବା ଜଣା ପଡ଼ିଛି । ଏତେ କମ ବୟସରେ ଏତେ ଭଲ ଚାକିରି କରିବା ତାଙ୍କ ପାଇଁ ସହଜ ନଥିବା ବେଳେ ତାଙ୍କର ଭିନ୍ନ ଚିନ୍ତାଧାରା ଆଜି ତାଙ୍କୁ ଏଠାରେ ପହଞ୍ଚାଇଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଅଙ୍କିତା ଚାଓ୍ଵଲାଙ୍କ ସବୁ ସାଙ୍ଗମାନଙ୍କୁ ଚାକିରି ମିଳି ଯାଉଥିବା ବେଳେ ଅଙ୍କିତା ଗୋଟେ ଚାକିରି ପାଇଁ ସଂଘର୍ଷ କରି ଚାଲିଥିଲେ । ବାରମ୍ବାର ସଂଘର୍ଷ କରିବା ପରେ ମଧ୍ୟ ତାଙ୍କୁ ଚାକିରି ମିଳି ନଥିଲା । ପରେ ସେ କିଛି ଅଲଗା କରି ଚାକିରି ପାଇବା ପାଇଁ ଚିନ୍ତା କରିଥିଲେ । ଯାହା ପାଇଁ ସେ ନିଜ ରିଜ୍ୟୁମ ଭିନ୍ନ ଧରଣର କରିବା ପାଇଁ ଚିନ୍ତା କରିଥିଲେ । ଚାକିରି ପାଇଁ ସମସ୍ତେ ଆବେଦନ କରୁଥିବା ରିଜ୍ୟୁମର ଶୈଳୀଠାରୁ ସଂପୂର୍ଣ୍ଣ ଭିନ୍ନ ଥିଲା ଅଙ୍କିତାଙ୍କ ରିଜ୍ୟୁମ । ଏହାକୁ ସେ କୌଣସି ଚାକିରି ପାଇବା େଓ୍ଵବ୍ସାଇଟ୍ରେ ନ ଛାଡ଼ି ନିଜ ଇନ୍ଷ୍ଟାରେ ସେୟାର କରିଥିଲେ । ରିଜ୍ୟୁମକୁ ଡିଜାଇନ କରିବା ପାଇଁ ଅଙ୍କିତାଙ୍କୁ ୬୦ଘଣ୍ଟା ସମୟ ଲାଗିଥିବା ବେଳେ ଅଙ୍କିତାଙ୍କ ରିଜ୍ୟୁମ ଅନେକ ବଡ଼ ବଡ଼ କମ୍ପାନୀକୁ ପସନ୍ଦ ଆସିଥିଲା । ବିଭିନ୍ନ କମ୍ପାନୀରୁ ଅଙ୍କିତାଙ୍କୁ ଚାକିରିର ଅଫର ଆସିଥିବା ବେଳେ ସେ ଡେଲାଇଟ୍ ଇଣ୍ଡିଆର ଅଫରକୁ ଗ୍ରହଣ କରିଥିଲେ । ଏବେ ସେ ସେଠାରେ ଭିଜୁଆଲ କଣ୍ଟେଣ୍ଟ କ୍ରିଏଟର ଭାବେ କାମ କରୁଥିବା ଜଣାପଡ଼ିଛି ।
ତେବେ ଅଙ୍କିତା ଅନ୍ୟମାନଙ୍କଠାରୁ ଟିକେ ଅଲଗା ଚିନ୍ତା କରୁଥିବାରୁ ତାଙ୍କୁ ସହଜରେ ଚାକିରି ମିଳି ଯାଇଥିଲା । ଯଦି ଆପଣଙ୍କ ମଧ୍ୟରେ କିଛି ଭିନ୍ନ ବା ଅଲଗା କରିବାର ଇଚ୍ଛା ରହିଛି, ତେବେ ସମାଲୋଚନାକୁ ନ ଡ଼ରି ତାକୁ ପରିପ୍ରକାଶ କରନ୍ତୁ ।