ଗୋଟିଏ କିଡ଼ନି ଦୁଇଟି ଜୀବନ, ସଂସାରରେ ଆସିଲା ପ୍ରେମ ଫଗୁଣ

‘ସ୍ୱାମୀଙ୍କର ଦୁଇଟି ଯାକ କିଡ଼ନି ନଷ୍ଟ ହୋଇଯାଇଛି, ଗୋଟିଏ କିଡ଼ନି ତୁରନ୍ତ ଯୋଗାଡ଼ କରନ୍ତୁ, ନଚେତ ସେ ବଞ୍ଚିବେନି’ ଯାଜପୁର ବାଙ୍କୀପାଳର ନିହାରିକା ମିଶ୍ରଙ୍କୁ କିଛି ଏଭଳି କହିଥିଲେ ଡାକ୍ତର | ଏକଥା ଶୁଣି ଗୋଡ଼ତଳୁ ଖସିପଡିଥିଲା ମାଟି | କିଭଳି ନିଜ ସ୍ୱାମୀ ଲକ୍ଷ୍ମଣଙ୍କୁ ବଞ୍ଚାଇବେ, ଚିନ୍ତାରେ ପଡିଯାଇଥିଲେ ନିହାରିକା | ଡାକ୍ତରଙ୍କୁ କହିଥିଲେ ଅପରେସନ ଥିଏଟରକୁ ନିଅନ୍ତୁ, କିଡ଼ନିଟିଏ ବ୍ୟବସ୍ଥା ହୋଇଯିବ | ଅପରେସନ ବେଡ଼ରେ ନିସ୍ତେଜ ଅବସ୍ଥାରେ ଲକ୍ଷ୍ମଣ ଥିବାବେଳେ ଡାକ୍ତରଙ୍କ ପାଖକୁ ଆସି ତାଙ୍କର ଦୁଇଟି କିଡ଼ନିରୁ ଗୋଟିଏ ସ୍ୱାମୀଙ୍କ ଶରୀରରେ ଲଗାଇବାକୁ କହିଥିଲେ | ଏହା ପରେ ଡାକ୍ତର ନିହାରିକାଙ୍କ ଗୋଟିଏ କିଡ଼ନି ଲକ୍ଷ୍ମଣଙ୍କ ଶରୀରରେ ପ୍ରତିରୋପଣ କରିଥିଲେ | ବଂଚିଯାଇଥିଲେ ଲକ୍ଷ୍ମଣ, ଖୋଜିଥିଲେ କିଏ ଦେଇଛନ୍ତି ଜୀବନର ନୂଆ ଆଶା | ଜାଣିଥିଲେ ତାଙ୍କ ପାଇଁ ପତ୍ନୀ ତ୍ୟାଗଟିଏ କରିଛନ୍ତି |

୨୦୦୮ ମସିହାରେ ଦୁହିଁଙ୍କ ମନ ମିଶିଥିଲା, ଆଉ ଦୁହେଁ ପ୍ରେମରେ ପଡ଼ିଥିଲେ | ଏହା ପରେ ବିବାହ କରିଥିଲେ ଲକ୍ଷ୍ମଣ-ନିହାରିକା | | ବଲାଙ୍ଗୀରରେ ପରିବାରର ମୂଳଦୁଆ ପକାଇ ଢେର ସ୍ବପ୍ନକୁ ନେଇ ଗଢ଼ିଥିଲେ ନିଜର କୁନି ସଂସାର | ସେମାନଙ୍କ ଔରସରୁ ଜନ୍ମ ହୋଇଥିଲେ ଝିଅ ବର୍ଷା ଓ ପୁଅ ବାଦଲ | ଲେଡ଼ିଜ କର୍ଣ୍ଣରଟିଏ କରି ଲକ୍ଷ୍ମଣ ନିଜ ସୁଖ ଦୁଃଖ ସଂସାର ଚଳାଇଥିବାବେଳେ ୨୦୧୭ ମସିହାରେ ହଠାତ ଦିନେ ପେଟରେ ଯନ୍ତ୍ରଣା ଅନୁଭବ କରିଥିଲେ | ପରୀକ୍ଷାରୁ ଜଣାପଡିଥିଲା ଯେ ଦୁଇଟି ଯାକ କିଡ଼ନି ନଷ୍ଟ ହୋଇଯାଇଛି | ଭାଙ୍ଗିପଡିଥିଲେ ଲକ୍ଷ୍ମଣ, ଠିକ ଏହି ସମୟରେ ସ୍ତ୍ରୀ ନିହାରିକା ସାହସ ଦେଇଥିଲେ | ମେଡିକାଲରେ ଯେତେବେଳେ ଡାକ୍ତର ଲକ୍ଷ୍ମଣଙ୍କ ଶେଷ ସମୟ ଆସିଯାଇଛି ଓ ତୁରନ୍ତ କିଡ଼ନିଟିଏ ଦରକାର ବୋଲି କହିଥିଲେ, ନିହାରିକା ଆଗେଇ ଆସି କହିଥିଲେ କିଡ଼ନିଟିଏ ସେ ଦେବେ | ଏହା ପରେ ଲକ୍ଷ୍ମଣଙ୍କ ଶରୀରରେ କିଡ଼ନିଟିଏ ପ୍ରତିରୋପଣ ପରେ ଏବେ ଉଭୟ ହସ-ଖୁସିରେ ଅଛନ୍ତି |

ନିହାରିକା କହିଥିଲେ କେବଳ ଗୋଟିଏ କଥା ପ୍ରେମ ପରା କରିଛି, ଅଧା ବାଟରେ କେମିତି ତୁମକୁ ଛାଡ଼ିବି | 

ମୋବାଇଲ ଦୁନିଆରେ କଥା କଥାକେ କେତେବେଳେ ପ୍ରେମିକା କାହା ହାତ ଧରି ଚାଲିଯାଉଥିବାବେଳେ ଆଉ କେତେବେଳେ ପ୍ରେମିକ ଅନ୍ତରଙ୍ଗ ମୁହୂର୍ତ୍ତର ଭିଡିଓକୁ ମଧ୍ୟ ଭାଇରାଲ କରିବାକୁ ମଧ୍ୟ ପଛାଉନାହିଁ | କିନ୍ତୁ ଏହି ପ୍ରେମ କାହାଣୀ ଦୁହିଁଙ୍କୁ ଦୂରେଇନି ବରଂ ଏକାଠି ରଖି ଇସ୍କର ରଙ୍ଗରେ ଭିଜାଇଚାଲିଛି |