ନୂଆଦିଲ୍ଲୀ : ପରିବେଶକୁ ପ୍ରଦୂଷିତ କରୁଥିବାରୁ କିଛି ଦିନ ତଳେ ସରକାର ପ୍ଲାଷ୍ଟିକ୍‌ର ବ୍ୟବହାର ଉପରେ କଟକଣା ଲଗାଇଥିଲେ । ପ୍ଲାଷ୍ଟିକ୍‌ ପରିବର୍ତ୍ତେ କାଗଜ ଠୁଙ୍ଗାର ବ୍ୟବହାର ଆରମ୍ଭ କରିବା ପାଇଁ ସରକାର ଆଦେଶ ଦେଇଥିଲେ । କିନ୍ତୁ ଦେଶର ବିଭିନ୍ନ ସ୍ଥାନରେ ଏବେ ବି ପ୍ଲାଷ୍ଟିକ୍‌ର ବ୍ୟବହାର କରା ଯାଉଥିବା ବେଳେ ଏହାର ପୁନଃବ୍ୟବହାର କିପରି କରାଯାଇ ପାରିବ, ସେ ନେଇ ଚିନ୍ତାରେ ସରକାର । ତେବେ ଏତେ ସବୁ ମଧ୍ୟରେ ଫ୍ରାନ୍ସର ଜଣେ ଆବିଷ୍କାରକ ଯେଉଁ ଚମତ୍କାର କରିଛନ୍ତି ତାହା ବିଶ୍ୱର ଏକ ବଡ଼ ସମସ୍ୟାର ସମାଧାନ କରି ପାରିବ ବୋଲି ଆଶା କରାଯାଉଛି । ବ୍ୟବହାର ହୋଇ ସାରିଥିବା ପ୍ଲାଷ୍ଟିକ୍‌କୁ ପୁନଃ ବ୍ୟବହାର କରି ସେଥିରୁ ପେଟ୍ରୋଲ ଏବଂ ଡିଜେଲ ବାହାର କରାଯାଇ ପାରୁଥିବା ଏକ ମେସିନ୍‌ ତିଆରି କରି ଏବେ ଚର୍ଚ୍ଚାରେ ରହିଛନ୍ତି କ୍ରିଷ୍ଟୋଫର୍‌ କସ୍‌ଟେସ୍‌ ।

Advertisment

publive-image Bangkok Post

ଫ୍ରାନ୍ସରେ ରହୁଥିବା କ୍ରିଷ୍ଟୋଫର୍‌ଙ୍କ କହିବା ଅନୁଯାୟୀ, ସେ ଏକ ଏମିତି ମେସିନ୍‌ ତିଆରି କରିଛନ୍ତି, ଯାହା ଅଧିକ ପରିମାଣର ପ୍ଲାଷ୍ଟିକ୍‌କୁ ତରଳ ଇନ୍ଧନରେ ପରିବର୍ତ୍ତନ କରି ପାରିବ । ପ୍ଲାଷ୍ଟିକ୍‌କୁ ମେସିନ୍‌ ଭିତରେ ରଖା ଯାଇ ତାହାକୁ ଅଧିକ ତାପମାତ୍ରାରେ ତରଳାଇ ଦିଆଯିବ । ତରଳିବା ପରେ ସେଥିରୁ ୬୫ପ୍ରତିଶତ ଡିଜେଲ ବାହାରିବ, ଯାହାକୁ ଜେନେରେଟର ଏବଂ ଡଙ୍ଗାରେ ବ୍ୟବହାର କରାଯାଉଥିବା ମୋଟରକୁ ଚଲାଇବାରେ ବ୍ୟବହାର କରାଯାଇ ପାରିବ । ଏହା ସହ ୧୮ପ୍ରତିଶତ ପେଟ୍ରୋଲ ବାହାରିବ ଯାହାକୁ ଲଣ୍ଠନ ଜଳାଇବାରେ ବ୍ୟବହାର କରାଯାଇ ପାରିବ । ଏହି ତରଳାଇବାର ପ୍ରକ୍ରିୟାକୁ ପାଇରୋଲାଇଜିଙ୍ଗ୍‌ର ନାଁ ଦେଇଛନ୍ତି କ୍ରିଷ୍ଟୋଫର୍‌ । ପାଇରୋଲାଇଜିଙ୍ଗ୍‌ ପ୍ରକ୍ରିୟାରେ ପ୍ଲାଷ୍ଟିକ୍‌କୁ ହାଇଡ୍ରୋକାର୍ବନରେ ପରିବର୍ତ୍ତନ କରାଯାଇଥାଏ । ଏହା ପରେ ତାହା ଡିଷ୍ଟିଲେସନ ଟାଓ୍ଵାରକୁ ଯିବା ସହ ପେଟ୍ରୋଲ ଏବଂ ଡିଜେଲ ଅଲଗା ହୋଇ ଯାଇଥାଏ । ମେସିନ ଦ୍ୱାରା ଗୋଟେ କିଲୋ ପ୍ଲାଷ୍ଟିକ୍‌ରୁ ଗୋଟେ ଲିଟର ଡିଜେଲ ଏବଂ ପେଟ୍ରୋଲ ବାହାରି ପାରିବ ବୋଲି ଦାବି କରିଛନ୍ତି କ୍ରିଷ୍ଟୋଫର୍‌ ।