‘ପ୍ୟାଡ୍ମ୍ୟାନ୍’ ଫିଲ୍ମରୁ ଅନୁପ୍ରାଣିତ ହୋଇ ଦୁଇ ସାଙ୍ଗ ଗଢ଼ିଲେ ପ୍ୟାଡ୍ଗ୍ୟାଙ୍ଗ୍,ମୋର ଫିଲ୍ମ କରିବା ସଫଳ ହୋଇଛି ବୋଲି କହିଲେ ଅକ୍ଷୟ କୁମାର
ଜଲନ୍ଧର : ବଲିଉଡ୍ରେ ଏମିତି ଅନେକ ଫିଲ୍ମ ତିଆରି ହୋଇ ସାରିଛି ଯାହା ସମାଜରେ ବାସ କରୁଥିବା ଲୋକମାନଙ୍କୁ ସଚେତନ କରାଇଛି । ଫିଲ୍ମକୁ ଦେଖି ଲୋକମାନଙ୍କ ମଧ୍ୟରେ ଅନେକ ପରିବର୍ତ୍ତନ ଆସୁଥିବାରୁ କିଛି ନିର୍ଦ୍ଦେଶକ ସମାଜରେ ଥିବା ଅସୁବିଧାକୁ ନିଜ ଫିଲ୍ମ ମାଧ୍ୟମରେ ଦର୍ଶାଉଛନ୍ତି । ପୂର୍ବରୁ ସେଭଳି ଫିଲ୍ମ ‘ଟଏଲେଟ୍ : ଏକ ପ୍ରେମ କଥା’ଏବଂ ‘ପ୍ୟାଡ଼୍ମ୍ୟାନ୍’ ଭଳି ଫିଲ୍ମ ତିଆରି ହେବା ସହ ଲୋକମାନଙ୍କ ମନରୁ ଭ୍ରମ ଦୂର କରିବା ପାଇଁ ଚେଷ୍ଟା କରାଯାଇଛି । ଫିଲ୍ମ ‘ପ୍ୟାଡ଼୍ମ୍ୟାନ୍’ରେ ବଲିଉଡ୍ର ଖିଲାଡ଼ି ଅକ୍ଷୟ କୁମାର ମୁଖ୍ୟ ଭୂମିକାରେ ନଜର ଆସୁଥିବା ବେଳେ ଏବେ ଯାଇ ତାଙ୍କ ଫିଲ୍ମ ସଫଳ ହୋଇଛି ବୋଲି ସେ କହିଛନ୍ତି । ଜଲନ୍ଧରରେ ରହୁଥିବା ଦୁଇ ଜଣ ସାଙ୍ଗ ମିଶି ‘ପ୍ୟାଡ଼୍ମ୍ୟାନ୍’ ଫିଲ୍ମରୁ ଅନୁପ୍ରାଣିତ ହୋଇ ପ୍ୟାଡ଼୍ଗ୍ୟାଙ୍ଗ ବନାଇଥିବା ଜଣାପଡ଼ିଛି । ଦୁଇ ସାଙ୍ଗଙ୍କର ଏହି ପ୍ରୟାସ ଏବେ ସାରା ଦେଶରେ ଚର୍ଚ୍ଚାର ବିଷୟ ପାଲଟିଛି ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଜଲନ୍ଧରରେ ରହୁଥିବା ଜାହ୍ନବୀ ସିଂ ଏବଂ ଲାବଣ୍ୟ ଜୈନ୍ ଅକ୍ଷୟ କୁମାରଙ୍କ ଫିଲ୍ମ ପ୍ୟାଡ଼୍ମ୍ୟାନ୍ ଦେଖିବା ପରେ ଗରିବ ଯୁବତୀ ଏବଂ ମହିଳାମାନେ ଭୋଗୁଥିବା ଅସୁବିଧାକୁ ଅନୁଭବ କରିଥିଲେ । ଯାହା ପାଇଁ ସେମାନେ ଖରାଦିନ ଛୁଟିରେ ନିଜ ସାଙ୍ଗମାନଙ୍କ ସହ ମିଶି ପ୍ୟାଡ଼୍ଗ୍ୟାଙ୍ଗ୍ ଗଢ଼ିବା ସହ ପାଖାପାଖି ୫ହଜାର ପ୍ୟାଡ଼୍ ତିଆରି କରି ବସ୍ତି ଅଞ୍ଚଳରେ ରହୁଥିବା ମହିଳାଙ୍କୁ ବାଣ୍ଟିଥିଲେ । ଅନ୍ୟ ପକ୍ଷରେ ଅକ୍ଷୟ କୁମାରଙ୍କୁ ଏ ବିଷୟରେ ସୂଚନା ମିଳିବା ପରେ ସେ ନିଜ ଟ୍ଵିଟର ଏବଂ ଫେସ୍ବୁକ୍ ଆକାଉଣ୍ଟକୁ ଯାଇ ଜାହ୍ନବୀ ସିଂ ଏବଂ ଲାବଣ୍ୟ ଜୈନ୍ଙ୍କର ଖୁବ୍ ପ୍ରଶଂସା କରିଥିଲେ । ସବୁ ବେଳେ ମୋତେ ଲୋକ ପଚାରନ୍ତି ତୁମେ କାହିଁକି ‘ଟଏଲେଟ୍ : ଏକ ପ୍ରେମ କଥା’ ଏବଂ ‘ପ୍ୟାଡ଼୍ମ୍ୟାନ୍’ ଭଳି ଫିଲ୍ମ କରୁଛ । ଆଜି ସେମାନଙ୍କୁ ସେମାନଙ୍କ ଉତ୍ତର ମିଳି ଯାଇଥିବ କହି ପୋଷ୍ଟ କରିଥିଲେ ଅକ୍ଷୟ କୁମାର ।