କିନ୍ନର ବୋଲି ଜାଣି ପରିବାର ଲୋକେ ହାତ ଛାଡ଼ିବା ପରେ ସହାୟତାର ହାତ ବଢ଼ାଇଲେ ସରକାର, ପୂରଣ ହେବ ଆଦାମ୍ଙ୍କ ପାଇଲଟ ହେବା ସ୍ୱପ୍ନ
ଥିରୁବନନ୍ତପୁରମ୍ : ଛୋଟ ବେଳୁ ନିଜ ଲିଙ୍ଗକୁ ନେଇ ସନ୍ଦେହରେ ଥିଲେ ମଧ୍ୟ କେବେ ବି ସେ ନିଜ ସ୍ୱପ୍ନକୁ ନେଇ ସନ୍ଦେହ କରି ନ ଥିଲେ । ବଡ଼ ହୋଇ ସେ ଜଣେ ପାଇଲଟ୍ ହେବେ ବୋଲି ଇଚ୍ଛା ରଖିଥିବା ବେଳେ ତାକୁ ପୂରା କରିବା ପାଇଁ ସେ ଅନେକ ସଂଘର୍ଷ କରିଥିଲେ । ଯାହା ଆଜି ସଫଳ ହୋଇଛି । ଆଜି ଆମେ ଏଠାରେ କେରଳର ଆଦାମ୍ ହେରିଙ୍କ ବିଷୟରେ କହୁଛୁ । ଛୋଟ ବେଳେ ସେ ନିଜ ଲିଙ୍ଗକୁ ନେଇ ସନ୍ଦେହରେ ଥିବା ବେଳେ ଧିରେ ଧିରେ ତାଙ୍କ ସନ୍ଦେହ ଦୂର ହୋଇଥିଲା । ପୁରୁଷ ହୋଇ ମଧ୍ୟ ତାଙ୍କ ଭିତରେ ଜଣେ ମହିଳାର ସବୁ ହାବଭାବ ଥିବା ଜାଣି ପାରିଥିଲେ ଆଦାମ୍ । ନିଜକୁ ସେ କିନ୍ନର ଭାବେ ଗ୍ରହଣ କରି ନେଇଥିଲେ ମଧ୍ୟ ତାଙ୍କ ପରିବାର ଲୋକେ ଏହାକୁ ଗ୍ରହଣ କରି ପାରି ନ ଥିଲେ । ଯାହା ଦ୍ୱାରା ତାଙ୍କୁ ନିଜ ସ୍ୱପ୍ନକୁ ପୂରା କରିବା ପାଇଁ ଅନେକ କଷ୍ଟ କରିବାକୁ ପଡ଼ିଥିଲା ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଦ୍ୱାଦଶ ପାଠ୍ୟକ୍ରମ ଶେଷ କରିବା ପରେ ସେ ନିଜ ସ୍ୱପ୍ନ ପୂରା କରିବା ପାଇଁ ଦକ୍ଷିଣ ଆଫ୍ରିକା ଚାଲି ଯାଇଥିଲେ । ସେଠାରେ ସେ ଏକ ବିମାନ ଏକାଡେମିରେ ପାଇଲଟ୍ ବନିବା ପାଇଁ ପଢ଼ିବା ଆରମ୍ଭ କରିଥିଲେ । ପ୍ରଥମେ ପରିବାର ଲୋକେ ଋଣ କରି ପଢ଼ିବା ପାଇଁ ଟଙ୍କା ଦେଉଥିବା ବେଳେ ଆଦାମ୍ ଜଣେ କିନ୍ନର ବୋଲି ଜାଣି ଟଙ୍କା ପଠାଇବା ବନ୍ଦ କରି ଦେଇଥିଲେ । ପରିବାର ପକ୍ଷରୁ ଆର୍ଥିକ ସହାୟତା ନ ମିଳିବାରୁ ରାସ୍ତାରେ ଶୋଇବା ସହ ଅଜବ ଅଜବ କାମ କରି ଟଙ୍କା ରୋଜଗାର କରିବାକୁ ଲାଗିଥିଲେ ଆଦାମ୍ । ବହୁ କଷ୍ଟରେ ସେ ନିଜର ପାଠ୍ୟକ୍ରମ ପୂରା କରି ଘରୋଇ ବିମାନ ଉଡ଼ାଣ ପାଇଁ ଲାଇସେନ୍ସ ପ୍ରାପ୍ତ କରିଥିଲେ । ୨୦୧୭ରେ ସେ ଘରକୁ ଫେରିବା ପରେ ତାଙ୍କ ପରିବାର ଲୋକେ କିନ୍ନର ହୋଇଥିବା କଥା କାହାକୁ ନ ଜଣାଇବା ପାଇଁ ଚାପ ପକାଇବା ଆରମ୍ଭ କରିଥିଲେ । ଏମିତି କି ଆଦାମ୍କୁ ଘରେ ବନ୍ଦୀ କରି ରଖାଯିବା ସହ ମାନସିକ ନିର୍ଯ୍ୟାତନା ମଧ୍ୟ ଦିଆଯାଇଥିଲା ।
କିନ୍ତୁ ଗତ ବର୍ଷ ସେ ନିଜ ଘରୁ ଲୁଚି ପଳାଇ ଆସିବାରେ ସଫଳ ହୋଇଥିଲେ । ଘରୁ ଆସି ଚାକିରି ଖୋଜିଥିଲେ ମଧ୍ୟ ତାଙ୍କୁ ସହଜରେ ଚାକିରି ମିଳି ନଥିଲା । ଘରୋଇ ବିମାନ ଉଡ଼ାଣ ପାଇଁ ଲାଇସେନ୍ସ ପାଇଥିଲେ ମଧ୍ୟ ତାଙ୍କୁ ଚାକିରି ମିଳିବା ପାଇଁ ସମୟ ଲାଗିଥିଲା । ପରିସ୍ଥିତିକୁ ଦେଖି ସେ ବ୍ୟାବସାୟିକ ବିମାନ ଉଡ଼ାଣ ପାଇଁ ଲାଇସେନ୍ସ କରିବେ ବୋଲି ମନସ୍ଥ କରିଥିଲେ । ତାଙ୍କର ଏଭଳି ସ୍ୱପ୍ନ ପୂରା କରିବା ପାଇଁ ଆର୍ଥିକ ସହାୟତା ଦରକାର ଥିବା ବେଳେ ଗୁରୁବାର କେରଳ ସରକାର ୨୩ଲକ୍ଷ ଟଙ୍କାର ସହାୟତା ରାଶି ଦେଇଥିବା ଜଣା ପଡ଼ିଛି । ଖୁବ୍ ଶୀଘ୍ର ସେ ନିଜର ୩ବର୍ଷିଆ ପାଠ୍ୟକ୍ରମ ଆରମ୍ଭ କରିବା ସହ ବ୍ୟବସାୟିକ ବିମାନ ଉଡ଼ାଇବେ ବୋଲି ଜଣାପଡ଼ିଛି ।
ସରକାରଙ୍କ ପକ୍ଷରୁ ସାହାଯ୍ୟ ପାଇ ଆଦାମ୍ କହିଛନ୍ତି, ମୁଁ କେରଳ ସରକାରଙ୍କୁ ଧନ୍ୟବାଦ୍ ଜଣାଇବି । ତାଙ୍କ ପାଇଁ ମୋ ସ୍ୱପ୍ନ ଆଜି ସତ ହେବାକୁ ଯାଉଛି ।