କାର୍ଗିଲ ଯୁଦ୍ଧ କ୍ଷେତ୍ରକୁ ଯବାନଙ୍କୁ ନେବା ଆଣିବାର ଦାୟିତ୍ୱ ଦିଆଯାଇଥିଲେ ମଧ୍ୟ ଦେଶ ପାଇଁ ଲଢ଼ିଥିଲେ ରାମ ରତନ, ୨୯ପାକିସ୍ତାନୀ ଯବାନଙ୍କୁ ହତ୍ୟା କରି ପାଲଟିଥିଲେ ହିରୋ
ରାଞ୍ଚି : ଆସନ୍ତା କାଲି (ଶୁକ୍ରବାର) କାର୍ଗିଲ ବିଜୟ ଦିବସ ଥିବା ବେଳେ ଏବେ ଅବସର ନେଇ ସାରିଥିବା ହାବିଲଦାର ରାମ ରତନ ମହତୋ ଯୁଦ୍ଧ ସମୟକୁ ମନେ ପକାଇଛନ୍ତି । ଯବାନମାନଙ୍କୁ ଯୁଦ୍ଧ କ୍ଷେତ୍ରକୁ ନେବା-ଆଣିବା କରିବାର ଦାୟିତ୍ୱ ରାମଙ୍କୁ ଦିଆଯାଇଥିବା ବେଳେ ସେ ନିଜର ଦାୟିତ୍ୱ ସୂଚାରରୁପେ ତୁଲାଇ ଥିଲେ । କିନ୍ତୁ ଯେତେବେଳେ ପାକିସ୍ତାନୀ ଯବାନମାନେ ଭାରତୀୟ ଯବାନମାନଙ୍କୁ ଆକ୍ରମଣ କରିବାକୁ ଆସୁଥିବା ଦେଖିଥିଲେ, ତାଙ୍କ ମଧ୍ୟରେ ଥିବା ଦେଶପ୍ରେମ ଜାଗ୍ରତ ହୋଇଥିଲା । ଏକା ସେ ଶତ୍ରୁର ଗୁଳିକୁ ନ ଡ଼ରି ୨୯ପାକିସ୍ତାନୀ ଯବାନଙ୍କୁ ଗୁଳି କରି ହତ୍ୟା କରିଥିଲେ । ତାଙ୍କର ଏଭଳି ସାହାସିକତା ତାଙ୍କୁ ରାତା ରାତି କାର୍ଗିଲ ଯୁଦ୍ଧର ହିରୋ ବନାଇ ଦେଇଥିଲା । ସେ ଦିନ ସେ ଅନେକ ଯବାନଙ୍କୁ ନୂଆ ଜୀବନ ଦେଇଥିଲେ ।
Sambad is now on WhatsApp
Join and get latest news updates delivered to you via WhatsApp
କାର୍ଗିଲ ଯୁଦ୍ଧର ସେ ରାତିକୁ ମନେ ପକାଇ ରାମ ରତନ କହିଛନ୍ତି, ମୁଁ ମୋଟର ଗରାଜ୍ରେ ଏକା ଥିବା ବେଳେ ଶତ୍ରୁକୁ ରାତି ୧୨ଟା ୩୦ମିନିଟ୍ରେ ମୋ ସହ ଆସିଥିବା ଯବାନମାନଙ୍କ ଆଡ଼କୁ ବଢ଼ୁଥିବା ଦେଖିଥିଲି । ଯଦି ସେମାନେ ସେଠାରେ ପହଞ୍ଚିଯିବେ, ତେବେ ଭାରତୀୟ ସେନାର ବହୁତ କ୍ଷତି ହେବ ବୋଲି ଭାବି ମୋ ପାଖରେ ଥିବା ଲାଇଟ୍ ମେସିନ୍ ଗନ୍ ସାହାଯ୍ୟରେ ମୁଁ ସେମାନଙ୍କ ଉପରକୁ ଗୁଳି ବର୍ଷା କରିବା ଆରମ୍ଭ କରି ଦେଇଥିଲି । ପାଖା ପାଖି ୨୯ଜଣ ଶତ୍ରକୁ ମୁଁ ନିପାତ କରିବାରେ ସଫଳ ହୋଇଥିଲି । ପରେ ସମସ୍ତଙ୍କୁ ଏ ନେଇ ଜଣା ପଡ଼ିବା ପରେ ଭାରତୀୟ ସେନାର ବରିଷ୍ଠ ଅଧିକାରୀ ମୋତେ ଧରି ନାଚିବା ସହ ମୋତେ ହିରୋ ବୋଲି ସମ୍ବୋଧନ କହିଥିଲେ ।