ମହାରାଜ ଉଗ୍ରସେନଙ୍କର ଜଣେ ଭାଇ ଥିଲେ, ଯାହାଙ୍କ ନାମ ଥିଲା ଦେବକ । ଦେବକୀ ତାଙ୍କର କନ୍ୟା ଥିଲେ । ସେ କଂସଠାରୁ ସାନ ଥିଲେ, ଏଣୁ ସମସ୍ତଙ୍କ ସ୍ନେହ ଓ ଆଦର ପାଉଥିଲେ । ଦେବକ କନ୍ୟା ଦେବକୀର ବାହାଘର ବସୁଦେବଙ୍କ ସହିତ ଖୁବ୍ ଆଡମ୍ବର ସହକାରେ କରାଇଥିଲେ । ଏହି ଅବସରରେ ସେ ବସୁଦେବଙ୍କୁ ପ୍ରଚୁର ଜାନିଯୌତୁକ ପ୍ରଦାନ କରିଥିଲେ । କଂସ ସ୍ୱୟଂ ରଥ ଚଳାଇ ନିଜ ଭଉଣୀ ଓ ଭିଣୋଇଙ୍କୁ ବସୁଦେବଙ୍କ ଘରକୁ ନେଇଯାଉଥିଲା । ଅଧା ରାସ୍ତାରେ ଆକାଶବାଣୀ ହେଲା – ‘‘ ରେ ମୁର୍ଖ ! ଯେଉଁ ଭଉଣୀ ପ୍ରତି ତୁ ସ୍ନେହ ପ୍ରଦର୍ଶନ କରୁଛୁ ଓ ରଥକୁ ସ୍ୱୟଂ ଚଳାଉଛ ସେହି ଭଉଣୀର ଅଷ୍ଟମ ଗର୍ଭ ତୋ’ର କାଳ ହେବ ।’’
Sambad is now on WhatsApp
Join and get latest news updates delivered to you via WhatsApp
ଏହି ଆକାଶବାଣୀ ଶୁଣିବା ମାତ୍ରେ କଂସର ସ୍ନେହ ଭାବ ଦ୍ୱେଷ ଭାବରେ ପରିଣତ ହେଲା । ସେ କ୍ରୋଧିତ ହୋଇ ରଥରୁ ଓହ୍ଲାଇଗଲା । ସେ ତତ୍କ୍ଷଣାତ୍ ଖଣ୍ଡା ଉଠାଇ ଦେବକୀଙ୍କୁ ହତ୍ୟା କରିବାକୁ ମାଡ଼ି ଆସିଲା । ବସୁଦେବ କଂସର ଏଭଳି ରୂପ ଦେଖି ତାଙ୍କୁ ଆକୁଳେ ବିନତି କରି କହିଲେ ଯେ ଏକ ଅବଳା ନାରୀକୁ ବଧ କରିବା ଉଚିତ ନୁହେଁ । ସେ ଆହୁରି ମଧ୍ୟ କହିଲେ ‘‘ ତୁମର କାଳ ତ ଦେବକୀର ଗର୍ଭସ୍ଥ ସନ୍ତାନ । ମୁଁ ତା’ର ସମସ୍ତ ସନ୍ତାନ ତୁମକୁ ଦେବା ଲାଗି କଥା ଦେଉଛି । ତମେ ଦେବକୀଙ୍କୁ ଛାଡିଦିଅ । କଂସ ବସୁଦେବଙ୍କ କଥାକୁ ବିଶ୍ୱାସ କରି ଦେବକୀଙ୍କୁ ମାରିବା ଉଦ୍ୟମରୁ ବିରତ ହେଲା, କିନ୍ତୁ ପରେ ପତିପତ୍ନୀଙ୍କୁ କାରାଗାରରେ ବନ୍ଦୀ କରି ରଖିଲା ।