ବିମାନରେ ଯାତ୍ରା କରିବା ସମୟରେ ଏହି ସିଟଗୁଡ଼ିକ ସୁରକ୍ଷିତ ହୋଇପାରେ ବୋଲି ନିକଟରେ ଏକ ଅଧ୍ୟୟନରୁ ଜଣାପଡ଼ିଛି

ନୂଆଦିଲ୍ଲୀ: ପ୍ରତ୍ୟେକ ବର୍ଷ ବିମାନ ଦୁର୍ଘଟଣାକୁ ନେଇ କୌଣସି ନା କୌଣସି ଖବର ସାମ୍ନାକୁ ଆସିଥାଏ। କିଛିଦିନ ପୂର୍ବରୁ ନେପାଳରେ ହୋଇଥିବା ସବୁଠାରୁ ବଡ଼ ବିମାନ ଦୁର୍ଘଟଣା ସମସ୍ତଙ୍କୁ ସ୍ତବ୍ଧ କରି ଦେଇଥିଲା। ଏହି ଦୁର୍ଘଟଣାରେ ୭୨ଜଣଙ୍କ ମୃତ୍ୟୁ ହୋଇଥିବା ଖବର ମିଳିଥିଲା। ଏହି କ୍ରମରେ ବିମାନ ଯାତ୍ରା ସମୟରେ କେଉଁ ସିଟଟି ଅଧିକ ସୁରକ୍ଷିତ ତାହାକୁ ନେଇ ଏକ ଅଧ୍ୟୟନ କରାଯାଇଥିଲା। ଏହି ଅଧ୍ୟୟନର ଫଳାଫଳ ଆମେରିକାର ପତ୍ରିକା ଟାଇମରେ ପ୍ରକାଶ ପାଇଛି।

ଟାଇମ୍ ଦ୍ୱାରା କରାଯାଇଥିବା ଏକ ଅଧ୍ୟୟନରେ ବିମାନ ଦୁର୍ଘଟଣା ସମ୍ବନ୍ଧୀୟ ୩୫ ବର୍ଷର ତଥ୍ୟ ଯାଞ୍ଚ କରାଯାଇଥିଲା। ଯେଉଁଥିରେ ଅନେକ ତଥ୍ୟ ସାମ୍ନାକୁ ଆସିଥିଲା ।

ରିପୋର୍ଟ ଅନୁଯାୟୀ, ଯଦି ବିମାନ ଦୁର୍ଘଟଣା ଘଟେ ତେବେ ବିମାନ ପଛରେ ଥିବା ମଧ୍ୟମ ସିଟଗୁଡ଼ିକ ଅଧିକ ସୁରକ୍ଷିତ ବୋଲି କୁହାଯାଉଛି।  ୧୯୮୫ ରୁ ୨୦୨୦ ମଧ୍ୟରେ ହୋଇଥିବା ଦୁର୍ଘଟଣାକୁ ଦେଖିଲେ, ବିମାନର ମଧ୍ୟଭାଗରେ ବସିବା ସବୁଠାରୁ ବିପଦପୂର୍ଣ୍ଣ ସ୍ଥାନ ବୋଲି ଅଧ୍ୟୟନରୁ ଜଣାପଡ଼ିଛି।

ଏହି ଅଧ୍ୟୟନ ପରେ ଅନେକ ପ୍ରକାରର ତଥ୍ୟ ସାମ୍ନାକୁ ଆସୁଛି। ଆନ୍ତର୍ଜାତୀୟ ଗଣମାଧ୍ୟମର ରିପୋର୍ଟ ଅନୁଯାୟୀ, ଅଧ୍ୟୟନକୁ ଯୁକ୍ତିଯୁକ୍ତ କୁହାଯାଇପାରିବ ନାହିଁ। କାରଣ ବିମାନ ଦୁର୍ଘଟଣାର ଏଭଳି ଅନେକ ଘଟଣା ସମଗ୍ର ବିଶ୍ୱରୁ ସାମ୍ନାକୁ ଆସିଛି ଯେଉଁଥିରେ ଏହି ତଥ୍ୟଗୁଡିକ ପ୍ରୟୋଗ କରାଯାଇ ନାହିଁ।

ରିପୋର୍ଟରେ ଆଉ ଗୋଟିଏ କଥା ଉଲ୍ଲେଖ କରାଯାଇଛି। ଯେଉଁଥିରେ କୁହାଯାଇଛି ଯେ ସୁରକ୍ଷିତ ବୋଲି କୁହାଯାଉଥିବା ଆସନଗୁଡିକ କାହିଁକି ସୁରକ୍ଷିତ ବୋଲି ବିବେଚନା କରାଯାଇଛି ତାହାର ସ୍ପଷ୍ଟ ସୂଚନା ଦିଆଯାଇନାହିଁ।