ହଠାତ୍ ଅଟକିଗଲା ଚଳନ୍ତା ଟ୍ରେନ୍; ଖୋଲିଲାନି ଦ୍ବାର, ଘଣ୍ଟାଘଣ୍ଟା ଧରି ହନ୍ତସନ୍ତ ହେଲେ ଯାତ୍ରୀ, ନକରିବା କାମ ବି କଲେ…
ନୂଆଦିଲ୍ଲୀ: ବିଦୁତ୍ କାଟ ହେବାରୁ ଟ୍ରାକ ମଝିରେ ଅଟକି ଗଲା ଟ୍ରେନ୍ । ଯାହାଦ୍ବାରା ଟ୍ରେନରେ ପୂରା ଅନ୍ଧାର ହୋଇଗଲା । ଘଣ୍ଟାଘଣ୍ଟା ଧରି ଗୋଟିଏ ସ୍ଥାନରେ ଟ୍ରେନଟି ଛିଡ଼ାହୋଇ ରହିଲା । ଏପରିକି ଶୌଚାଳୟର କବାଟ ମଧ୍ୟ ଖୋଲି ନ ଥିଲା, ଫଳରେ ଯାତ୍ରୀମାନେ ଟ୍ରେନ୍ ଭିତରେ ମୁତ୍ରତ୍ୟାଗ କରିବାକୁ ବାଧ୍ୟ ହୋଇଥିଲେ । ଯାତ୍ରୀମାନେ ଟ୍ରେନ୍ ସମ୍ବଦ୍ଧରେ କୌଣସି ପ୍ରକାରର ସୂଚନା ମଧ୍ୟ ପାଇପାରି ନଥିଲେ । ଏଭଳି ଏକ ଘଟଣା ବ୍ରିଟେନର ଘଟିଥିବା ଜଣାପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ, ମେ ୭ତାରିଖ ଦିନ ଏକ ଟ୍ରେନ୍ ଲିଭରପୁଲ୍ ସହରରୁ ମଞ୍ଚେଷ୍ଟର୍ ପିକାଡିଲୀ ହୋଇ ଉଇଲମସ୍ଲୋ ଯାଉଥିଲା। ହଠାତ୍ ରାସ୍ତାରେ ରହିଗଲା । ରାତି ସାଢେ ଦଶଟା ବେଳକୁ ବିଦ୍ୟୁତ୍ କାଟ ହୋଇଥିଲା । ଫଳରେ ବିଦ୍ୟୁତ୍ ଚାଳିତ ଟ୍ରେନର ସବୁ ସେବା ବନ୍ଦ ହୋଇଯାଇଥିଲା । ଟ୍ରେନ୍ ଭିତରେ ଥିବା ଯାତ୍ରୀ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଥିଲେ । ପାଖାପାଖି ଅଢେଇ ଘଣ୍ଟା ଧରି ଟ୍ରେନ ଗୋଟିଏ ସ୍ଥାନରେ ଛିଡ଼ାହୋଇଥିଲା । ଏନେଇ ଯାତ୍ରୀମାନଙ୍କୁ କୌଣସି ସୂଚନା ଦିଆଯାଇନଥିଲା । ଲୋକଙ୍କୁ ବାହାରକୁ ବାହରକରିବାକୁ ଅନ୍ୟ ଏକ ଟିମ୍ ପହଞ୍ଚିଥିଲେ ।
ଜଣେ ଯାତ୍ରୀ ନିଜର ପରିଚୟ ଲୁଚାଇ ଗଣମାଧ୍ୟମ ଆଗରେ ପ୍ରତିକ୍ରିୟା ଦେଇ କହିଲେ ଟ୍ରେନରେ ଥିବା ମହିଳା ଯାତ୍ରୀମାନେ ଶୌଚାଳୟ ଯାଇ ପାରୁନଥିବା ବେଳେ ପୁରୁଷମାନେ ଟ୍ରେନର ସିଙ୍କ୍ ଓ ଚଟାଣ ଉପରେ ମୂତ୍ରତ୍ୟାଗ କରିଥିଲେ । କେତେସମୟ ଧରି ସେମାନେ ସେଠାରେ ଫସି ରହିବେ ତାହା ମଧ୍ୟ ଜାଣି ନଥିଲେ । ସେଠାରେ ଟ୍ରେନର ଜଣେ ମାତ୍ର କର୍ମଚାରୀ ଉପସ୍ଥିତ ଥିଲେ । ତେବେ ସେ ଟ୍ରେନ ରହିବାର ଏକ ଘଣ୍ଟା ପରେ ଯାତ୍ରୀଙ୍କ ନିକଟକୁ ଆସିଥିଲେ । ଟ୍ରେନର କର୍ମଚାରୀ ଆମକୁ ଆଗରୁ ଏ ସମ୍ପର୍କିତ କୌଣସି ସୂଚନା ଦେଇ ନଥିଲେ । ପରେ ଆମେ ସିଡ଼ି ମାଧ୍ୟମରେ ବାହାରକୁ ଆସି ଅନ୍ୟ ଏକ ଟ୍ରେନରେ ବସିଲୁ । ସେହି ଟ୍ରେନ୍ ମଧ୍ୟ ୩୦ ମିନିଟ୍ ପରେ ବାହାରିଥିଲେ ବି ପ୍ରକୃତ ଗନ୍ତବ୍ୟସ୍ଥଳରେ ପହଞ୍ଚାଇ ନଥିଲା । ସେଠାରେ ଆମେ ବିଳମ୍ବିତ ରାତିରେ ପାଖାପାଖି ସାଢେଗୋଟାଏରେ ପହଞ୍ଚିଥିଲୁ । ସେଠାରୁ ଆମେ ଟ୍ୟାକ୍ସି ମାଧ୍ୟମରେ ଯାତ୍ରାକରି ଗନ୍ତବ୍ୟରେ ପହଞ୍ଚିଥିଲୁ । ପରବର୍ତ୍ତୀ ସମୟରେ ରେଳ ଅଧିକାରୀ କୌଣସି ଯାନ୍ତ୍ରିକ ତ୍ରୁଟି କାରଣରୁ ବିଦୁତ୍ କଟି ଯାଇଥିବା କହି କ୍ଷମା ମାଗିଥିଲେ।