ଏହି ବଡ଼ା ପାଓ ବ୍ୟବସାୟୀ ନିଜର ଗୋଟିଏ ଦିନର ଆୟକୁ ସେନାକୁ ଦାନ କରିଛନ୍ତି

ମୁମ୍ବାଇ: ମୁମ୍ବାଇର ବଡ଼ା ପାଓ ବିକ୍ରେତା ମଙ୍ଗେସ୍‌ ଆହିବାଲେ ପୁଣି ଥରେ ନିଜ କାମ ପାଇଁ ଚର୍ଚ୍ଚାରେ ରହିଛନ୍ତି। ସେ ମଙ୍ଗଳବାର ନିଜର ଗୋଟିଏ ଦିନର ଆୟକୁ ସେନା କଲ୍ୟାଣ ପାଇଁ ପ୍ରତିରକ୍ଷାମନ୍ତ୍ରୀ ନିର୍ମଳା ସୀତାରମଣଙ୍କୁ ଦେବା ପାଇଁ  ଘୋଷଣା କରିଥିଲେ । ୩୦ଜାନୁଆରି  ମହାତ୍ମା ଗାନ୍ଧିଙ୍କ ତିରୋଧାନ ଦିବସରେ ସେ ଏହି ଦାନ କରିଥିବା ଜଣାପଡ଼ିଛି ।

ମଙ୍ଗେସ୍‌ ମଙ୍ଗଳବାର ତାଙ୍କ ବଡା ପାଓ ମୂଲ୍ୟରେ ୬୦ପ୍ରତିଶତ ରିହାତି ଦେଇଥିଲେ। ଏପରି ରିହାତି ଦେବା କାରଣ ସମ୍ପର୍କରେ ମଙ୍ଗେସ୍‌ କହନ୍ତି, ‘ବଡା ପାଓର ଦାମ୍‌ କମ୍‌ କଲେ ଏହା ସମସ୍ତେ କିଣିବା ପାଇଁ ସକ୍ଷମ ହେବ। ଓ ଅଧିକ ଗ୍ରାହକ ଆସିବେ। ମୁଁ ୧୪ଟଙ୍କାରେ ବଡ଼ା ପାଓକୁ ୫ଟଙ୍କାରେ ବିକ୍ରି କରିଥିଲି। ଏହା ଆମର ଦେଶର ଯବାନମାନଙ୍କ କଲ୍ୟାଣ ପାଇଁ ମୋ ତରଫରୁ ଏହା ଏକ ଛୋଟିଆ ପ୍ରୟାସ। କାରଣ ସମସ୍ତେ ଆମର ସେନାଙ୍କୁ କେବଳ ଅଗଷ୍ଟ ୧୫ ଓ ଜାନୁଆରି ୨୬ରେ ହିଁ ମନେ ପକାଇ ଥାଆନ୍ତି। ପ୍ରତ୍ୟେକ ଭାରତୀୟଙ୍କୁ ଆମର ସେନାକୁ ସମ୍ମାନ ଦେବା ଉଚିତ । କାରଣ ସେମାନେ ଖରା, ବର୍ଷା, ଶୀତ, କାକର, ଦିନ ଓ ରାତିକୁ ଖାତିର୍‌ ନକରି ଆମ ଦେଶ ଶତ୍ରୁ କବଳରୁ ରକ୍ଷା କରିବା ପାଇଁ ସୀମାରେ ଜଗି ରହିଛନ୍ତି।

ମଙ୍ଗେସ୍‌ ୨୦୧୫ରେ ମହାରାଷ୍ଟ୍ରର ମରାଠାଓ୍ଵାଡା ଓ ବିଦର୍ଭ କ୍ଷେତ୍ରରେ ମରୁଡି ପୀଡିତ କୃଷକଙ୍କ ସାହାଯ୍ୟ ପାଇଁ ୨୦,୦୦୦ଟଙ୍କା ମୁଖ୍ୟମନ୍ତ୍ରୀ ରିଲିଫ ପାଣ୍ଠିରେ ଜମା କରିଥିଲେ। ଏତଦ୍‌ବ୍ୟତୀତ ଗତବର୍ଷ ଏଲିଫିନ୍‌ଷ୍ଟୋନ୍‌ ଷ୍ଟେସନ୍‌ର ଫୁଟ ଓଭରବ୍ରିଜ ଉପରେ ହୋଇଥିବା ଦଳାଚକଟା ଘଟଣାରେ ଗୁରୁତର ଆହତଙ୍କୁ ବି ଅର୍ଥରାଶି ସାହାଯ୍ୟ କରିଥିଲେ।

ସମ୍ବନ୍ଧିତ ଖବର